Ишди бурхIназиб «Ахъушала район» МО-ла администрацияла актовый заллизиб ишдус школа мургьила медальличил таманбарибти бучIанти шабагъатлабариб.
Районна бухIнаб гIяхIти кьиматуначил школа хъараахъурли, имтихIянтас ахъти баллани касибти, мургьила медаль сархибти 24 дурхIя леб.
Гьунибаънилизир бутIакьяндеш дариб «Ахъушала район» МО-ла администрацияла бекIла къуллукъуни заманалис дузахъуси МяхIяммад ИсмягIиловли, багьудила управлениела начальник МяхIяммад КаримхIяжиевли, ил управлениела методкабинетла заведующая Наида ХIусейновани, школабала директортани, выпускникунала классла руководительтани, бучIантани, илдала бегIтани ва цархIилти къуллукъла хIянчизартани.
МяхIяммад ИсмягIиловли гIяхIти кьиматуначил школа таманбарни багьандан дурхIни мубаракбариб.
– АхIерти выпускникуни! Наб хIуша уркIи-уркIиларад мубаракдарес дигулра. ХIушази гIяхIси багьуди касахъес хIушала учительтани халаси къайгъи барибсири, ил багьандан илдасра баркалла багьахъес дигулра. ХIуша нушала челябкьла саррая. ХIушаб дигусигъуна чебяхIси даражала вуз-лизира кадерхурли, белчIудира даимбарили, гIяхIти санигIятуначил дегIдиэс къайгъибарая, – буриб М.ИсмягIиловли.
ГIур гъайбухъун МяхIяммад КаримхIяжиев, Наида ХIусейнова ва Ахъушала урга даражала цаибил школала директор Сабият МяхIяммадова. Сабият МяхIяммадовани бекIдеш дируси школализиб бучIути урчIемал урши-рурсили медальти касили сари.
МяхIяммад ИсмягIиловли ва МяхIяммад КаримхIяжиевли «БелчIудилизиб декIарбухъни багьандан» бикIути медальтачил, цаэсил даражала медальти касибти – 10 азир къурушла, кIиэсил даражала касибти – 5 азир къурушла Сертификатуначил, «Ахъушала район» МО-ла администрацияла шайзибад ХIурматла Грамотабачил шабагъатлабариб ва аттестатуни дедиб.
Медальти касибти–ургаб лебри МухIела гимназияла, Усишала кIиибил, Семгамахьила, Хъаршала, Урганила, Дубримахьила школабазиб бучIути дурхIни, илдала лугIилизиб Ахъушала урга даражала цаибил школа таманбарибти – ГъазимяхIяммад МяхIяммадов, ПатIимат БяхIяндгIялиева, Раисат ГIябдулкаримова, Маликат ХIяжигIямарова, Зарема ХIясанова, Жамиля МяхIяммадова, Загьидат БяхIяндова, Загьидат Чамкурова, Мадина Якьубова. С.Кьурбановла уличилси МухIела гимназия таманбарибти саби – ГIяйшат ШяхIбанова, ПитIу Кьасумова, Карина ГIусманова; Усишала лицей таманбарибти Марзият МяхIяммадова, Хадижат НикIамяхIяммадова, Кьурбан МяхIяммадов, ПатIимат Кьурбанова; Усишала кIиибил урга даражала школа таманбарибти ПатIимат ХIяжиева, Хадижат ХIусенова; Усишала хIябъибил школа таманбарибси ПатIимат Сулайбанова; Дубримахьила школа таманбарибси Салимат БяхIяндова; Урганила урга даражала школа таманбарибти Асият НикIаева, Марьям Саламовна; Семгамахьила школа таманбарибси ПатIимат МяхIяммадова; Хъаршала школа таманбарибси ПатIимат ХIямзалагIялиева.
Шадлихъличир бегIтанира дурхIнас насихIятуни дуриб ва мугIяллимтас баркалла багьахъур. Илди-ургаб лебри культурала ва туризмала упралениела начальник ХIясан ХIясанов, районна больницала тухтур Заур ШяхIбанов. Школа таманбарибти дурхIнанира районна администрацияла бекIлис, учительтас ва чула бегIтас халаси баркалла багьахъур, гьар шайчибад саби гIеббуцнилис.
Сабият ГIябдуллаева
