Дубурла шимазиб акIубти дурхIни тIабигIятличил цIацIали бархбаси бирар. Илди дубурла катругуначиб ва шурми-ургабад дуцIбикIули, дугIла арцантачил хIязтази ихъур. Уршбас гъалбецIла кегIебдеш, саберхурдеш, гьунарчебдеш ва цархIилти жаниварти-ургаб цIакьсигъуна биъни гIяхIдилзан. Гьайгьай, хIязтази ихъухIелира иличила хабуртазир аргъибти баркьудлумачил чула лерилра баркьудлуми дархдалсахъули бирар. ИмцIаливан гIулухъабас арцантазибадли дигуси чIака саби. ЦацахIели гIулухъабани бехIемцIлизи дикили, арцес хIедирути чIакни шилизи дихули бири. Гьаваличир арцурхIели илди диштIали чедиули диалра, мякьлар халати ва лергIер жагати дуилри. Илдала кьуватчебдешличи, азаддешличи уршби мяштIбикIули бирар ва илдачи мешубиркес кьаслизиб бирар. ГIе, илди гIулухъабазибадли бахъалгъунти цархIилти арцантазирадли чIакниван, халкьлизибадли декIарбулхъулира бирар. Чула кьуватчебдешличил, гьунартачил ва залумдешличил…
Спортлизи ахъибти бахъалгъунти дубурла арсланти дунъяла чеббикIибти спортсменти-ургар чедибдешунира сархили, чарбулхъули бирар. Илдигъунти багьадуртазивадли сай Дахадаевла районна Дибгашила шилизивадси ТIагьир ГIябдуллабековра.
ТIагьир ГIябдуллабеков спортла гъудурти журабазив (ММА) узуси сай. 2021 ибил дусличивадли сай спортлизи ахъили, камси заманала бухIнаб хIербикIутала ва ММА дигантала уркIбира ясирдуцили, гьалавяхI вашули сай. RCCBP, Open Fighting Championship ва Shlemenko Fighting Championship ибти машгьурти спортла абзаначир бутIакьяндеш дирнили дубурлан урши ункъли хIядуриъниличила бурули саби.
Абзаначиб илала къаршикартири дунъяличиб машгьурти спортсменти Дастан ИсмягIилов, Жалолиддин Расулов ва Максим Сулайбанов. Иличиблира багьесли саби дибгашан гIяхIгъабза ахъси даражала спортсмен виъни. Гьарил чедибдешличи ТIагьир спортла дунъяличив машгьурсили ва жагьилтас гIибратли ветарулри. Илала къайгъичевдеш, чекайзурдеш, сабур, чеббикIибси баркьудилис мардеш дирни жагьил мушлукьябас мисалли детаур. Илкьяйдали, къияндешунира дяхIярули, сунела гьала тIашдатурти масъултира умутличил ирзули, чедибдешличи гьуни кабердиб дубурлан уршили.
Лебилра дахадаевлантаницунра ахIи, дагъистанлантанира пахрубирули саби ил спортсменничи.
ХIурматла ТIагьир ГIябдуллабеков, яргаличилси хIела шуэсил чедибдешличил «Замана» газетала агьлулира хIу уркIи-уркIилавадли мубаракирулри. Ил хIелацун чедибдеш ахIен, ил улкала спортла бетуцлизи кабихьибси халаси пай саби. Чедибдешличи хIела гьуни гьарбизурсили бетааб. Илкьяйдали гьалавяхI вашули, чина укьядлира, чIянкIли цаибил мер сархили чарулхъаби. Нуша лерилра Дагъиста халкь хIела шаласи челябкьлаличи дирхулра. ХIела сагати чедибдешуначи мурталра хIерли дирехIе ва хIед арадешра талихIра дулгехIе.
