Иш макьала Лавашала районна Сулайбакентла школала англияла мезла дурсри кадирхьули рузуси ХIясанова Рукьият ГIямаровначила саби.
АкIубси сари ил 1964 ибил дусла октябрьла 28-личир Ставропольла крайла Левокумскла районна Урожайное бикIуси шилизир. БехIбихьудла классуназир Бияшескла школализи рашули калун, кIинайс Каратюбинскла школализи шуррухъунсири. Ил 1982 ибил дуслизиб ункъли хъараахъур.
1984 ибил дусличибад МяхIячкъалала культпросветучилищелизиб «библиотекарь» ибси санигIят хIясибли белчIуди даимбарибсири. 1986 ибил дуслизиб ил таманбарили, ил дусличирад республикала тах шагьарлизир СПТУ-21-лизир библиотекала заведующаяли рузес рехIрихьибсири.
2008-ибил дуслизир илини Аида МяхIяммадовала англияла мез руркънила Центрлизир англияла мезла курсани делчIун. Дус дикили гIергъи, ДГПУ-лизир карерхурли, «Иностранный язык» санигIят хIясибли заочное отделениелизир ручIули калун.
«Мез ункъли дагьурли, кIинайс илди хъумартес вирару?» ибси суайс илини ишгъуна жаваб гиб: «ГIе, гьайгьайрагу, эгер илди мез хIедузахъалли, белкIани хIедучIалли».
Рукьият ГIямаровнас «мугIяллимли узес» ибти дугьби аргъес хIейгахъу. Илала пикри хIясибли, педагогикала хIяракатлизиб «узес» ибси дев пайдалабарни бархьси ахIен, сенахIенну ил жавабкарси хъарбаркь, уркIи-уркIилабад дигахъуси баркьуди биэс гIягIниси саби. МугIяллимли сунела бучIантачил барх илала гIямрула мягIничебси бутIа ихъули саби, ил гIевурцули, кумекбирули, пикривикIахъес бурсивирули сай. ИлхIели гьарил учIанни сунени, чилалра икьала агарли, жавабкардешличил дураберкIибси баркьуди мугIяллимла чедибдешли детарар.
Англияла мезла мугIяллим «кIила» кьиматунас кьиркьирси сари. Вайти кьиматуначи саби бучIантиван ахIи, ил дебали кьакьарикIули рирар. Илини учIаннис вайси кьимат кабатесичиб, дурхIяли хIергъуси багьахъес кумекбарни гьалаб чебиули сари. ИлхIели учIаннис къияндешуни ахъесра гьамадли бирар.
«ДурхIяла хIурматбирули, илала гъайла мягIна иргъухIели, ил биалли, хIечи кумекбарахъес дугьаилзалли, иличибли виштIасили хIечи бирхауди бирхьни багьесли бирар», — рикIули сари Р.ХIясанова.
Гьар мурталра ва сегъунти-дигара аги-кьяйдализир адамли кални дебали мягIничебси саби. Илди пикруми дирар илини сунела бучIантазирра адилкьути. Илини дурхIначи пахрубирули рирар, ишхIелла бучIантала баркь-бац далтIутачилра сеналра кьабулхIериркур. Школала кабиз секьяйдали барсбиалра, илала дайлав мурталра дурхIя виэс гIягIниси сай, сунечицун хасти хIял-тIабигIятличил ва пикрумачил.
Бузерила гьаркьянали ретаурси Рукьият ГIямаровнани сари-алав лебилра уржахъули рирар. Эгер сегъуна-биалра балбуц дураберкIес сиптакарси ретаалли, ил ахъси даражаличиб бетерхахъес цIакьани багьудлуми харждиру, алавчартира сунела разити хIяланачил ва масхуртачил «кIапIбурцу».
Адамтачи дигичерси, сунела санигIят ункъли балуси илала бархкьябанира халаси хIурмат бирули бирар.