Ассаламу гIялайкум, дарганти!

Дила жявхIейчибад ца пикри леб: дарган мезла ца халаси словарьлизи лерилра лугъатуни цаладяхъес. Илгъуна хIянчи барес багьандан, лерилра даргала лугъатуначи шурдатурти дугьби дучес гIягIнили саби. Ил шайчиб нуни камси хIянчи барира, амма тIашаэс чебуркъуб, сенкIун, Москвализив хIерирухIели, гьарахъларад илдигъунти баянти дурчес къияннири.

Ил багьандан хIуша илгъуна халаси баркьудилизир бутIакьяндеш дарахъес жидирулрая, сабира гьар шиличи, лугъатличи ва нушазивад гьарилличи къячбилкуси.

Се барес хIяжатли?

Нушала нешла мез мяхIкамдарес ва давлачердарес багьандан, нушаб цаибил яргализиб мухIлили ирути лугъатла дугьби делкIес гIягIнили саби, цархIилван бурасли, хала нешличилси яра хала дудешличилси ихтилат видеоличи яра диктофонничи белкIес гIягIнибиркур.

ЧIянкIли илданицун бирар гьачамлис я кагъуртазиб, я цархIилти техникала сагати гIягIниахълумачиб агарси нушаб гес. Ил барес багьандан, урус мезли делкIунти дугьбачилти таблицаби («Сводешла» сияхIгъунти) халатани дурибти лугъатла дугьбани дицIахъес гIягIнибиркур. Урус мезли делкIунти дугьбачилти PDF жураличи душибти таблицаби нушала «Замана» газетала редакцияли гьаладихьили дирар.

ЦагьатIи тяхIяр леб — компьютерличиб урус мезла дугьбачилси EXEL-таблица абхьили, ила лукIес. Ил тяхIяр биалли, компьютерличиб кьяйда, телефонничибра бузахъес вирар.

КIинайс илди лерилра баянти пайдаладарили, телефонна приложение алкIахъуси саби. ХIера, илкьяйда нушани давлачерти дарган мез мяхIкамдарес дирехIе.

Чебетаахъибси хIянчи барес багьандан, нушаб дарх дузес хIяжатли саби. Илкьяйдали дузахIеллицун, дирехIе нушани замана пайдаличил харжбирес. Илис биалли нушаб бузерила ца кьукья цалабяхъес хIяжатли саби, сунезир даргала гьар лугъат хIясибти диштIати кьукьнира лерси.

Эгер хIуша-ургав илгъуна дебали мягIничебси проектлизир бутIакьяндеш дарес иштяхIла вегI лев виалли, нушала командализив ил чейэс разили дирехIе!

Дигули виадли, иш QR-код хIясибли, проектла бузерила кьукьялизи кархес вируд.

ГIябдуряхIман ИсмягIилов