Совет хIукумат пашбехъубли гIергъи гьанбикеслири, адамтала уркIби чурхти детарар или. Амма иличи ургIебли узидеш, цалис цали кумекбарес дигути имцIабикIули саби. ГьатIира дигесили бетаурли саби вегI акIубти  мер-мусаличир шантас ва бакIибти гIяхIлас багаладиэсти баркьудлуми дурадуркIни.

ГIергъити чумал дусла духIнар Дахадаевла районна гIяхIцад шимазир, адамтани чула-чули гьундури далдариб, шин кадукиб, мижитуни дариб. Ил кирила баркьуди саби. Илдигъунти далдуцуни детурхур Зильбачила шилизирра.

Зильбачила ши машгьурси саби илалабад дурабухъунти пергер адамтачибли. Илдала лугIилизиб бурес рирус вахъхIила учитель, районна «Шила гIямру» газетала мухбир, гьарил балбуцличила газетализи лукIуси, гIямрулизивад шалгIевухъунси Ацци Каримов, шантачила мурталра пикрумазирси, лерилра далдуцуназир жигарла бутIакьяндеш дируси, сунела жагаси тIамаличил шантас далуйта ручIуси, жявли гIямрулизирад шалгIеррухъунси СайхIят Каримова, Россиялизив машгьурси Зайпулла МяхIяммадов, ва СВО-лизир бутIакьяндеш дирути шилизибадти уршби.

Дахъал сари шилизир дурадеркIибти, шантас багаладиэсти баркьудлуми. Илди детурхули сари жагьилтала кумекличирли. Илдала сипта хIясибли сабри шилизибси мижитла юрт тIашбатурси ва ила шин кадукибти. ГIурра илдани шила хIябри-алавси хIяри ва лац далдариб, шилизибси гIиниз къулайси агиличи бушиб, ва ила ляркьути шинна турбаби дарсдариб. БусягIят ши умути шинничил гIеббуцили саби.

Ишди бурхIназиб билхъа дураберкIили шила дурхIнас багалабиэси футболла майдан бетонни кабуцили балкьаахъур. ГIурра дахъал сари илдала хьуланира кьасанира. Ишаб бурес чебиркур, лерилра харжани шантани чучи чекасили сари. Макьалала ахирлизиб датурли чула хIянчира кумекбарес бакIибтас ва шила шантас халаси баркалла багьахъес дигулра.

Арати гIямру хIушаб! ХIушала баркьудлуми шантала уркIбазир мурталра кавлан.

Зильбукла багьадурти

 

Ца нешли баркьибтиван,

Саби-бухIнаб балгунти,

Варъа бурчу мирхъиван,

Баркьудлумас сакIубти.

 

ШуртIри гIяхIти диахъес,

Чула шилис бузути,

ГIяхIял-шайс уркIи гьаргти,

Бузерилизиб хъярхъти.

 

ХIердиаба хIулкIули,

Пергер шила жагьилти,

Дерхъаба-дахъдааба

Зильбукла багьадурти.

Цибац Маммациева