ИшбархIи белкIлизиб ахъбурцуси суал ну цугли вецIал дус сунезив хIерируси юртличила саби. «ХIерируси» ибси дев ил юртлизибси ца кабинетлизив «жумягIла ухIнав шел бархIи ну вируси» тяхIярли иргъуси саби. МяхIячкъалализибси ил юртлис печатьла Юрт бикIар. Печатьла Юртла адрес Насрутдиновла кьакьа 1 «а» саби.
Ил юртлизир мерладиубли сари лерилра Дагъиста СМИ-би викIаслира, хатIахIеркус. Юртла цаибил дерхIличиб «Дагъистан» РИА саби, кIиибилличиб – ДР-ла печатьла ва багьахънибала Агентство, хIябъибил дерхIличиб – «Дагъистан» Этномедиахолдинг» ва Россияла журналистунала Союзла Дагъиста отделение, 4-11-ибти дерхIаначир – миллатунала газетабала ва журналтала редакцияби.
Нушала шагьарлизиб илван эскибиубси цархIил юрт хIебургар. БухIнабад биалли…
Гьарил газетала бекI редакторли чула ахърибикIуси тяхIярли кабинетуни ва жаняхIуни далкьаахъурли сари. БяхIяначир даршибти лезгибала районтала мер-мусала суратуначибли, наб дебали жагабилзан верхIъибил дерхIла жаняхI. Ил шайчир халати устадеш лер «Лезги газет»-ла бекI редактор МяхIяммад Ибрагьимовла. Газеталис кумекбарести адамтира илини баргес балули сай. БегIлара халаси тиражра илини бекIдеш дируси газетала бургар. Баркалла биабну сунес.
РахъхIи даргала газетала редакциялизир машинисткали рузуси Раисат Гиреевани пахруличил бурули рири «Замана» газетала бекI редакторли узули вируси ГъазимяхIяммад Юсуповлара илгъуна устадешличила. «Чуйнара нушаб кабинетуни далкьаахъес хIела виштIал узи СягIидлира кумекбарибсири, ХIяжимурад, —рикIули рири ил набзи, — СягIидра ГъазимяхIяммадра юлдашуни бирутири».
Илис гIергъи нушала газетала бекI редакторла къуллукъличи вакIибси Арсен Юсуповлира нуша гьарра шайчирад гIердурцутири ва мурталра журналистлис гIяхIли биахъес, алапала кьадар ахъбиахъес хIяракатбирусири. Гьаннара, Дагъиста печатьла ва багьахънибала Агентствола руководитель ветаурхIелира, илини нушачила хъумуртули ахIен. ХIукуматла къуллукъуначибтазибад лугIурбала шуртIрачи балбикахъили бузахъес тIалаббируси ишхIелла манзил Арсен Юсуповли Дагъиста СМИ-ла бузери ункъбиахъес, миллатунала мезани мяхIкамдарес, илди заманала тIалабуначи далдикахъили дузахъес ва гьаладяхI дашахъес багьандан сунезибад лябкьусигъуна бирули сай. Илала къайгъначибли нуша дузуси Юртличира Дагъиста руководстволи пикри бяхIчииъниличи халаси умут леб.
Ишаб наб нушала унрубала печатьла Юртличил диубти анцIбукьуначилара гьанбушес дигахъаси. Грозныйлизиб арбякьунси даршдусла 70-ибти дусмазиб печатьла Юрт тIашбатурсири. Цаибти ва кIиибти чечентала дургъбазиб ил юрт заябарибсири. Юртла луцрира хъалчрацун сарри калунти. Дургъби тамандиубхIели, печатьла Юрт сагадан тIашбатур.
2014 ибил дусла декабрьла 4-личиб Грозныйлизиб вайберхурти къачагъунани ил юрт буциб. Къачагъуни агарбарес кьасли дурабухъунти хIукумат балтахъути цIакьанала хIянчизартани дураберкIибси гьужумли юрт цахIнаб гъятIаиб. Кабушиб илаб дигIянбикибти вецIалра къачагъра. ИтхIели Чечентала Республикала бекI Рамзан Кьадировли ишди гъай дурибтири: «Сагаси Дусла байрамлис печатьла Юрт сагадан тIашбалтехIе. Нушала тах шагьарлизиб ил бегIлара жагаси юртли бирар». ХIябал жумягIла бухIнаб, декабрьла 25-лис, Грозный шагьарлизиб, саби гьалабра бируси мерличиб, шагьарлизибра бегIлара жагаси печатьла Юрт тIашбатур…
Нушала тах шагьарлизибси печатьла Юрт биалли, чилилра гъятIаибси ахIен: ил, бухънабаили, дебали эскибиубси куцличи бикили саби. Савли хIянчила лявкьуси наб иличи хIеризес бахъ цIахбилзулигу… Амма сеннира вирхулра, республикала руководстволи нуша дузуси Юртличи пикри бяхIчииъниличи ва гъамси заманализиб ил къулайбирниличи.
ХIяжимурад Ражабов
