Иш яргалис нушала практика 25 ибил июньничибад июльла 4-личи бикайчи Сергокъалала районна Дегвала шилизиб бетерхур. Практикаличи дукьес хIядурдикIули лерли, нуша аркьуси Сергокъалала районнизир ва лебилра Дагъистайзир хIейгести тIама-гьама ахъдиуб. Даршути халкь-ургар дай хIерила замана къяйк-къуйкла тIамри дакIудиуб, лерилра соцсетуназир, телевидениелизир, радиолизир дурути сагати хабурти вайнукьябани ватIа къуллукъчиби – полицияла хIянчизарти ва цархIилти даршути халкьла гIямру къябдердахъниличила сарри. Нуша практикаличи аркьнила суайзирра васвасъала дакIудиуб: «Вайнукьяби Сергокъалала районнизибадти саби», – иргъулри мер-мерларад адамтани тIамри, биалра нуша хIядурдиубра, ардякьунра.
Нушала практикала мурад сабри дарган мезла Дегвала халкьла ирнила тяхIяр бяркъни. Ил практика дураберкIес гIягIнили биъниличила нушази дусла бехIбихьудлизибадал дарган мезла диалектология бикIуси дисциплиналичиб багьахъурсири. Практика бехIбирхьухIели, нушала преподаватель Муса Расулович БяхIяммадовли ункъли тянишдарира ил дурабуркIнила тяхIяр-кьяйдаличил.
Практика дурабуркIути бурхIназиб нушала халали ахIенси кьукья варх учIуси ГIялиханов Мажидла бегIтани чула юртлизи хьурадарира. Илди нушаб дяхI шалали гьунибаиб. Мажидла нешли нуша ляркьниличи дебали халаси хIядурдеш барилри, илини нуша разили хьурадарира. Дубурлан хьунул адамла хъулиб гьар-чинабалра чебетаибси ибгибдешри. Кавсаратли нушаб жура-журала бизили тIемдикIути берклуми гьаладихьиб.
Практикала замана, Дегвала шилизир нуша декIар-декIарти хъумхIертести мер-мусаличи дякьунра, сарира нушала темаби хIясибли дебали далдикибти, нушаб багаладиэсти. Дегвала шилизибси умуси гьавали, тяхIу-тяхIуси аргъли, кункси цIуэрили, жагаси тIабигIятли хIяйрандешлизи гIеладушира нуша. Ургубаларад нуша хъули чардирухIели, дубурла мер-мусаличибси аргъ лямцIван барсбиуб – дебали хъярхъти чяхI-заб дехIдихьиб. Забли нушала уркIила гьавличи, хIяланачи гIяхIси асар бариб, лерилра разили, шадли чардухъунра.
БархIехъла замана нуша Сулайбанов МяхIяммад ГIялихановичличил, Кьадиева Асият МяхIяммадовначил, ГIялиева Кумсият ГIябдуряхIмановначил, МяхIяммадова Исбаният МяхIяммадовначил гьунидаира. Илдала кумекличил нушани ункъти, пайдалачерти, тамашалати, иштяхI алкIахъути баянти цаладяхъира.
Практика дурабуркIуси замана нушани пайдаличил ва разили беркIира. Илар нушани шиличила декIар-декIарти тамашала баянти дагьурра, хабурти дакьира, жагати суратуни, видеоби касира, уркIила гьав ахъбуцира. Нушани шила халкьличил дурадеркIибти гьунибаъниби ва ихтилатуни дебали разити сарри. Илди пайдалачертили, багьудлуми имцIадирахъутили урдухъун. Ил архIя нушала уркIбазиб муртлисалра кавлан.
Шилизиб хIербирути халкьла гIямру тIабигIятличил дебали цIацIали дархдасунти сари. Ил тIабигIятла бутIали биубси ургубализир наб дила практикала «Дарма кьар» бикIуси темаличи далдикибти духълумира къаршидикиб.
Мажидла бегIти ГIялиханов Халирбагьиннис ва ГIялиханова Кавсаратлис студентунала шайзибад халаси баркалла багьахъес дигулра, нушаб дурхъати гIяхIялдешла унза гьаргдарнилис. Илдани чула диру-далтути хIянчи датурли, нушази разили ва пайдачебли замана беркIахъес халаси къайгъибариб. Баркалла биаб, чула замана харжбарили, нушаб баянти учидяхъяхъес кумекбарибти Дегвала шантасра лебилра Сергокъалала районнисра. Нуша ил районнизи, гьалар акIубти вас-васъалара датурли, дукьниличи пашманхIедиубра. Халкь урухбирутала, илдачи гуж-зулмудирутала, илди кабуршутала миллат лебси ахIен, илдигъунти вайнукьябала баркьудлумачибли лебилра районнисра Дагъистайсра балкIси кьимат кабатес асухIебирар. Гьайгьайрагу, нушани хъумхIертехIе илдигъунти вайнукьябачи къаршили кайзурли, «Дузеная, узби!» ибси сунела жи даршдусмас гIелаб батурли, ВатIан багьандан сунела гIямру мяштIхIедарибси МяхIяммад НурбяхIяндовра Сергокъалала районнизивадси Игит виъниличила, хIяб гьалжанала нурли бицIабну сунела.
Ара-сагъли, разили, гIяхIти хабуртицун дикьули, даршуси заклиуб талихIчебли калаб Дегвала шилизибти халкь, даршудеш биаб лебилра дунъяличиб!
Зугьра ХIяжиева, ДГУ-ла филологияла факультетла РДО-ла 2-ибил курсла студентка
