Хайдакьла районнизиб октябрьла цаличиб бузескабиибси призывная кампанияла дазурбазиб Россияла Ярагъладарибти ЦIакьаназиб къуллукъбарахъес жагьилти жибирули саби.
Ил сабабли октябрьла 9-личиб Дахадаевала ва Хайдакьла районтала дявила комиссариатлизиб муниципалитетла администрацияла бекIла заместитель Заур Нагьбаровла бекIдешлиуб призывная кампанияла заседание бетерхур. Илар бутIакьяндеш дариб кIелра районна дявила комиссар ГIумар СягIидовли, низам-кьяйда далтахъути органтала вакилтани, арадеш мяхIкамбирнила шайчибти хIянчизартани ва цархIилти учреждениебала вакилтани. Балбуцличи жибариб шимазиб дявила шайчибси сияхI бикути хIянчизартира.
Заседаниела хIянчи бехIбирхьули гъайухъунси З.Нагьбаровли 18-30 – ибти дусмала лебилра жагьилти «О воинской обязанности и военной службе» бикIуси Федеральный хIукму хIясибли, заманаличиб мягIлумбирес хIяжатли саби или буриб.
«ГIярмиялизиб къуллукъбарни гьарил мурул адамла
гIямрулизиб дебали мягIничебси бутIа саби. ВатIа гьалабси чебла ихъули, илдас чула гъабзадеш чедаахъес, дявила шайчирти багьни касес, сагати юлдашуни баргес, рухIлашал чIумадарес имканбикIули саби», — буриб З.Нагьбаровли.
«ГIебшнила призыв декабрь баз таманбиайчи бухъянбилтIуси саби. Лерилра хIяжатти кагъурти далкьаахъурли сари, медкомиссия гьар бархIи бузули саби. Призывникунас гьамаддешлис ишди бурхIназиб ил комиссия военкоматлизибра бузули саби. График хIясибли, гьаланачи медкомиссия ихъу ГIяхIмадкентла, ХIуллила, Жинабила, Киринна ва Чумлила шимазибадти повесткаби дакIибти жагьилтани. Комиссияла хIянчи саби — илди жагали ахтардибарни ва чидилти гIяскуртазиб къуллукъбарес илдас асубирарал белгибарни», — викIи ГIумар СягIидов.
Дявила комиссариатла призывла отделениела начальник МяхIяммад Пашаевли лебтасалра жила кагъурти дурхьниличила буриб. Гьарил шилизибад жибарибтала кьадарла шайчирти баянтира илини дуриб.
«Селра сабаб агарли военкоматлизи хIебакIибтачи ва сагаси мерличи гечбиубли гIергъи, у хIисаблизи кахIесахъибтачи вецIличибад хIябцIали
азир къурушличи бикайчи гIякIа чебирхьуси саби. ХIянчила мер, белчIуди, хъалибаргла даража дарсдиубхIели хIебагьахъуртачи 5 азир къурушла гIякIа, чула хIянчизарти военкоматлизи жибарни мягIлумхIебарибти руководительтачи 400 азир къурушла гIякIа чебихьили бирар», — буриб М.Пашаевли.
ВУСла хIянчизартани шимала администрациябала бургачил ва низам-кьяйда далтахъути органтала хIянчизартачил жагьилти заманаличиб военкоматлизи башахъес халкь-ургар багьахънибала хIянчурби дурадуркIес хIяжатли биъниличила буриб комиссияла хIянчизартанира. «Гьарил призывникли сунела къуллукъ ва военкоматлизи вакIес хIяжатси заманала кьадар балес гIягIниси саби. Ила хIевакIибсилис ил шайчирти жавабкардеш дихес чебиркур. ГIебшнила призывла дазурбазир кадизахъурти тIалабуни детерхахъес низамличи бикахъибси хIянчи дураберкIес хIяжатбиркур», — чеимцIабариб З.Нагьбаровли.
Хайдакьла районна администрацияла пресс-служба
