ИшбархIи МяхIяч­къала шагьарла вете­рантала Совет­ла пикрила дайлаб саби дя­вила хасси балбуцла бутIа­кьян­чиби. Организацияла бузерила бекIлидиубти бяхIчи­бизуназибад цали бетаурли саби бургъанти гIеббурцни.
МяхIячкъала шагьарла ветерантала Советла председательла заместитель МяхIяммад Рабаданович БяхIяммаев бургъантас кумекра бухили чуйнара СВО-ла мер-мусаличи вякьунси сай. Илала цаибси архIя бетерхурсири 2024 ибил дусла декабрьличиб Донецклизи. КIинайс 2025 ибил дусла февральличир ва мартличир Лугансклизи, гIур сагадан Донецклизи архIяби дурадеркIибтири. Лерилра хIисаблизи касалли, дявила хасси балбуц бетурхуси мер-мусаличи илис урчIемна укьес кьадарбиуб.
АрхIябазибад цализиб МяхIяммад Рабадановичли, Жамалудин Рабазановичличил ва жагьилси водительличил барх кумек гьуниббалтулри. Илдас Россияла бургъантачил барх блиндажлизиб дуги беркIес чебуркъуб. Савли, илди архIяличи дурабухъес хIядурбиубхIели, саби лебти мер-мусаличир сари-сарил урцути гIягIниахълуми (беспилотники) хIисабдиуб – авал дронни блиндажличи бяхъ чегахъиб. Кьурбунти хIедиубли, берцибтири. Урехи лебниличи хIерхIеили, бургъанти гIеббурцнила шайчибси хIянчи даимбиубли саби.
«Нушани бегI гьалабси яргализир бургъантас гьарли-марли хIяжатти секIал дихулра. Гьала хили бургъантачил бархбасуни кадизахъурли, илдас се гIягIнилил балулра. Сепайда, мурталра-декIар сурсатуни диули ахIен, амма нушани дирусигъуна кумек гIеббаахъес къайгъибирулра», — цIакьбарили буриб МяхIяммад Рабадановичли.
Донецклизи аркьухIели, блин­дажуни дарес хIяжатти материалти, бекIахъудила шуртI­разир пайдаладирути ма­сани, бургъанти дигIян­бир­кахъес хасдарибти (маскировочные) сетани ва цархIилти секIал духибтири илдани.
ДухIнарти къуллукъунала органтазив халати устадешличил узули калунси милицияла полковник, Дахадаевла районна УргIерила шилизивадси МяхIяммад БяхIяммаев дебали бархьдеш дигуси, мурталра ил гIеббурцуси, гъабзадешчевси адам сай. Сунела игитдеш илини 1996 ибил дуслизир, Первомайсклизиб дихьалис адамти буцибхIели ва 1999 ибил дуслизир халкьани-ургабти къачагъунала ярагъладиубти кьукьни Дагъистайзи духIнадерхурхIели чедаахъибтири. Илала сипта хIясибли ветерантала Советла жигарчебти бутIакьянчибани маскировочный сетани, хандакьуназир пайдаладирути шямани далкьарахъули сари, бургъантас кумекуни цаладирхъули сари. Ил вирхули сай гьарил кумек бургъанти гIеббурцнилизи ва илдала гIямру уцахънилизи мягIничебси пай биъниличи.
Гьарил ветеранни ил шайчиб сунени вирусигъуна хIянчи дурабуркIули саби: цали ванати палтар дурхьули сари, цархIилли – берк-бержла продуктуни, илхIелира чула халали ахIенти пенсиябачи ва сурсатуначи хIерхIеили.
