ИшбархIи нушала улка мутIигIбакIахъес, жамигIят декIарбарес дигутани дявти-дугьби адилкьни чебиулра. Украинализиб бетурхуси Россияла дявила хасси балбуцлизиб, арагIебли улкала дурхIнани кьяйда, Дагъиста асилти уршбанира ВатIа хъархIерагардеш батахъес лерилра цIакьани дяхIчииули сари. Илдани гьар бархIи, чула жан хъябла дигьи, игитлати баркьудлуми дурадуркIули сари ва шанти, тухумти пахрули бирцIахъули саби. ВатIа хъархIерагардеш балтахъути гIяхIгъубзнала лугIилизивадси сай Сулайбан БяхIяммадовра.

Сулайбан БяхIяммадов акIубси сай 1999 ибил дусла сентябрьла 16-личив, Сергокъалала районна  ГIяймаумахьилизив. Шила школа таманбарили, Избербашлизибси лушнила (строительный) колледжлизи керхур. Ил белчIи гIергъи, ВатIа гьалабси чебла ахъес гIярмияла къяянази арякьунсири. ГIярмиялизибси къуллукъ таманбиубхIели, вягIда бигьи, Тамбов шагьарлизибси тупала гIяскарлизиб дявила къуллукъ даимбариб.

РФ-ла Президент В.Путинни Украинализиб Россияли дявила хасси балбуц бехIбирхьниличила багьахъурхIели,  С.БяхIяммадовли къуллукъбируси дявила бутIа ила бархьибсири. Сулайбай, гьаркьятала къяянази кайзурли, сунела гьала тIашдатурти дявила хъарбаркьуни ункъли тамандирули сай.

ВатIа хъархIерагардеш балтахъули, дявила чебла ихъухIели, гъабзадеш дакIударни багьандан, улкала Президентла ХIукму хIясибли, С.БяхIяммадов Суворовла медальличи лайикьикиб.

СВО-лизир бутIакьяндеш дирути лебилра мурул адамти, илдала ордентачи ва медальтачи хIерхIеили, нушани игитунази халбирути саби. Сулайбайчи ва илала дявила юлдашуначи Аллагьли сунела уркIецIи-ряхIму имцIадараб, лебилра нушала багьадурти чедибдешличил чула хъалибаргуначи арали чарбухъаб!

П.Мирзаева