Ахъушала шилизибси З.МяхIям­ма­довала уличилси истори­ко-краеведческий музейлизиб гьунибаъни бетерхур.
Музейла директор Зубалжат Мирзаевани музейлизи лебри жибарили районна ЖамигIятла палатала председательла заместитель МяхIяммадзагьир МяхIяммадов, «Бархьдешла гьуни» газетала редактор Па­тIи­мат Маллаева, «Ахъушала район» МО-ла администрацияла жагьилтала политикала ва спортла управлениела начальник Мя­хIям­мад МяхIяммадхIяжиев сунела хIян­­чи­зар МяхIяммадкамил Чамкуровличил варх.
Музейла хIянчизарти гIяхIлас разили гьунибаиб. Музейлизиб лебри абхьили са­гаси суратунала выставка «Поэтические лики» бикIуси.
Ил фотовыставка хилри ДР-ла ГI.Тахо-Го­дила уличилси Миллатла музейла Фонд­ли­зибад. Выставкаличир лерри гьала­ди­хьили Дагъиста халкьла поэтуни Р.ХIям­­затовла, ХI.ЦIадасала, Ф.ГIя­лиевала, И.Къа­закъла, С.Стальскийла ва цархIилтира маш­гьурти адамтала суратуни.
Гьунибаъниличиб музейла директорли буриб даргала машгьурси поэт ГIямарла Батирайличила.
— ГIямарла Батирай акIубси сай Серго­къа­лала районна ХIурхъила шилизив. ГIя­марла Батирайла бегIти узденти буили саби. Ил жявли цIуръа­виуб­сири. ХIябцIали дус виубхIели, Батирай Ами­нат би­кIу­си рурсиличи хъайчикайибсири. Илдала авал урши-рурси акIубтири.
1961 ибил дуслизиб Избербаш шагьарлизиб абхьибси даргала пачалихъла театр­лис ГIямарла Батирайла у бедибси саби. Леб ил шагьарлизиб поэтлис хасбарибси бюстра. МяхIячкъала шагьарла дайларти кьакьурбазибад цалисра ГI.Ба­ти­райла у бе­дибси саби. 2018 ибил дус­лизиб ГI.Батирай акIубхIейчирад 200 дус дикнилис багъишлабарили пачалихъла республикала М.Горькийла уличилси урус­­ла драматический театрлизиб балбуц ду­­ра­­­бер­кIибсири, – аргъахъиб З.ХIусей­нов­­нани.
Гьунибаъниличир цалабикибти гIяхI­ла­ни Дагъиста машгьурти поэтуни-писательтачила чула пикруми дуриб. Музейла хIянчизартас баркалла багьахъур, музейлизир илдигъунти далдуцуни гьаман дурадуркIнилис.
Музейла хIянчизартани гIяхIли гIурра музейлизи башахъес жибариб. Гьар мурталра кьяйдали гIяхIлас сахаватси кьумурра гьалабихьиб.