Ишдус ВатIан балтахъутала БархIилис хасбарибси шадлихъличиб ДР-ла Правительствола Председатель ГIядулмуслим ГIябдулмуслимовли микIхIен багьадурлис яргаличилси шабагъат бедиб. Ил сагаси шабагъат 2023 ибил дусла ахирличиб ДР-ла БекIли кабизахъурси «Гъабзадеш дакIударни багьандан» бикIуси медаль саби. Шабагъатличи лайикьикибси микIхIен урши, Избербашлизибти хала дудешличи ва хала нешличи вакIибхIели, набзира багьахъурсири.

Илала хала дудеш дила гъамси юлдаш АзибяхIянд МуртузагIялиев сай. Нура аркьусиригу АзибяхIяндла уршила урши Заличил тянишиэс, сепайда, бетхIеур. Наб иличил къаршивикес 2023 ибил дусла февральличибра кьадархIебиубсири. ГIур Зали бегIтачи шадив вакIибхIели, нуша иличил чараагарли къаршидикес гIягIнитира.

Дила макьалала игит АзибяхIяндла урши Шамильла урши Зали сай. БусягIятла замана медицинала къуллукъла капитан Зали Шамильевич МуртузагIялиев Санкт-Петербурглизибси С.М.Кировла уличилси Дявила–медицинала академиялизив, ординатурализив учIули сай. Илаб илини дявила хирургла санигIят кайсуси саби.

Зали МуртузагIялиев акIубси сай 1998 ибил дуслизив  МяхIячкъалализив ва илав халаваибси сай. 2015 ибил дуслизив ил Санкт-Петербурглизибси Дявила-медицинала академиялизи учIес керхур. БелчIуди таманаибхIели, Читала областьлизив гIярмиялизиб къуллукъбирули калун.

Дявила хасси балбуц бехIбихьибти цаибти бурхIназивал Зали илаб къуллукъбирес арякьун. Илини къуллукъбирусири Киевла, Изюмла, Южнодонецкла, Угледарскоела бяхIчибизуназиб. Илав гвардияла лейтенант Зали МуртузагIялиев дявила бригадала медицинала кабизла начальникли вирусири.

Зали МуртузагIялиевли ца гьужумлизиб душмантани минабани буцибси авлахъличибад 18 нушала бяхъибти, сунечиб 700 метрла гьарахъихIи гечбарибтири. Урехиагарси мерличи ваибмад, илини бяхъибтас цаибси медицинала кумекра гIеббиахъусири. Илав ил, баргбердибси минала бургIяла чегили, вяхъибсири. Ил анцIбукьлизир дакIударибти гъабзадеш багьандан, Зали Шамильевич МуртузагIялиевлис Гъабзадешла орден бедибсири.

Зали МуртузагIялиевла цархIилти шабагъатунира лерти сари. Илдала лугIилизир медальти: «Гъабзадеш багьандан» («За отвагу»), «Улхути берцахъни багьандан» («За спасение погибавших»), «Дявила хасси балбуцла бутIакьянчи» («Участник СВО») ва нуни макьалала бехIбихьудлизиб гьанбушибси ДР-ла БекIли кабизахъурси «Гъабзадеш дакIударни багьандан» («За проявленное мужество») медальра.

Ишдус нушала Зали гIямрула 27 ибил дуслизи ухIнавхъи сай. Ириъ ил сунечил рарх Дявила-медицинала академиялизир ручIуси урус рурси Анастасиячи хъайчикайибсири. Дявила хасси балбуцлизиб Анастасиянира бутIакьяндеш дарибти сари. «Улхути берцахъни багьандан» ва «Дявила хасси балбуцла бутIакьянчи» бикIути кIел медаль илалара лерти сари. БусягIят илра сунела муруйчил рарх Дявила-медицинала академиялизир ординатурализир ручIули сари.

