Бара гьалабван Хайдакьла районна бекI ГIялим Темирбулатов СВО-ла бутIакьянчи Нурислам Арсланбековличил гьуниваиб. Нурислам Арсланбековли 2022 ибил дусла ноябрьла 21-личиб Россияла Ярагъладарибти ЦIакьаназиб вягIда бигьи, ВатIа хъархIерагардеш батахъес СВО-лизи арякьунсири.
Нурислам ХIясанович 1995 ибил дуслизив Хайдакьла районна Жавгъатла шилизив акIубси сай. Шила школализив учIули калунсири. ВиштIахIелил илис дебали спорт дигахъи. ММА М-1 турнирлизиб цаэсил мер сархили, медаль ва ири касибтири. Гьанна бусягIят илала хIябал дурхIя леб. Илала биштIати кIел узи Самур ва МяхIяммад илкьяйдали СВО-ла бутIакьянчиби саби.
Фронтлизи арукьес пикрибарниличила илини бурули, даршуси челябкьла багьандан бургъути сунела цаванзалантачи кьакьавикIниличила гьанбушиб.
«Нуван саби гIяхIъулали арбякьунти итаб бахъал саби. Лебилра нушала дурхIни гьарли-марти Игитуни саби! Дила юлдашуни ва цашиланти итаб бургъухIели, хъули кайили уъни нуни лайикьсили чебиули ахIенри. Нушала ВатIан, дурхIни ва халкь батахъни – нушала чебла саби!» — викIи ил.
Нурислам Арсланбеков Донецкла, Луганскла ва Запорожьела мер-мусаличир чедаахъибти игитдешлис чумра шабагъатличи лайикьикиб. Илди сарри: «СВО-ла бутIакьянчи», «Гъабзадешлис» ва «Дявилизир диахъубти сархибдешуни багьандан» бикIути медальти. ГIялим Темирбулатовлира Дагъиста Халкьла Игит бикIуси Мургьила зубари Н.Арсланбековла михъирличи баршиб. «Хайдакьлантани СВО-лизир бутIакьяндеш дирни, гъабзадеш илар чедиахъни ва пачалихъла шабагъатуни кайсни дебали дигеси анцIбукь саби. Россияла Президент В.В.Путинна ХIукму хIясибли, Нурислам ХIясанович Гъабзадешла орденничил шабагъатлаварили сай. Ил дебали мягIничебси шабагъат саби. Дигесли саби нушала районнизиб илдигъунти гъабзадешчебти мурул адамти лебни. ЧеалкIуси наслулис илди гIибратли бетарули саби» — викIи районна бекI.
«ГIялим МяхIяммадович, хIед халаси баркалла балахъулра! Илкьяйдали баркалла викIулра лебилра бургъантас. АхIерти узби, чедибдеш нушала бирар!» — викIи Нурислам ХIясанович. Гьанна бусягIят ил вяхъили, хъулив сай. Аравиубли гIергъи, сагали гIурра СВО-лизи аркьуси сай.
Хайдакьла районна администрацияла пресс-служба
