Р.ХIямзатовла уличилси Миллатла библиотекала край руркъуси ва миллатла литературала отделла заллизиб ДР-ла культурала урибси хIянчизар, Россияла писательтала ва журналистунала Союзунала член, даргала поэт-сатирик, журналист Айдимир Каймаразов акIубхIейчирад 75 дус дикнилис хасбарибси жузала выставка гьалабихьили саби.
А.Каймаразов акIубси сай 1949 ибил дуслизив Сергокъалала районна МулебкIила администрациялизи кабурхуси ЦIуримахьилизив. Шила школа таманбарили гIергъи, МяхIячкъалализибси шила хозяйствола техникумлизиб илини белчIуди даимбарибсири. Айдимир Каймаразов 18 дус виубхIели, илала дудеш гIямрулизивад шалгIевухъунсири. ИлхIели ил шилизивад арякьунсири ва Южно-Сухокумсклизирти набтла буругъуназив узес вехIихьибсири. 1972 ибил дуслизив Айдимир Каймаразовли Сергокъалала районна «Эркиндешличи» бикIуси газетализиб корреспондентла хIянчи бехIбуцибсири. 1980 ибил дусличибад 2011 ибил дусличи бикайчи ил газетала жавабкардеш дихуси секретарьли узи.
КIинайс биалли, бекI редакторла заместитель ветаурсири.
1994 ибил дуслизиб поэтла «Масхаралис ва мардешлис» бикIуси сатирала назмуртала жуз дурабухъунсири. КIиэсил «УркIила тIама» бикIуси жуз — 2002 — ибил дуслизиб. Ил дуслизиб А.Каймаразовла «Дарган рурси ПатIимат» бикIуси дигайла ва мардешла къиликъуни духIнадуцибси жуз дурабухъунсири. Ил жузлизирадти дахъал назмурти даргала гIяртистунани макьамтачил зайдикIахъули сари.
Поэт-сатирик 60 дус виънила юбилейла дазурбазиб, 2009 — ибил дуслизиб «ЧIакни урцар, чIичIлуми хъусдикIар» бикIуси ВатIайчи диги черяхIдирути, гъабзадешла, урехиагардешла, патриотизмала ва дигайла темаби духIнадуцибси жуз дурабухъунсири. ГIергъити дусмазирра Айдимир Каймаразовла гIурра дахъал жузи дурадухъун.
Поэт дебали халкьличил бархбас бузахъуси адам вирусири. Илди гьунибаънибачила илини назмурти лукIутири. ЦацадехIти биалли, гьарли-марти адамтас хасдарили лукIули вири. Адамтала гIяхIбаркьла баркьудлуми черяхIдирули, кIибяхIяндеш пуждирули ва дукелцIиличи дуршули лукIи ил.
Сергокъалала районна гимнли детаурти дугьбира А.Каймаразовли делкIунтири.
Поэтла назмурти ва сатирала произведениеби илкьяйдали кадирхъули дири — «Эркиндешличи» ва «Замана» бикIути газетабазир, «Гьалмагъдеш», «Дагъиста хьунул адам», «Лачин» журналтазир. Илала белкIани халкьлис дебали дигахъи, ва сагати хабуртачи мурталра хIерли бири.
Дарган мезли делкIунти илала произведениеби гьачамлис лерилра урус мезличи шурдати ахIен. Айдимир Каймаразов мурталра жура-журала шимазирти школабази ва цархIилти организациябази гIяхIладли живирусири. Илис шанти разили гьунибиули бири.
А.Каймаразовла бузери ХIурматла Грамотабачил чуйнара кьиматлабарибсири. 1993 ибил дуслизиб бедибси «ДР-ла культурала урибси хIянчизар» бикIуси у поэтлис бегIлара дурхъаси шабагъат сабри.
Салимат ХIяжиева
