ИсмягIилов Рабазан  ХIусенович акIубси сай Кьассагумахьилизив хIурматла хъалибарглизив. Илини Кьассагумахьила школализир 8-ибил класс таманбарили,  Кулила районна КIягIяла  урга даражала школализив учIули 10-ибил класс таманбарили, сунела белчIуди даимбариб Дагъиста пачалихъла пединститутла физико-математический факультетлизи керхурли. ГIяхIти кьиматуначил пединститут таманбарили гIергъи, Кьассагумахьилизи чарухъун ва школализив узес вехIихьиб. Гьанна 42 дус ил школализив узули сай.

Рабазан ХIусеновичли Кьассагумахьила шила халкьла, барх бузутала, школала бучIантала ва илдала бегIтала халаси хIурмат сархиб.

Халаси багьудила вегI, гьар шайчивад пагьмучевси Рабазай сунени кабирхьуси дарсла мягIна бучIантази аргъахъес, иличи иштяхI акIахъес даим къайгъназив чейур.

Рабазан ХIусеновичли акIахъубли лебсири КВН бикIуси хIязра. Илис масхаралис «Нушала Масляков сай» или бурусири.

Школализиб учительти камли биъни багьандан Рабазан ИсмягIиловлис дахъал декIар-декIарти дурсри кадирхьес чебиркулри.

Ил дебали пагьмучевси виалра, сунечила гап-чяхI хIейгахъуси адам сай. Сунечил барх бузути учительти, яра алавчарти адамти, пашмандешлизиб биалли, сегъуна-биалра масхара бурили, илдала децI чебарбукес къайгъилизив вирар или бурули саби барх бузутани.

Сунела гIямрула рархкьячил Рабазай авал дурхIя абикьур. Илдас гIяхIси бяркъра бедили, хIялалти, адамдешла бегIти бетаахъурли, чебяхIси даражала багьудира касахъиб.

Халалгъуна рурсили мединститут таманбарили, МяхIячкъала шагьарла Редукторный поселоклизибси республикала больницализир тухтурли рузули сари. Марина ИсмягIилова чебяхIси даражала категорияличи лайикьрикили сари.

ЦархIил рурсили ДГУ-ла юридический факультет таманбарили, ДР-ла юстицияла Министерстволизир консультант-отделла начальникла заместительли рузули сари.

Урши МяхIяммад ИсмягIиловли политехнический институт таманбарили сай.

Гьаннала гIергъира Аллагьли гIяхIдешуни хьурадирули, бузерилизир сархибдешуни имцIадикIули, арадешличил хIербиэс кьадарбиаб чус!

C.ГIябдуллаева