Дагъиста культура нуша лебталалра цахIнабси давла саби, сунезира республикала миллатунала бегIлара гIяхIтигъунти гIядатуни духIнадуцибси. Миллатунала мезанани, культурала дяхIимцIала сарливан, алавчарси дунъя сипатбирницунра ахIи, халкьла гIякьлу-дагьрила бетуц, илдала хасиятуни, гIядатуни, адаб-хIяяла къиликъуни, дурхъадешуни сипатдирули сари. Ил багьандан, гьарил миллатли чула мез, культура, гIядатуни мяхIкамли дихIули, чеалкIути наслубачи диахъес хIяжатси саби.
Дагъиста культурала ва мезанала БархIи, октябрьла 21-личиб, ДГПУ-лизиб «Дагъиста халкьанала мезаначил диктант» бикIуси республикала даражала балбуц бетерхур. Ил ДР-ла миллатла политикала ва динанала къуллукъунала шайчибси Министерстволи Р.ХIямзатовла уличилси Дагъиста пачалихъла педагогикала университетличил барх дураберкIибсири. Балбуцла мурад саби Дагъиста халкьла гIядатуни, мез ва культура мяхIкамли калахъни.
ДГПУ-ла Дагъиста филологияла факультетлизиб 14 миллатла мезличиб 300-цад адамли диктант белкIун. Гьар дус бутIакьянчибала лугIи имцIабикIнира дигеси саби.
Дагъиста цархIилти мезанала вакилти кьяйда, даргала миллатла вакилтира чула нешла мезла багьудлуми ахтардидарес цалабикилри. ДГПУ-лизиб ва илала хьулчиличиб акIахъубси колледжлизиб бучIути даргантани, школабала бучIантани, мугIяллимтани, преподавательтани ва цархIилтанира диктантличир бутIакьяндеш дариб. Диктантла текст белчIун ДГПУ-ла преподаватель МяхIяммадхIяжи Ильясовли. Ил бехIбихьес гьалаб М.Ильясовли нешла мезла кьадриличила буриб. Диктантла бегIлара риштIаси бутIакьянчи сарри МяхIячкъалала 37 ибил школала 4-ибил классла ручIан Зарина МяхIяммадова, М.Ильясовла рурсила рурси.
Вузлизиб бетерхурси балбуцличир миллатла политикала ва динанала къуллукъунала шайчивси министр Энрик Муслимовлира бутIакьяндеш дариб. Илини балбуцла мягIничебдешличила аргъахъиб.
«Мез адамла рухIла давла сари. Ил багьандан миллатла жузи дурайъниличи нушани халаси пикри бяхIчииулра. Нешла мез, халкьла культура ва хала бегIтала дурхъати гIядатуни республикала бекIлидиубтигъунти далилти ва бяхIчибизуни сари. Ил багьандан нушаб илди мяхIкамли дихIес ва гьаладяхI дашахъес хIяжатбиркур», — викIи Э.Муслимов.
Марлирагу, адамла гIямрулизиб нешла мезла кьадри халаси саби, сенахIенну илдала икьайчибли саби адамти-ургарти бархбасуни кадилзахъути, илдази багьудлуми кайсахъути, илди бяркъличи биркахъути ва культурала даражаличи абиркахъути. Илдала кумекличибли хала бегIтала гьар-урла гIямруличила, даргантала челябкьлаличила нушаб дурусли багьес имканбикIули саби.
Гьанна хIерикIалли шимазибти дурхIни булан урус мезличил саби гъайбикIути. Урус мез далнилизиб нуни селра вайси чебиули ахIенра. Илдала кумекличил цархIил миллатла адамлизи нушала пикри аргъахъес дирулра, лебил дунъяла культураличил, литератураличил, тарихличил тянишдиэс дирулра. Амма, вегIла нешла мезра далес чараагарли чебиркур. «Мез далуси мурдали, хIедалуси – хьурали» бикIуси бурала лебси нушала халкьла. Сецад мез дяркъялра адамли, илцадра ил давлачевсили вирар. Илди чисалра диргалахIедулхъан, багаладиъницун ахIенси.
Нешла мезра халкьла культурара гьаладяхI дашахъес багьандан, адамтазир ВатIайчи диги адикьес чебиркур, хаслира – чеалкIуси наслулизир. ИшбархIи ил масъала дебали мягIничебсили бетаурли саби.
Дарган мез мяхIкамдарни – лебилра даргантала чебла саби.
Диктант белкIи гIергъи, ДГПУ-ла азбарлизиб шадлихъла байрам даимбиуб. Илаб диктантла бутIакьянчибас миллатунала бизити хурегунала тIем багьес, жагати делхъ ва баркь-бацлизир жагадешлис пайдаладирути ваяхI чедаэс имканбакIиб.
ДГПУ-ла хIянчизарти миллатла политикала ва динанала къуллукъунала Министерствола шайзибад шабагъатлабарниличибли балбуц ахирличи бикиб.
ПатIимат Мирзаева
