БяхIмудкьадиева Зубайдат Жалаловна акIубси сари ХIинтIала шилизир, бахъал дурхIнала, хIурматла хъалибарглизир.
1985 ибил дуслизиб ХIинтIала шилизибси урга даражала школа таманбарили, сунела бузерила гьуни бехIбихьиб шилизибси колхозлизир рузули. КIел дусла гIергъи 1987 ибил дуслизир ХIинтIала шила Советла секретарьли рикIибсири.
Зубайдат Жалаловна жавабкардешличил рузули, сунечи хъарси хIянчи чебетаахъили даимбирнилис 1993 ибил дуслизир ХIинтIала шила бекIла заместительли каратур. ИлхIейчирад ил ХIинтIала шила администрациялизир рузули сари.
2022 ибил дусличирад ХIинтIала шила бекIла къуллукъуни заманалис дузахъули сари. Ил къуллукъличирра Зубайдат БяхIмудкьадиева цархIилтас гIибратли ретаур. Зубайдатла дудеш Жалал БяхIмудкьадиевли ва неш ГIяйшат Сулайбановани вецIал урши-рурси абикьур. Илди кIелра тылла зяхIматчибира сабри (бунагь-хатIа урдуцаб чула). ЧебяхIси ВатIа дергъла манзиллизир гIяхIцад хIянчи дарибти, дахъал къияндешуни, гаши-дягIи чедаибти адамти сабри илди.
Сецад къиянни биалра чула дурхIни абикьес, илдас гIяхIси бяркъ бедес, багьуди касахъес къайгъилизиб, халкьла-ургаб хIурмат сархили хIербиуб. Жалал БяхIмудкьадиевли дахъал дусмазиб учительли узули, хIялалси бузери бариб. Илдала верхIел урши-рурсили педагогла санигIят касиб.
Зубайдат Жалаловнала узби-рузби жура-журала санигIятуначил бегIбиуб, ца рузи – Муъминат Избербаш шагьарлизир психологли рузули сари, узи МяхIяммад «Грант» бикIуси ООО-лис бекIдеш дирули сай, ца узи – НухIкьади Дагъиста пачалихъла пединститутлизив преподавательли узули сай, Саният ва Зубалжат педагогла санигIятличи бегIбиубли Куркила шилизибси школализиб бузули саби.
Зубайдат Жалаловнани кIел дурхIя абикьур, ПатIимат ва МяхIяммад, гIяхIси бяркъра бедили, педагогла чебяхIси даражала багьудира касахъили, гIямрула гьунчи дураиб. Гьанна илдачибад акIубтира леб шел урши-рурси.
2005-ибил дуслизир Зубайдат БяхIмудкьадиевани Дагъиста пачалихъла педуниверситетла Юриспруденция бикIуси факультетра таманбарили, чебяхIси даражала багьудира касиб.
Зубайдат БяхIмудкьадиева дахал дусмазиб Дагъистан ва район гьаладяхI ардукес багьандан халаси къайгъиличил рузнилис чумал ХIурматла Грамоталичи, Баркаллала кагъуртачи лайикьрикили сари.
Ишдус РФ-ла Федеральное Собраниела Пачалихъла Думала депутат Н.НурбяхIяндовла шайзирад Баркаллала кагъарличил шабагъатларариб. 2016 ибил дуслизир «Совет муниципальных образований РД» бикIуси Ассоциацияла Председатель М.МяхIяммадовла шайзирад Грамоталичи ва 2018 ибил дуслизир ДР-ла БекIла ХIукму хIясибли «ДР-ла муниципалитетла кабизла хIурматла хIянчизар»-ибси уличира лайикьрикили сари. «Ахъушала район» МО-ла администрацияла шайзирад чумал ХIурматла Грамота дедили сари.
РФ-ла пачалихъла статистикала Федеральный кабизла шайзирад 2006-ибил дуслизир «За заслуги в проведении Всероссийской сельскохозяйственной переписи» ва 2010-ибил дуслизир «За заслуги в проведении Всероссийской переписи населения» бикIути медальтачил шабагъатларарили сари.
Ишдуслизир «Интербригада 1999г.» бикIуси ДРОО НО-ла советла Председатель, Командир, Генерал-майор М.МутIалимовла шайзирад «СВО-ла бутIакьянчибас кумек гIеббиахънилис» бикIуси медальличира лайикьрикиб.
Зубайдат Жалаловнани сунечи хъарси хIянчи бирули, сунела шила халкь-ургаб хIурмат сархили сари. Хьунул адамли шилис бекIдеш даресра гьамадли хIебургар. СенахIенну, шила халкьла ургар дахъал суалти дирар, илди арзес багьандан, гьарил сунечи дугьавизурси адамла къуллукъуни бекIдарес, илдала мурад барес сецад къайгъиличил узес гIягIнилил.
Биаллира, Зубайдат БяхIмудкьадиева ХIинтIала шилис бекIдеш дирес гIяхIил бажардириркули сари, районна администрацияла шайзирадра баркаллаличи лайикьрикили, жавабкардешличил сунела бузерила гьуни даимбирули сари.
Сунела гIямрулизир ва бузерилизир сархибдешуни имцIадикIаб, хIянчилизир гьамаддешуни диаб, сунела дигутани разирирули хIерриэс кьадарбиаб!
С.ГIябдуллаева
