Арбякьунси сут бархIи, февральла 28-личиб, Америкалира Израильлира гIярабла улка Иранничи ракетаби ва бомбаби чекьур. Иранна тах шагьар Тегераннизиб ва цархIилти шагьуртазиб гIяхIцад адамти алхун. Илдала лугIилизиб — лебилра дунъяличив урибси бусурман динна хIяракатчи ГIяли Хаменеи, гIярмияла генштабла начальник ГIябдулрахим Мусави, оборонала министр Назиз Нарсизаде ва цархIилти. Илкьяйдали алхун хала дудеш ГIяли Хаменеичи гIяхIладли ракIибси ца дусцун риубси Загьра, илала неш ва дудеш.
Иранна Хормозган провинциялизибси Минаб шагьарличи игьубти ракетабазибадси ца рурсбала школаличи чегили, 165 бучIанна гIямру къябаиб.
Америкали ва Израильли Иранничи къаршити дявти дехIдихьнила цаибси ва бекIлибиубси мурад Иранна пачалихъ агарбарни сабри. ХIера, Иранничи ишдигъунти тIалабунира дуили сари илдала: Иранна ядерный ярагъ агардарес, улка бузахъути лебилра хIякимти барсбарес, ил улкализир адилтIути набтла ихтияр чузи буцес ва ц..
США ва Израиль 2025 ибил дусла июнь базличибра Иранничи чебухъунтири ва, ишар ядерный ярагъ лер бикIули, чули пикрилизи касибти мераначи 12 бархIи бомбаби игьубтири.
Америкала президент Трамплис, Хаменеи агарваралли, Ираннизирти лерилра анцIбукьуни цугдиркур бикIуси пикри башули буили саби. Хаменеичи къаршити лебилра цалабикили, пачалихъла ургьур чула някъбази бурцу ибси пикрира буили саби илала. Вашингтоннисра Трамплисра ил буили саби гIягIниси. «Хаменеи вебкIниличи Ираннизибти бахъалгъунти адамти разибикили саби… Дила паргъатдеш ил анцIбукьли хIебулъану, ну ил секIайчи разилира. Нуни бируси бархьсира саби. Нуни пикрибарибси секIал гIямрулизиб бетурхусира саби», — викIули сай Хаменеи алхниличила багьурси Трамп.
Иш анцIбукьлизир Трампла пикруми гьардизурли ахIен. Илди ургIертили диуб: Хаменеи жазаъ чейсаннизи (мученик) халварили, бахъалгъунти Иранна халкь чула рухIла гьавкья кавшибтас чеббицIес къайгъназиб саби.
Арбякьунси даршдусла 80 ибти дусмазивра Хаменеи кавшес кьасбарибсири. Сен гьатIи, сай кавшес кьасбарни балукъира, ил дигIянхIейкибсири? «Илис сай бегIлара увяхIси, гьимикар адамли кавшили дигусири, — викIули сай илала уршила урши Сейед ГIяли. — Ил сунегIебли башути цалабяхъес или пикриикIули уилри». Ил пикрира бетерхур.
Иранна ярагъладарибти цIакьанани Израильла шагьуртачи цIа чекьур. Илдани ракетаби игьуб ОАЭ-лизирти, Катарлизирти, Кувейтлизирти, Бахрейннизирти Америкала дявила базабачи, имцIаливан Бахрейннизибси Америкала Шуибил флотличи. Америкала ва Англияла хIябал танкерличира бомбаби игьуб. Америкала самолётуни дихан (авианосец) «Авраам Линкольн», Иранни сунечи ракетаби дархьили гIергъи, Индийский океанна шайчибяхI бебшиб. Иранна аятуллани Америкалис ва Израильлис гъазават (дурхъаси дяви) багьахъурли саби. Иранна президент Масуд Пезешкитан «душмантази умутагардеш балахъас» викIули сай. Вархьли викIули виэсра асубирар: Иранна дахъал ярагъ дихути ракетаби ва БПЛА-ни лерти сари.
Россиялира Китайлира Америкали Иранничи къаршили чябхъин дураберкIниличи кьабулагардеш балахъули саби. Илдани ООН-низиб, ил суал арзес багьандан, урехи хIебирахънила Советла заседание дураберкIни тIалаббирули саби. ЧIянкIли чули Ираннис бируси кумекличила гьала хили балахъули ахIен. Ил бижгурдеш дявти агарли низамличи бушес гIягIниси саби бикIули саби.
Россияра Иранра дяви бузахънила шайчибси вягIдала бутIакьянчиби (стратегические партнёры) саби. Иранни, чус къияндикили, се тIалаббаралра, Россияли ил чараагарли бируси саби. Тяп илгъуна Иранна вягIда Северная Кореяличилра Китайличилра лебси саби. Амма иш анцIбукьлизиб Россия США-личи ва Израильличи къаршили дергълизи кахIебурхар, сенкIун Россияла Иранничил дергълизиб кумекбирес ибси вягIда агарси саби. Нуша дергълизи кадухъахъес Тегеранни сари къаршидеш дирутира.
ЧевяхIсини кумекбараб Ираннара Америкалара ургабси бижгурдеш хIебиахъес.
ХIяжимурад Ражабов
