Халкьани-ургабси хьунул адамла БархIи мурхьси мягIна бухIнабуцибси байрам саби, суненира инсаниятла гIямрулизи хьунул адамли кабирхьуси халаси пайличила гьанбиркахъуси. Даршдусмадли хьунул адамти анкъи ванали бихIути, пасихIти насихIятчиби, чула хъалибаргунас ва арагIебли жамигIятлис къакъбяхъуни саби. Гьаман дяхIцIилиуб кавлули хьалли, къиянти замунтазир илданира мурул адамтани кьяйдали гъабзадеш дакIудирути сари.
ХIера, Украинализиб бетурхуси Россияла дявила хасси балбуцлизиб улкализи чедибдеш сархахънилизи хьунул адамтанира мекелли халаси пай кабирхьни чебиулра нушани. Бургъанти ва илдала техника дигIяндирути (маскировочные) сетани думхули, шямани дирули, хасти палтар ибули, бургъантала гIямру уцахъули гъазализи каберхурли саби илди. Хьунул адамла халаси гьунар – нешли урши дергълизи вархьни. Иличибра къиянси гIур се лебси. Илра чекайсулигу илини. Хьунул адамла гьунарли ва илала цIакьли саби чедибдеш сархниличи умутбирхьахъусира.
Гьаннала заманала хьунул адамти багьудлумачил ва баркьудлумачил декIарбулхъули саби, амма чула кьадри-кьимат детахъахъили ахIен. Илдани жамигIятла гIямрула лерилра кьялубазир – гIилмула, политикала, искусствола, бизнесла – жигарчерти бутIакьяндеш дирули, чула пагьмурти гьаргдирули сари ва гьалабяхI башули саби. Сен-биалра хьунул адамли сунела хIянчи-гьунира хъали-цIала чеблумира ункъли гьунчидиркахъу, сари гьар секIайзир бажардириркни чебиахъули.
Селичилра яра чичилра хIерхIеили, сегъунти-дигара къияндешуни ихъуси адам сари ил. Сен хьунул адамлис цIакь камси бикIутил аргъес рирули ахIенра. Илинигу лерилра секIал бекIдирути, иличир сари гьар секIал тIашти. Ца дурхIя варкьес-дигара биабгу илис иш дунъяличиб. Цацун ахIен илини дурхIя виркьуси, бяркъличи иркахъуси ва гIямрула гьунчи дурайуси. Иличиблира багьеслигу хьунул адамла цIакьла кьадар.
ДурхIнала бяркъличила гъайикIалли, ил баркьудилизиб хьунул адамтани декIарси мер бурцули саби. Илданицун сари дурхIнази адаб-хIяяла хьулчни кадирхьути, дурхъадешуначила балахъуси, ВатIайчи диги адилкьути, чеалкIуси наслула гIямруличи пикруми-хIерани белгиси жураличи диркахъути. Илдала диги, къайгъни ва пасихIдеш Аллагьла савгъатуни сари, чулира жамигIятла челябкьла белгибирути, дурхIни бархьси гьунчи кабилзахъути. Илдани жагали маслигIятбарес балнила гIяхIдешличибли къалмакъар детхIеахъес ва ряхIятси аги кабизахъес имканбикIули бирар.
Мартла 8 – лебилра хьунул адамтани гьар бархIи дурадуркIути хIянчилис баркалла багьахъес гIяхIси сабаблира бетарули саби. Илини сари дунъяличи диги делгIути, сари-алавла шалабируси ва гIямру даимдирути. Хьунул адамтала исбагьидешличи мурул адамти гIяшикьхIебиэсра хIебирар. Буралли, илини сай мурул адам уркIичевварили, гъирали вицIахъили, гьалавяхI вашахъуси ва илизи сархибдешуни дирахъути. Дунъяла къакъличибти поэтуни-писательтани хьунул адамтас гIяхIцад назмурти ва произведениеби хасдарили сари, илала жагадеш ва малхIямдеш черяхIдирули, далайчибани пергер далуйти дучIули сари.
Хьунул адам дунъяличирти бегIлара гIяхIти баркьудлумала хьулчи ва бехIбихьуд сари.
ПатIимат Мирзаева
