Гьалабра белкIунси саби нуни иш темала чебкад макьала. «Нуни телефонти урхамтази лукьахъира», — бикIусири илис. Ил дила жузлизира каберхахъурси саби. «Дузахъес хIебалутас телефонти гIягIнити ахIен» сабри илала бекIлибиубси мягIна. Бурес чебиркур, нуша дахъалгъунтани телефон селис гIягIнисил балули ахIенра или.
ИшбархIи нуни лукIуси биштIаси макьалализибра наб бурес дигуси ил саби. Бархьси саби, бусягIятла замана нушала гIямрулизиб телефон мягIничебси, чараагарли гIягIниси секIал биъни. ЦацахIеликIун «кисалаб телефон хIебиалри, се бирусири нуни» ибси пикри башули бургар нуша цацадехIтала бургази.
«Селра камхIебири, — саби илис дила жаваб. — Калунрагу нуша шимазир ца яра кIел телефонна аппаратличил, почтала отделениелизибра шила советла яра колхозла конторализибра. ИтхIелира нушаб селра камхIебиуб».
Гьанна телефонти гьарилла някъбазир лер.
Дила уршила урши верхIел дус виубси Жамалла кIел телефон лер, ца чула Каспийсклизибси квартирализиб, итил – нуша хала дудеш ва хала нешличиб МяхIячкъалализиб. Илини, жумягI бархIи вакIили, нушачиб дуги буркIуси саби. Ил нушачи вакIайчи хала нешли телефон хIядурбируси саби. Ил хIязтавиркьахъес. Наб биалли дигахъаси ил телевизорличи хIерикIули яра, касили сунечи хасси жуз, учIули. Нушачи гIяхIладли вакIибси урши, абзур дуги-хIери гIела хъули дигIяникили, телефоннизирти хIязаначи хIерикIуси сай. Или биалли, селис ил нушачи вашуси, чула хъуливра виригу телефоннизив виркьес. Илала халаси узи Данияллара тяп илгъуна саби хIянчи. Бухънабачи башути биштIати илдачил ихтилатбикIес гIягIнити саби.
БиштIатицуну гьатIи илдигъунти? Гьачам хъуливад хIянчила аркьуси нуни, телефоннизиб биркьули, гьунчиб башути адамти бейгIунра. Наб гьунчиб къаршибикибти вецIал хьунул адамлизибад верхIел телефоннизиб бархилри. ВецIлизибад — верхIел! ВиштIаси кайибси коляскаличил башути нешани бархли.
Гьачам нуни кьакьа байбяхъили, ветахъиркуси мерличир, гьалаб башахъули виштIаси ухIнабси коляска, телефоннизир риркьуси жагьси нешлис, «гьунчи хIеррикIенгу, дила рурси» викIули, гIяйиб барира. Ил, набчиряхI ласалра хIеряхъили, гьаларяхI ратрихьиб. Сари чегибси машинала вегI гьести гIямрула адам иличи вявухъун: «ХIед гIямру дитIили диалли, виштIасила гIямруличилра пикрирухъен, абдал тIакьа!» Жагьси нешли илхIелилра бекIалра ахъхIебуциб…
Наб хIянчилаб гIягIнихIебиркули биалри, нуни телефон някълизилра хIебурцаси. Телефоннизирад зянкъ дяхъесра набчи дакIибти зянкълис жаваб бедесрацун саби нуни балуси.
«Се дирути наб иларадти хIязани ва рекламаби?» – имцIали башар бекIлизи пикри. Наб илди, дитIили, цIудардиубли сари. БегIлара наб хIейгиилзуси адамра, маршруткаличи кайили, телефоннизивад ахъли гъайикIуси адам сай. Нуни иличибра халал культура агардеш цархIил селра хIебалас.
Наб гIурра бурес дигулра: «Вираслири, нуни лерилра телефонти урхамтази лукьахъира».
ХIяжимурад Ражабов
