ИмцIаливан ванзаличир кадиркути дявила анцIбукьуначила ва бургъантани дурадуркIути гьунартачила дирар нушаб къаршидиркути баянти. Морякунанира чедиахъути гъабзадешла бетуцуни камли хIедиалра.
Нушала улкализиб дявила-урхьула флотла (ВМФ) БархIи мурталра мягIничебсилизи халбируси саби. Ил бархIи нушала улкали Россияла флотла тарихла черяхIти баркьудлумачила, морякунала гьунартачила СМИ-базир сецад-дигара баянти аргъес вирар.
Нушала улкала дазуличир камли ахIенгу, морякунани гьар бархIи игитти баркьудлуми дурадуркIули, сахъдешличил далтахъути урхьнала мер-муса. ИшхIелла Россияла флот гIеббуцибси саби бегIлара сагати технологиябачил ва ярагъличил. Илкьяйдали морякунани чула улкала хъарбаркьунира ахъси даражаличир тамандирули, дунъяличиб даршудеш калахъести баркьудлуми дурадуркIес имканбикIули саби.
1696 ибил дуслизиб Петр I-ибилли Россияла ВМФ акIахъубсири. ИлхIейчибадли ил дебали гьалабяхI арбякьи саби ва гьанна дунъяличиб бегIлара цIакьсили бетаурли саби.
Россияла мер-муса 12 урхьули алавдарибти сари. Улкала урхьнала дуб 60 985 километрличи халбирули саби.
Дубуртар Улкализибадра хабардерхурти бахъал морякуни дурабухъунтигу. БегI гьалаб гьанбушес лайикьли саби Игит МяхIяммад ХIяжиевла у. ЧебяхIси ВатIа дергъла замана илини дакIударибти гъабзадешличила дунъяличи хабардерхурти сари. Илала уличилси шинна удибад башуси лодкализиб къуллукъбарахъес Дагъиста уршби жибирутири. Дила узикьар Шамил КьурбанбяхIяммаевлира илкьяйдали илаб сабри къуллукъбарибси.
Игитдешла ва гъабзадешла гIевдухьли бетаурли биэс хIяжатли саби ил лодка. Сунела бархкьяби хабарагарси балагьлизибад берцахъни багьандан, Шамиллира шабагъатуни касибтири ва базцадхIи отпускличи вархьибсири. Шила хозяйствола институтра таманаили ил лерилра гIямрулизив хIяйвантала тухтурли хIялай узули калунсири. ГIе, адамла гIямруличи игитдешла хIяланани ва патриот бяркъли халаси асар бирули буили саби. М.ХIяжиевла гьунартани уркIичеббиахъубти лебилра морякуни Шамил кьяйдали бархьдешла гьунира буцили, халкь-ургаб халаси хIурматра сархили, хIербиубли биэс хIяжатли саби ва гьаннала гIергъира хIербирар. Илкьяйдали нушала улкалацунра ахIи, республикализибадти морякунала игитти баркьудлумачи нушани пахрубирехIе.
Тамара ГIябдусалимова
