БехIбихьудла классунала мугIяллимла бегIлара тамашаласи ва хIурматличи лайикьбикибси санигIят саби. Ил бегIлара пагьмучерси адам, гьарли-марси сихIрукья сари. Школала унабурхIличи бегIла гьалаб кьяш кацIибти биштIати дурхIнас ил кIиибси неш сари, чула гIямрула гьунчир къаршириркуси.
БехIбихьудла классунала мугIяллимла санигIят цархIилти санигIятунала хьулчили бетарули саби, сенахIенну цаибси мугIяллимли саби дурхIни сагати аги-кьяйдаличи бурсибиахъес кумекбируси ва илдас багьудлумала дунъялизи унза ибхьуси. Цаибси мугIяллимла уличил сари дурхIнала бегIлара шалати ва гIяхIти гьанбикуни дархдасунти.
Кьакьамахьила школала бехIбихьудла классунала мугIяллим ПатIимат Мусалаевани багьудила ва бяркъла баркьудилис сунела лерилра гIямру харждариб.
ПатIимат МяхIяммадовна акIубси сари 1948 ибил дусла январьла 7-личир Сергокъалала районна Дегвала шилизир. Шила 8 дусла школа таманбарили, Сергокъалала педучилищелизи карерхурсири. Ил таманбарили гIергъи, 1970 ибил дуслизир, жагьил специалист сарливан, ГъурбукIила школализир рузахъес рархьибсири. Илаб дус хIянчи барили, сари акIубси шила 8 дусла школализир рузес рехIрихьиб. 1975 ибил дусличирадли 2024 ибил дусличи бикайчи ПатIимат Мусалаева Кьакьамахьила школализир рузули калун. БусягIят ил пенсияличир хъулир сари.
ПатIимат МяхIяммадовна халати устадешличилси мугIяллим, санигIят мурхьли бяркъурси адам, пагьмучерси, пасихIси педагог сари. Ил дурхIначи дигили рицIибси, санигIятлис марси, бархьдеш дигахъуси, се-биалра гьала хили балуси, секIал хъярхъли хIясиббируси, кумекла някъ гьабатес къалабаси адам сари. П.Мусалаевани гIяхIцад наслубази багьудлумала гье дегIун, илдас гIяхIси гьалмагъ ва насихIятчи ретаур. Сунени бучIахъули калунти дурхIнанира чула цаибси мугIяллимла халаси хIурмат биру.
Черетаибси, тIалабкарси ва малхIямси П.Мусалаевани гьарил дурхIялис балбиркуси тяхIяр бургусири. Буралли, ил сунени бучIахъути дурхIнала гIямрули хIеррирулри, лебталалра уркIби аргъили, илдас кумекбарес хIяракатлизир рири. Ил мугIяллимла гIямрула бутIа саби, сабира хъалибаргван мягIничебси. Абикьурси цIали ванабиахъес саби-алав адамти чукурбируливан, илинира сунечи адамти битIикIули рирар.
— ДурхIнала хIулбазир игьдибар, хIулбукIри, умут чедиухIели, хIела санигIятла мягIничебдешличила гIячихъли иргъулри. Илди хIулбачи хIеръибхIели, дурхIнас хIу арагIерли дунъя риъни чебиулри. Илкьяйдали класслизи арацIибхIели, разидешли дицIибти, се-биалра сагаси чебаэс, багьес гьуцIдикIути дурхIнала хIулби чедиъни халаси талихIлизи халбирулра. ХIела уркIи иргъалли, хIечи хIерли биалли ва хIу гIяхIилзули виадли, ил ахIену гьатIи талихI? – бурули сари П.Мусалаевани.
Дила пикрили, къакъла гIелав вегI гIевурцуси адам хIейалли, хIянчилис лерилра цIакьани харждарес хIейрар. ПатIимат МяхIяммадовнала лев илгъуна адам – мурул МяхIяммад, сайра Кьакьамахьила школализиб 50 дусличибра имцIали хIянчи барибси, илдазирад 34 дус – школала директорли. Илини ахIенси гIур чили иргъуси мугIяллимла къиянси бузериличила? Илдани 5 дурхIя абикьур, бяркъличи бушиб, чебяхIси даражала багьуди касахъиб ва гIямрула бягIуси гьунчибад гьарзали ганзбикIахъес бархьиб.
ПатIимат МяхIяммадовани бучIахъути дурхIни, чебяхIси багьудиличил бегIбиубли, гIяхIти къуллукъуначиб бузули саби: мугIяллимтили, тухтуртили, ВатIан балтахъантили ва цархIилтира. Илди лебтанилра чула цаибси ва гIяхIси мугIяллим уркIила ванадешличил гьанруршули бирар. ХIера, илизиб саби педагогла талихIра.
М.Сайгидова
