Хайдакьла районна Шилагьила школа шула кьиматуначил таманбарибси Мижигълила шилизивадси Руслан ХIясановли ахIерси край сунела пагьличил машгьурбирули сай. Школа таманбарили гIергъи, Руслан Кубаньна пачалихъла технологический университетлизи керхурсири ва халкьани-ургабси ресторантала шайчибси программа хIясибли учIусири.
Руслай санигIятлашалти цаибти гунзри Дагъистайзир кацIибтири. Ил Избербаш шагьарлизиб хIянчи барес бажардиикиб, кIинайс – Чечняла тах шагьар Грозныйлизиб. Москвала шеф-повартала слётличир бутIакьяндеш дариб, Северный Кавказла шеф-повартала цахIнабикла член ветаур. БусягIятла замана Руслан ХIясанов Москвализив узули сай ва Дагъиста миллатла, Кавказла, Европала ва Японияла хурегуни далкьарахъули сай. Сунени далкьарахъути берклумала къугъати суратуни кадилзахъули, социальный сетьлизибси бяхI жигарчебли бузахъули сай.
Бузерилизир кьяйдали белчIудилизирра сархибдешуни дирахъули, илини вуз ункъли хъараахъур. Челябкьлализив сунела биштIаси ВатIайзи – Хайдакьла районнизи гечиэс дигниличила багьахъур илини.
«Ну бизиси Хайдакьлизивадси сайра! — пахруличил бурули сай Руслай. Адамла арадеш, куц-курцIа, уркIила гьав илини букуси хуреглизибад дигахъуси саби. Дила баркьуди ну акIубти мер-мусаличиб даимбарес дигулра, цаванзалантас, шантас багалавиэс, илди разибирес, бизиси хурегли балхес».
Бузерилизир сархибдешуни дирахъес Руслан ХIясановлис къаркъаван чIумаси арадеш булгехIе.
Хайдакьла районна администрацияла пресс-служба