Чедибра буриливан, иш яргалисра наб Заличил къаршиикес имканхIебакIиб. Амма нуша телефоннизирад ихтилатдикIули гIяхIцадхIи калунра. Ишаб наб бурес дигулра, набчи дугьавилзухIели, Зали наб «дядя Мурад» викIусири или. Илала дудеш Шамил вархли наб «дядя Мурад» викIуси сай. Сунела дурхIни набчи ил тяхIярли дугьабилзнили, дила пикрили, АзибяхIяндличилти дила юлдашдеш гьатIира гъамдирули сари. Наб ил дебали гIяхIбилзулира саби. Нуни Заличи уркIи-уркIилабад пахрубирулра.

Гьари, дила белкIлизиб ишди бурхIназиб нуни Заличил телефоннизибад барибси ихтилат газета бучIантасра гьалабирхьисра.

— Салам, Зали. Мубараквирулри хIу сагаси шабагъатличил. БетхIеур кьалли нушаб иш яргалисра къаршидикес. Дила пикрили, дила юлдаш АзибяхIянд ургар ишав гIяйибла вегI.

— ВагIялайкум салам, адавзи Мурад. Вари,вари, хала дудеш гIяйибла вегI варес цугхIебиркур. Ну жумягI бархIи бегIтачи хъули вакIибсира. АлхIят бархIи Питерлизи чарухъес гIягIниси саби. ГIур ну хъули вакIибхIели, чараагарли къаршидиркехIе.

— Дахъал лертири дила хIези хьардаэсти суалти, Зали. Амма илди гIурхIейс датес чевкъули саби. Нушала газетализи хIечила цагьатIи макьала белкIес дила пикри лебну, дила чумал суаллис жавабти гес кьасбара, —  викIулра ну.

— ХIела гьарил суайс нуни жаваб чарбалтас, адавзи Мурад, — иб илини.

— Дявила тухтурла хIянчи хIед сен билзули? ГIядатла тухтурла хIянчилизибад ил селичибли декIарбулхъусив? – хьарикIулра ну.

— Лебтанилра балуси саби, гьарил тухтурли зягIипсила гIямрулис жавабкардеш дихути диъни, амма дявила тухтурли илди жавабкардеш гьатIиралра имцIали дихути сари. ЦацахIели, вяхъибси ургъанна гIямру дерцахъес къайгъилизивси дявила тухтурли вегIли вегI урехилизи виркахъули вирар. Медицинала академиялизир дучIути нуша иличи хIядурдирутири. Дявила тухтур сунени бируси хIянчилизив буцалачевси ва дирхала бихьеси адамли виэс гIягIниси сай. Илини къияндикибси мерличив юлдаш вархьвалтуси ахIен, кумек гIягIнисилис мурталра кумекла някъ гьабалтуси саби, — таманси жаваб гиб Залини.

— ЦагьатIи суал, Зали. Сегъуна барсдеш акIахъуба хIела гIямрулизиб дявила хасси балбуцлизиб бутIакьяндеш дарес чебуркънили?

— СВО-лизиб бутIакьяндеш дарайчи ну декIарси адам сайри. Тамай декIартири дила гIямрула пикрумира. Дявила хасси балбуцлизив калунти кIелра байхъалара дусли дила гIямру лутIи-хьулчилизирад дарсдариб. Адам мурталра адамли калес гIягIниси биъниличила нуни дявила майдайчиб аргъира. Адамдеш, хIела бегIтала хIурматла у умули хIердарес гIягIнили биъниличилара аргъира. Адам юлдашунала гьалав урузхIейэсли, адаб-хIяяличил шикьвикIес хIяжатси саби. Ну гIярмиялизив халавиънила гьуни илгъуна бетаур. Амма дила тухумтас ва юлдашунас нуни илгъуна гьуни хIебулгас. Вирхулра: ахирличирра гьар секIал чула мерличи диркур, ва иш яргалисра нуша чедидиркехIе! Честь имею! – тамандариб Россияла гIярмияла капитанни дурути.

ХIяжимурад Ражабов