Нешла хIурматлис балбуц дураберкIес пикри лебсигу, «Разговор о важном» бикIуси дарсличиб, хIела бетарару ну­шачи ракIес? — зянкъдяхъили, рикIар Хъар­ша­ла урга даражала школала директор ХIям­за­ла­гIялиева Аматуллагь ГIябдуллаевна. «Ин­шааллагь, къайгъибирис» или жавабра бедили, гьанбикунани чумал дусла гIела аррухира.
ИтхIели ну Хъаршала школализи сентябрьла 1-личиб дурабуркIуси багьудлумала Бар­хIила балбуцличи рякьунсири. Шадлихъ таман­биуб­хIели Аматуллагьли ибсири: «Раши, ца нешличи гьар­дикIехIе». Аматуллагьла неш ХIябсат, бекI­личиб къугъаси ахъушан чутхъара сарира, сеткала чедирад жибжирдухъи дерхъибти, лергIер къугъали кадизурти кьадубачирти гьулухъара удули лерри.
ДяхI шаласи, малхIямси ХIябсат нушаб разили гьунираиб, «Селра гIягIнили ахIенну, хIу паргъатли руэн» дикIули хьалли кьумурличи дукира, чяй хIядурдариб, дилара хIянчи-гьуни хьардаиб.
Дунъяличив даимлис кавлуси чилра агара. Сецад ахIерси риалра, нешра аркьули сари. Кавлули сари иличила гьанбикунира, нешли дурути гIякьлумира. Агара гьанна Аматуллагьла нешра. Неш мицIирли лералли илала хIурматбирахъес, нешла гъайличи лехIирхъахъес, ил разириэсли хIербирахъес, иличила уршби-рурсбази бурес — илгъуна сабри нешла хIурматлис дурабуркIуси балбуцла мягIна. Нешлис багъишлабарибси къу­гъаси далай белчIи шадлихъ бехIбихьиб цаибил класслизиб бучIути уршби-рурсбани. Илди хIядурбарибси учительница Раисат Сулайбановнани сецад черетаили хIянчи бирулил багьеслири, илцадра цабалги, цалра девличибад чебхIебухъи белчIун дурхIнани далай.
— Жавабкардешличил бузути саби нушала лебилра учительти, —буриб Аматуллагь ГIябдул­лаевани. — ДурхIнази гIяхIси багьуди касахъес­цунра ахIи, илди вайти анцIбукьуназибад мяхI­кам­барес, гьирбикIутас биргIяхIебиахъес чараагарли хIяжатли саби. Нушани бучIантачил «Класс­ла сягIятуни», «Гьаргти дурсри», «Разговор о важном» бикIути ихтилатуни дурадуркIути сари.
Ахъушала администрациялизи кабурхуси Хъаршала школализиб бузули саби дахъал дусмазиб чебетаибси хIянчи бирути педагогуни-нешани, чулира бяркъчебтили чула дурхIнира абикьурли, цархIилталара бархьси гьуйчи каэс къайгъназибти: Калимат МяхIяммадова, Па­тIи­мат Зугьумова, ПатIимат МяхIяммадова, Марьям Ибрагьимова, Раисат МяхIям­мадова, ХIяб­сат ГIя­лиева, Сакинат Ибрагьимова, Узлипат ГIяхI­ма­дова; жавабкардешличил бузес бурсибиубти хIянчизарти саби директорла заместительти: бел­чIудила шайчирси Зубайдат МяхIяммадова ва бяркъла хIянчила шайчирси — Зумруд Зугьу­мо­ва; филологуни — Нурият ГIябдуллаева, Рукьият МяхIяммадова, вожатая — Шагьризат МяхIям­ма­до­ва.
Шадлихъличир лерри бегIтала комитетла руководитель МяхIяммадова Сабият Жамалутдиновна, сунелара хIябал урши-рурси белчIудила ва бяркъла шайчиб цархIилтас гIибратли бета­урти. Лебри цацабехIти бучIантала нешанира, — дурхIнала бегIтала ва школала ургаб гIяхIси бархбас лебти багьудила учреждениебазибад ца саби Хъаршала школа.
Директорли ункъли бучIути, гIяхIти кьиматуначил аттестатуни касибти дурхIначилара гьанбушиб. Буриб, сецад халаси разидеш бетарусил бегIтас, хаслира нешанас, чула урши-рурсиличила гапбикIули биалли.
— Хъули дякьунхIели, нешани кIапIбуцая, муба­ракбарая чула байрамличил! Неш ур­кIи­агарриэси цалра баркьуди хIушазибад ка­хIе­би­кахъес гьарил бархIи пикридикIеная, — буриб ахирлизиб А.ХIямзалагIялиевани.
Илаб набзира гъай гиб ва нуни бурира, тарихлизибад гIячихъбирули кьяйда, Хъаршала къатIличибад бехIбихьибси биъниличила Ахъушала ши. Хъаршабад дурабухъи саби багьудичебти, машгьурти адамти. Хъаршакан ХIяжимурад ГIямаркьадиев левси сай Дагъиста цаибси финансунала нарком; Шайххъала ГIябдуллагь Северный Кавказла бегIлара ахIмакьти хIябал философлизивад ца; ишабад дурабухъунти саби пагьмучебти тухтурти, учительти, шила хозяйствола специалистуни, устадешчебти адамти.
Гьанушира ГIябдуллагь ХIямзалагIялиев, дебали гIяхIси адам, Аматуллагьла дудеш, дахъал дусмазив учительли ва гIур школала директорли узули калунси, бунагь-хатIа урдуцаб сунела!
Хъаршаб хIербирути адамти дебали цабалгунти, гIяхIти баркьудлумачил машгьурти биъниличилара бурира.
Балбуц таманбиубхIели школализирад къунздухъунра ва мер-муса чедаира, газетала корреспондент Сабият ГIябдуллаевани дахъал суратуни касиб, — жагали далкьаахъурти кабинетунала, жаняхIлизирти суратунала, декIар-декIарти гIямзурбала, дуббат хIядурбируси, дурхIни балхути меранала.
— Школала юрт буркьа сабхIели, ил жагали кабизахъес къайгъибирулра, — масхара буриб директорли, нуша гьунирдалтули.
Школала юрт бахъхIи биубси биалра, хIеру­ди­лиуб биъни чебаэслири. Школала азбар-гIя­яра къулайси агиличи душес хIядурдарилри. БекI­либиубси — анцIбукь, ашкарли кьяйда, мер-му­сализиб ахIен, — коллективла уржибдешлизиб, чучи хъарси хIянчи жавабкардешличил дура­буркI­нилизиб саби.
Ил шайчиб цархIилти багьудила организациябас гIибратли детауртала лугIилизибси Хъаршала урга даражала школала педагогический коллективлис ва директор Аматуллагь ГIябдуллаевнас диаб гIяхIси арадеш ва бузерилизир дахъал сархибдешуни!

П.Маллаева