Бурули бирар: «Дубуртачир жагати чIянкIли дубурти дирар» или. Дубуртачиб чIумати багьадуртира алкIули саби Дагъистайзиб ибси пикри марбирути гIяхIгъубзни лебниличила балахъули саби кьуватчебти дубурлантани. ТIабигIятли дедибти спортла ва гIякьлу-дагьрила шайчирти пагьмурти гьаладяхI дашахъути, давлачердирахъути, Дубуртар Улкала багьа ахъбурцути сартанти имцIабикIниличи пахру хIебарес хIейрар. Илдигъунти игитуни дарганти-ургабра камли ахIен. Дунъяла декIар-декIарти мер-мусаличибадли илди мягIничерти абзаназир цаибти мерани сархули чарбулхъухIели, дубурлантала уркIби, гьайгьай, халаси разидешлизи гIеладиркнира чисалра дигIяндеш ахIен.
Иш гьакIлис ургIеран багьадурли дагъистанлантицунра ахIи, россиялантира сунела чедибдешуначил пахрули бицIахъиб.
Сентябрьла ахирличиб Геленджиклизиб 2024 ибил дусла World Cup Gelendzhik Дунъяла Кубок ибси балбуц бетерхур. Ил дураберкIибсири WPC, WPSO ва WAO кумекличил. Ил мягIничебси ва машгьурсили бетаурси абзли бахъал бутIакьянчибира цалабяхъиб. Илдала лугIи 450-йчи абикилри. Илдицад спортсменти цалабикни шагьарла тарихлизиб мягIничебси анцIбукьлира бетаур.
Нушала улкала декIар-декIарти мер-мусаличибад ва дурала улкназибад спортсменти бакIилри чумал журала абзаназир чула кьуватчебдеш ва устадеш чедаахъес багьандан. Спортла гьарли-марси байрамли бетаур, суненира пауэрлифтинг диганти ва профессионалти ца мерличи цалабяхъибси абз.
Геленджиклизиб Дунъяла Кубок дураберкIни спортла мягIничебси анцIбукьцун ахIенри, ил цагъунти пикрумала бегIти гьунибаибси, атлетунала ургар гьалмагъдешла бархбасуни чIумадирахъуси ва барсур устадеш гIерисуси мерли бетаур.
Абзлизив бегIлара цIакьтигъунтазивад декIарухъун Дахадаевла районна УргIерила шилизивадси Мурад ГIялиев. Ил спортла авал журализив абзлизи кайзур ва лерилра бетуцуназир цаибти мерани сархиб. Илала дурабад, Мурадли «экстремальный подъем на бицепс» ибси спортла журализиб Россияла, Европала ва Дунъяла сагаси рекорд кабизахъур. СирхIян уршила ил гьунар гIяламатла асарбарибси анцIбукьли бетаур.
Илгъуна сархибдешли жагьилти уркIичеббирахъу, багьадур уршиличи мешубикес ва сагати ахъанайтачи баэс кьаслизи кабилзан илди. Мурад ГIялиевли бузериличи ва низамличи чекайзниличибли сегъунти чедибдешуни диахъес имканти алкIулил чебаахъиб.
Диахъубти чедибдешуначил бархбасахъи, Мурад ГIялиев мубараквирехIе «Замана» газетала коллективла шайзивадра.
Нуша пахрули дицIилра дарганти-ургав илгъуна кьуватчевси спортсмен левниличи ва нушала республикара улкара илкьяйдали дунъяличир машгьурдарниличи. Гьаннала гIергъира сагати чедибдешунани уркIичеввираби, чина укьядлира илкьяйдали цаибти мерани сархили, чарулхъаби. ХIед къаркъагъуна арадеш, хъалибарглизиб талихI, баракат ва спортлизир дахъал гьарбизуни дулгулра. ГIуррара сагати чедибдешуни диубли дигниличила балахъулра. Сагати ахъанайтачи ва чедибдешуначи гьалавяхI, гIяхIгъабза дарган урши!
