ГIялимтани бурни хIясибли, ванзаличирти гIямру мирхъили сари гIердурцути. Илди 100 миллион дус хIердирули сари. Илди дебкIили агардиалли, духълумира дузес хIедирар бикIули саби илди, духълуми хIедиалли, мицIирти жанра хIедирни якьинси саби.
Гьарли-марли мирхъи тамашала мицIираг сари. Илдани гIяламлис тянишси ва пайдаласи варъа сегъуна къиян кабихьили бирулил якьинси саби. Мирхъила гIямруличила илди адилкьутани тамашала баянти дурули сари. Илдани гьарахъти мер-мусаличи дашули, варъа цалабирхъулицунра ахIи, чула тIакьназир уржили дузули сари ва цацахIели цадехIличи цадехI чедулхъулира дирар.
Илдачила ишдигъунти тамашала баянтира иргъулра. Илдала шел хIули ва авал дукала лер. Ца хъалибарглизир илди гIяхIцад диэс асубирули саби. Илдазирадли гьарилла сунечи хъарти хIянчи лерли сари.
Мирхъили урегал кьяшла кумекличил вавначирти пыльца учидирхъу. ДуцIрумла замана мирхъи 30—45 бархIи хIербиэс бирули саби, янилизиб – урегал базцадхIи. Неш мирхъи шел дусцадхIи хIербирули саби. Мирхъи ваваличи кадиибхIели баянбирули саби ил сегъуна сабил ва варъаличилси сабил.
ЦадехI мирхъили варъа калкьути шалуби дирули сари, цархIилтани варъа бурчули саби. Лер дурхIнас къуллукъ гIеббиахъутира. Секундла духIнар илдани 230-йна чула дуклуми гьакIдирули сари.
Ца килограмм варъала бучес багьандан, азирти километрти ахъили ва халаси къиянра чекасили, мирхъилис 4 миллионцад ваваличи даэс чевкъули саби. СягIятли 25 километр ихъули, урцути сари илди.
БиштIаси мирхъили илкьяйдали бузери тIашбалтухIели, адамли замана дугIли буркIни лебгIеб вайси баркьуди саби. Мирхъилицад къиян кахIесаллира, дахъал сархибдешуни диахъес имканти лергу илис. Сепайда…
ПатIимат Кьурбанова
