Ахъушала районна куль­­­ту­рала управ­ле­ние­ли­зиб бузули бахъал пагь­му­чебти гIяртистуни леб. Ил­ди чула санигIятлис мар­ли, жаваб­кар­­дешличил хъарси хIян­чи даим­би­рули, адамтас рази­д­еш би­хули бузули саби. Ил­дани район­ни­зир ва илала дурар детур­ху­ти, рес­публикала кьадрила шад­­ли­хъу­назир жигарла бутIа­кьян­деш ди­рули саби, мил­латла палтарра че­гьурли, дуб­батунира гьала­ди­хьи­ли.
Ахъушала районна миллатла культура гьалабяхI арбукес багьандан халаси пай кабирхьули саби ХIямшимала шилизибадти Пирдаус ХIяжимяхIяммадовани ва илала рузи ПатIимат Ситуевани.
ДурадуркIути шадлихъуначир ва байрумтачир илдани жагати далуйти зайдулхъахъу, районна духIнарти учреждениебачил бархбас бузахъу, Ахъушала краеведческий музейлизибра гьаман илди чебаэс вирар, илар детурхути шадлихъуназир бутIакьяндеш диру. Гьарахъти мер-мусаличи архIяличира башар, музейла хIянчизартачил барх, адамтачил гъай даргес балути саби, саби-ургабра балгунти рузбани чула нешра дигиличил ва хIерудиличил алавруцили сари. Илдала неш Зугьрани халкьла хIурматбирахъес бурсибарили абикьурли сари рурсби.
Пирдаус ХIяжимяхIяммадовани дахъал фестивальтазир, конкурсуназир бутIакьяндеш дирули, гьаларти мераначи лайикьриркули рирар. Ил чуйнара ДР-ла культурала Министерствола, республикала халкьла пагьмуртала Юртла, «Ахъу­шала район» МО-ла администрацияла ва культурала управлениела шайзирад Дипломтачил, ХIурматла Грамотабачил шабагъатларарили сари.
Республикала кьадрила «Дагъиста рухI» бикIуси премияла лауреатра сари Пирдаус ХIяжи­мя­хIям­мадова ва «Дагъистан Рес­пуб­ликала культурала рурибси хIян­чи­зар» ибси уличира лайикьрикили сари. МалхIямти, пагьмучебти, халкьла ва чула коллективла ургаб халаси хIурмат сархибти культурала хIянчизарти гьаннала гIергъира дигичебли, халкь разибирули, сархибдешуни имцIадикIахъули бузес кьадарбиаб!

С.ГIябдуллаева