МяхIяммадшапи Матаев

Ишдус нушала театр аб­хьиб­хIей­­­­чирад 65 дус дир­кули сари или аргъиб­хIе­ли, дила бекIлизи или­зиб бузути гIяр­тистуначила макьалаби га­­зе­та бу­чIан­тас гьаладихьес ибси пикри ба­­­­кIиб.
Цаибти белкIани театрла жагьилти гIяртистуначила дирар. ГIур театрлизиб гIяхIцад дусмазиб бузули ва даргантала театрла (театральное) искусство ахъбирутачила, гьалабяхI арбикутачила белкIесра къайгъибирисра.
Жагьси гIяртистка
ХIера, чумал дус Даргала пачалихъла музыкала ва драмала театрлизиб Дагъиста бурибти гIяртистуни Рашидат ИсмягIилова ва ХIясанкьади Рабаданов бузули саби. Су­нела бегIтачибад гIибрат касили, гIяр­тистла санигIятра чеббикIили, сарра шал­гIеббухъунси дусла ахирличирад театрлизир рузес рехIирхьиб илдала рурси Муъ­минат ХIясанкьадиевна Рабадановара.
М.Рабаданова акIубси сари МяхIяч­къалала шагьарлизир 2004-ибил дусла ноябрьличир. РиштIа­хIей­чирад илис далай-делхъ дигиауртири: ил жагали делхъли рулхъес ва булбул чатIаван далай­рикIес бур­си­риуб.
Шагьарлизиб школа хьараахъурли ­гIер­­гъи, МяхIячкъалализибси С.Баш­ла­­­ровла ули­чилси ме­­дицинала колледжлизи ка­рер­хурси­ри. Ил таманбарибхIели, сунела бегI­ти хIер­бируси Избербаш шагьарлизи чарру­хъун. ГIурра далай-делхълизи ахъиб. Из­бербашлизибси «Чехьери» делхъла ансамбльлизи карерхур. Илар илала делхъчила гIямру дехIдихьиб. Ансамбльличил рарх ил чу­мал шагьарлизи раиб. ДекIар-де­кIарти кон­курсуначир, фестивальтачир бу­тIа­­кьян­деш дариб, гIяхIцад шабагъатуначи­ лайикьрикиб.
БусягIятла замана Муъминат цазаманализир театрлизир рузра рузули ДГУ-ла культурала факультетлизирра ручIули сари.
Гьанна илини чумал спектакльлизир бутIакьяндеш дариб: А.Цагорелила «Ханума» (делхъчила); дурхIнас хасбарибси «СихIрула дяхIимцIала ва ДяхIила Хала Дудеш» (Косой бикIуси гIярала); Р.Рашидовла «ГуглахIяй» (ГуглахIяйла дурхIя ЛяхIяйла).
Илкьяйдали Муъминатли Дагъиста халкьла писатель МяхIяммад-Расулла «БекI­­бяхъ» повесть хIясибли кабирхьуси «Дарман агар изала» бикIуси спек­такль­ли­зир бекIлириубси игит Гульжанатла роль бу­захъуси сари. Гьанбушес ди­гулра, ил пьеса бегI гьалаб 2009-ибил дус­лизиб ка­би­хьиб­­сири. Гьанна Муъминатли бузахъуси роль гьалаб илала неш Дагъиста руриб­си гIяртистка — Рашидат Ис­мягIиловани бу­захъусири. Пьесализирадси Гульжанатла ду­деш ТIалхIятла роль Муъминатла дудеш — Дагъиста урибси гIяр­тист ХIясанкьади Рабадановли буза­хъу­си саби.
Муъминат Рабадановас дебали житни дигахъу. Наб илини Избер­баш шагьарлизир хIедахунти ва хIярш­хIе­да­рибти житни ка­хIелун или гьанбиркули саби. Тяп илди житни кьяйдали, илис дурхIнира дигахъу. Ил багьандан театрлизирад акьуси замана Муъминатли илдас делхъла дурсри кадирхьули рирар.
Нуни дила рархкьяс, кегIебси ва пагьмучерси рурсили хIянчилизиб ва су­нела гIямрулизиб гьамаддеш, чIумаси ара­деш дулгулра, илкьяйдали илала ур­кIи­­ли­зир­ти лерилра пикруми гьардизурли ди­гулра. АхъбикIаб хIела пагьму!!! Дерхъаб гIям­­ру!!!

ГIинцбар кIаначерси рурси

Палтар, арц кадяхъибти
Чархличи чекагьурли,
КIунби, гIинцба даршибти
БекIличи чедуршули.

Адам хIяйранвиэсли
Гьалакли ралкьсаурли,
Сценаличи разили,
Дурарухъун исбагьи.

ВацIализиб бучIуси
Булбулли кьяйда даим,
УркIи разибареси
Зайбулхъахъу далайра.

Ил рурсила тIамали
Шадбиахъуб уркIира,
Къуймурла жагал дел­хъ­ли
Жагабариб дунъяра.

Исбагьила пергердеш
Дунъя жагабируси,
Агь, илала пасихIдеш
УркIи ряхIятбируси.