МяхIячкъала шагьарла ветерантала Советли халаси баркалла балахъули саби шагьарла бекI Жамбулат Шапиевич Салавовлис ва «МяхIячкъала шагьар» шагьарла округла депутатунала Собраниела председатель Хиби Кьурбанович ГIялиевлис бургъантас кумек цалабирхънилизир ва бурхьнилизир бутIакьяндеш дирнилис. Хаслира баркалла депутатунала Собраниела председательла кумекчи ГIямар Рабазанович Арсланбековлис, суненира СВО каберхайчи МяхIячкъалализиб кумек цалабирхъяхъес пунктлис хъали матъал декIарбарибси, илкьяйдали илини кумек Луганскла ва Херсонна областьлизи биахънила шайчирти харжанира сунечи чекасиб. Бургъантас хIяжатти масани иснилизир илини икьалабирули сай.
Иличил варх уржили узули сай илала узи – Жамалудин Рабазанович Арсланбеков, ветерантала Советла член, ветерантас кумек гIеббиахъуси «Асилдеш» бикIуси гIяхIбаркьла фондла председатель. Ил, урехи лебниличи хIерхIеили, чуйнара кумек гьуниббалтули вашуси сай.
Пикри бяхIчихIеэс хIейрар ДР-ла ЖамигIятла палатала эксперт Рабадан Сагид­бяхIям­ма­дович МяхIям­мадовла бузериличи, суненира цаибти бурхIназибал СВО-ла мер-мусаличи кумек бурхьнилизир бутIакьяндеш дируси.
Кумек цалабирхънилизи халаси пай кабирхьули саби ветеранти Муслимат ГIябдул­кьадировнани — МяхIяч­къа­­ла шагьарла бекIла кумек­чи ва Аида Мутаевнани — МяхIячкъала шагьарла вете­ран­тала Советла секретарь. Ил­ди ил хIяракат гьалабяхI ба­шахъуси бекIлибиубси цIакь­ли­зибад ца саби.
МяхIяммад Рабаданович­ли илкьяйдали баркалла ба­ла­хъули саби «Нушалати лайхIебикIехIе» бикIуси кумекчибала кьукьялис бекIдеш дируси Заремас ва илала пикруми гIердурцантас. Кумекчибани маскировочный сетани, хандакьла шямани далкьарахъули сари, бургъантас ванати палтар ва берк-бержла масани дурхьули сари. Заремала гъай хIясибли, гIяхIбаркьла хIяракатлизи ахъахъес ил Дагъиста бургъантала гъабзадешли гьуцIрарибси сари.
Ил шайчиб дебали халаси хIянчи бирули саби багьудила учреждениебала руководительтани, илдала лугIилизиб — 56 ибил гимназияла директор Раисат МяхIяммадсягIидовна ГIязизовани ва 11 ибил гим­на­­зияла директор Зугьра ЯхIъя­евна Дибировани, ил­кьяйдали педагогунала коллективтани, школабала бучIантани ва илдала бегIтани. Илдани гьар бархIилизир хIяжатдиркути масани цаладирхъули сари ва, кагъуртира дарх кадихьили, бургъантас дурхьули сари.
МяхIяммад Рабадановичла бузерила бекIлибиубси мурад СВО-ла бутIакьянчибала рухIла дебадеш уржахъни. ВатIан балтахъантас кумекбарни — цахIнабси баркьуди саби. Ил багьандан ветерантала Советли учреждениебала, предприятиебала руководительти, бизнесла вакилти ва шагьарла лебилра адамти ил бузери гIеббуцахъес жибирули саби.
МяхIячкъала шагьарла ветерантала Советла председатель Ферезулла Кахримановли бирхауди бирхьули саби бургъантала гьала тIашдатурти лерилра мурадуни ункъли хъарарахъниличи, дявила хасси балбуц каберхурли гIергъи, жамигIят сагаси даражаличи дурабулхъниличи, сунезибра ветеранти ВатIайс къуллукъбирнила гIяхIси гIибратли бетарниличи.

ГIялигъалбицI ХIусейнов,
«МяхIячкъала шагьар» шагьарла округла Жагьилтала парламентла председатель