Рабаданова ГIяйшат Набиевна акIубси сари Бутрила шилизир 1948 ибил дуслизир гIядатла хъалибарглизир. ГIяйшатла дудеш Наби Рабаданов дахъал дусмазив школализив завучли ва историяла дурсри кадирхьули узули калун.
Бутрила урга даражала школализир гехIел класс тамандарили, ГIяйшат Буйнакъск шагьарлизибси педучилищелизи карерхурсири.
1968 ибил дуслизиб ГIяйшатли, гIяхIти кьиматуначил педучилище таманбарили сунела бузерила гьуни бехIбихьиб школализиб. Ил замана заочно ручIули Дагъиста пачалихъла университетла филологияла факультетра белчIун. Сунени касибси санигIятлис марли ГIяйшат гьаннара школализир завучли, нешла мезла ва литературала дурсри кадирхьули, сунела бузерила гьуни даимбирули рузули сари. ГIяйшатла бузерила стаж гьанна 58 дусличи абикили саби.
ГIяйшат Набиевна чумал хIурматла уличи лайикьрикили сари. Илди-ургар лер: «РФ-ла багьудила хIурматла хIян­чи­зар», «ДР-ла багьудила отлич­ник»-ибтира.
ГIяйшат Рабаданова «Ахъушала район» МО-ла админист­рацияла ва багьудила управлениела шайзирад чумал ХIурматла Грамоталичил шабагъатларарили сари.
Бутрила шила халкьла ва сари рузуси школала коллективла бухIнаб ГIяйшатли халаси хIурмат сархили хIеррирули ва рузули сари.
Илкьяйдали сунени бу­чIахъули калунти дурхIнала ва бусягIятла замана бучIа­хъу­тала, илдала бегIтала шайзибадра баркаллаличира, хIур­матличира лайикьрикили сари.
Жавабкардешличил, дурхI­начи дигичерли, бучIантази багьуди касахъес, илдас гIяхIси бяркъ бедес къайгъилизир рузули сари ишбархIира ГIяйшат Рабаданова.
Илини сунела гIямрула вархкьячил барх урши-рурси абикьур, гIяхIси бяркъра бедили, чебяхIси даражала багьудира касахъили, гIямрула дякьличи дураиб. Урши Москва шагьарлизив хIерирули ва узули сай, рурси МяхIячкъала шагьарлизир хIеррирули сари. Рурсила рурси тухтурла сани­гIят­личил регIриубли, МяхIячкъала шагьарлизибси больницала реанимацияла отделениелизир рузули сари.
Гьаннала гIергъира гIямрулизир сархибдешуни ва арадеш имцIадикIули, гъамтани разирирули хIерриэс кьадарбиаб, хIурматла ГIяйшат Набиевна!

С.ГIябдуллаева