ГIяхIти баркьудлуми дурадуркIнила мурадуни детерхахъес, ил хIяракатлизи бируцад бахъал адамти битIакIес, гIяхIдешуни дирахъес адамти гьуцIбирахъес ибси сипталичил апрельла 7-личибад 13-личи бикайчи «ХIебла гIяхIбаркьунала жумягI – 2025» бикIуси республикала даражала балбуц бетурхули саби.

Ил балбуц гIеббуциб сергокъалалантанира: Игитунала анхълизибси ЧебяхIси ВатIа дергълизиб алхунтас хасбарибси памятник, илкьяйдали дявила хасси балбуцлизир чула жан кьурбандарибти бутIакьянчибас дарибти уркьли къулайдариб. Илдигъунти далдуцунани нушала бургъантала игитдешличила ва гъабзадешличила, илдачила дурхъати гьанбикуни мяхIкамли дихIес гIягIнили биъниличила гьачам-гьатIи гьанбиркахъулира саби.

Балбуцлизир бутIакьяндеш дариб кумекчибани, «Цаибтала хIяракат»-ла бутIакьянчибани ва МФЦ-ла хIянчизартани. Илдала дархти цIакьаначил памятникуни-алавти мер-муса къулайси агиличи дикахъес, иличибли нушала хала бегIтала гьунартала хIурматбирнила гIядатунира мяхIкамдарахъес имканбикIур.

Сергокъалала районна багьахънибала центр