Ишди бурхIназив МяхIячкъала шагьарла ветерантала Советла председательла заместитель МяхIяммад БяхIяммаев «Ветерантала хIяракатлизир сархибдешуни багьандан» орденничил ва ил Союзла ХIурматла Грамоталичил шабагъатлавариб. «Ветерантала хIяракатлизир сархибдешуни багьандан» орден Россияла ветерантала Союзла бегIлара хIурматла шабагъат саби.
МяхIяммад БяхIяммаевлис илди шабагъатуни дедибти сари, жагьилтас дявила патриот бяркъ бедлугни багьандан ва Дагъистайзиб ветерантала Союз бузахъес барибси хIяракат багьандан.
МяхIяммад Рабадановичли Дагъистан Республикала шайчибси Россияла МВД-лизиб 30 дусиличиб имцIали хIянчи барибси саби. Милицияла подполковник МяхIяммад БяхIяммаев 1996 ибил дуслизир Къизларлизир ва Первомайсклизир, 1999 ибил дуслизир Новолакла районнизир кадикибти дявила анцIбукьунала бутIакьянчи сай. Илини Россияла МВД-ла ва оборонала Министерствола ведомствобала даарицад шабагъатуни касибти сари.
МяхIяммад Рабаданович БяхIяммаев акIубси сай Дахадаевла районна УргIерила шилизив. Илини УргIерила шилизир зилантачил варх сунела дурхIядешра жагьдешра деркIибти сари. Илаб илини школара таманаибси саби. ДГУ-ла филологияла факультет хъараахъурси МяхIяммад БяхIяммаев Дахадаевла районна Зильбачила школализив урус мезла ва литературала мугIяллимли узули калунсири.
Амма 1980 ибил дуслизиб илини мугIяллимла санигIят милиционерлайчи барсбариб. ИлхIели МяхIяммад БяхIяммаев Тарумовский РОВД-лизив участокла инспекторли узес вехIихьиб. Илав ил, сунечи хъарси хIянчи чебетаахъили бирули, 12 дус калун. Илди дусмазир илини хIянчила устадешра имцIадариб ва юлдашунала хIурматра сархиб.
1992 ибил дусличивад гьаб-гIергъили 20 дусцадхIи М.БяхIяммаев жамигIятлис урехи хIебирахънила хIяракат гIеббурцули, духIнарти къуллукъунала отделла начальникли узули калун. Районна милицияла начальникла хIянчи илиниван жавабкардешличил бузахъути нуни цархIилти адамти хIебалас.
ИтхIели Тарумовский районнизиб имцIали хIербирути урусла миллатла адамтири, ил багьандан гьамадли ахIенри цархIил миллатла адамлис районна духIнарти къуллукъунала начальникли узес. МяхIяммад БяхIяммаев ил къулукъличив узули калун. Ил районнизиб хIербирути адамталара илини халаси хIурмат сархиб.
ИтхIели Тарумовский районнизир дахъал такьсирчидешла анцIбукьуни кадиркутири: къалмакъарла, хъям-кьацIла, автомобильти дилгIнила. ДиштIати ва халати вегIдешла хIяйвантикIун, хIункьрадли дигIи, цархIилти районтази ардикули, делгьи деткайхъахъутири. Районна милицияла начальникли лерилра илди хIянчи заманаличир бекIдирутири.
1996 ибил дуслизиб Чечнялизибадти къачагъунани, Къизларлизи бухIнабухъи, больница ва дурхIни биркьахъуси отделение дуциб. Илдани шагьарла администрациялизиб бузути хIянчизартира буцибтири. ИлхIели Къизларла мякьлабси Тарумовский районнизиб МяхIяммад БяхIяммаевли бекIдеш дируси милицияла хIянчизартала отряд къачагъуначи къаршили дурабухъун. Илдани ва унра районтазибадти милицияла отрядунани къачагъунани больницализиб дихьалис буцибти адамти азадбатес халаси къайгъи барибсири. Укабиибти къачагъунани хабарагарли баргаибси гранатала гурла тIамали МяхIяммад Рабаданович декIли гарчкайахъуб. Илала бекIла мехIеличира вайла шайчиб асарбариб. ГIурхIели илди МяхIяммад Рабадановичла дявила дяхъилизи халбарибти саби.
Госпитальтазив кали, арадеш къулайбарибси МяхIяммад БяхIяммаев сунела хIянчиличи чарухъун. 1999 ибил дуслизиб илини Новолакла районнизиб халкьани-ургабти къачагъуни бухIнаберхурхIелира илдачи къаршиси хIянчи бузахъусири…
2011 ибил дуслизив гIяхIцад хIукуматла шабагъатуначи лайикьикибси, пенсияла дусмачи ваибси дявила ветеран МяхIяммад Рабаданович БяхIяммаев сунени бузахъуси къуллукъла хIянчиличивад арякьун.
Бурасли, М.БяхIяммаевла кьисмат Тарумовский районничил дебали бархбасунси саби. Илав алхунсири илала 30 дус виубси Расул бикIуси урши. Расул ил районна больницализив уркIила излумала тухтурли узусири ва, ЧебяхIси ВатIа дергъла ветераннис кумекбирухIели, вебкIибсири.
Дагъиста духIнарти къуллукъунала бузерилизи МяхIяммад Рабадановичли кабихьибси пай пикрилизи касили, нушала хIукуматли илис дахъал шабагъатуни гибти сари. Илдала лугIилизир «Асилдешличил къуллукъуни тамандирни багьандан» бикIути хIябалра даражала МВД-ла медальтира.
БусягIятла заманара МяхIяммад Рабаданович жамигIятличил бируси хIянчилизи жигарчевли вархили сай. Тарумовский районна саби гIяхIъулали бургъути халкьла (ополчение) командирли вируси Россияла ветерантала Союзла председательла заместитель МяхIяммад БяхIяммаевли бусягIятра жагьилтас патриот бяркъ бедлугнила хIянчи дурадуркIули сари.
МяхIяммад БяхIяммаев Украинала мер-мусаличиб бетурхуси дявила хасси балбуцлизир бутIакьяндеш дирути нушала бургъанти гIеббурцули, илдас кумек бихулира вашули вирар. ХIера, илдигъунти адамтани ахIену, гьатIи, бургъантала гьав ахъбурцуси?
Гьалабванра МяхIячкъалализибад бургъантас кумек бархьибсири. Ил хIядурбарибсири тах шагьарла ветерантала советли, «Асилдеш» («Доблесть») бикIуси
гIяхIбаркьла Фондли ва «Ихтилат» («Диалолог») бикIуси центрли.
ГIяхIти баркьудлуми дурадуркIес хIебумсути адамтала лугIилизивадси сай МяхIяммад Рабадановичра. Баркалла биаб сунес!
ХIяжимурад Ражабов
