Дагъиста культура — нушала цаси давла саби, сунезира республикала халкьла бегIлара дурхъати гIядатуни кадурхути.
Дагъиста культура — някъла устнала пагьму, мурул адамтала гъабзадеш, хьунул адамтала мардеш, халабетаибти адамтала пасихIдеш сари.
Мез — культурала дяхIимцIала сари, суненира халкьла гIякьлула бетуц, миллатунала хасдешуни, гIядатуни ва дурхъадешунала къиликъуни чедиахъуси. Ил багьандан Дагъиста гьарил миллатла адамтани чула культура, мез ва гIядатуни мяхIкамдирес гIягIнити сари.
Нушани балуливан, октябрьла — 21 Дагъиста культурала ва мезанала БархIи саби. Ил бархIи республикализир дахъал жура-журала далдуцуни дурадуркIули дирар.
ХIера, ил БархIилис хасбарибси балбуц бетерхур Сергокъалала районна бекIлибиубсигъуна библиотекализибра. Илаб Курскла областьлизибадти ва арадешлизир нукьсандешуни лерти дурхIначил гьунабаъни бетерхур. Илар бутIакьяндеш дариб: жагьси поэтесса Салима ГIисаевани, «Улыбка» бикIуси инклюзивная хореографияла ансамбльла бутIакьянчи МяхIяммад МугIидовли, районна жагьилтала къуллукъунала шайчивси специалист Мурад Мусаевли ва цархIилтани.
Салима ГIисаевани сунени цахIнадяхъибти назмурти делчIун ва бакIибти гIяхIлас сунела жузи пешкешдариб.
ГIяхIлачи саламтачил дугьаизурси Мурад Мусаевли балбуцла сиптакартас баркалла багьахъур ва ил журала балбуц районнизиб бегI гьалаб бетурхниличила буриб.
ДурхIнала пагьмуртала Юртла хIянчизартанира балбуцлизир жигарла бутIакьяндеш дариб: Загьидат ГIябдуллаевани ва Нурият ХIяжигIялиевани кьалтинти дирнила шайчибси устадешла дарс дураберкIиб, Наида ГIумаровани биалли — суратуни дирнила искусствола.
Илкьяйдали балбуцличи бакIиб — «Цаибтала хIяракат» цахIнабикла бутIакьянчиби ва гьаркьяси специалист Сарат МяхIяммадова. Илини чула цахIнабикла бузерила баянти къантIли дуриб ва арадешлизир нукьсандешуни лерти дурхIнас, илдала бегIтас савгъатуни дедиб.
Библиотекала хIянчизарти дебали ункъли балбуцличи хIядурбиублири: Дагъистала халкьла бекIахъудила гIягIниахълумала ва даргала поэтуни-писательтала жузала выставкаби гьаладихьиб, виштIаси дурхIя сирила каркьнила гIядат чебаахъиб ва миллатла хурегуни хIясибдарахъиб. Ил шадлихъ гьанбиркахънилис сабабли детарути савгъатунира дурхIнас пешкешдариб.
Гьунибаънила сиптакар ретаур — «Кавказ» бикIуси хасси туризмала клубла руководитель Ирина Седельникова.
Асият ХIяжиева
