Ахъушала культурала управлениелизиб бузути бахъал пагьмучебти гIяртистуни леб, сабира касибси санигIятлис марли, чучи хъарси хIянчи даимбирули, адамтас разидеш бихули бузути. Районнизир ва илала дурар детурхути республикала кьадрила шадлихъуназир илдани жигарла бутIакьяндеш дирули сари.

Ахъушала районна миллатла культура гьалабяхI арбукес багьандан халаси бузерила пай кабирхьули саби ХIямшимала шилизибадти рурсби — Пирдаус ХIяжимяхIяммадовани ва Кумсият ГIяхIмадовани.

ДурадуркIути шадлихъуначир ва байрумтачир илдани жагати далуйти зайдулхъахъули дирар. Илдани районна духIнарти учреждениебачил бархбас бузахъу, Ахъушала краеведческий музейлизибра гьар замана чебаэс вирар, илар детурхути шадлихъуназир бутIакьяндеш диру, гьарахъти мераначи архIябира дурадуркIу музейла хIянчизартачил барх.

Илдани фестивальтачир, конкурсуначир гьаларти мерани дурцули сари. ДР-ла культурала Министерствола, республикала халкьла пагьмуртала Юртла, «Ахъушала район» МО-ла администрацияла ва культурала управлениела шайзибад дипломтачил, ХIурматла Грамотабачил шабагъатлабарили саби. Республикала кьадрила «Душа Дагестана» бикIуси премияла лауреатра сари Пирдаус ХIяжимяхIяммадова. Кумсият ГIяхIмадова ва Пирдаус ХIяжимяхIяммадова «Дагъистан Республикала культурала урибси хIянчизар» ибси уличира лайикьбикибти саби.

МалхIямти, балгунти, пагьмучебти, халкьла ва чула коллективла ургаб халаси хIурмат сархибти культурала хIянчизартани гьаннала гIергъира халкьлис разидеш бихули, чула бузери даимбиру.

Сабият ГIябдуллаева