Лебил дунъяла адам­тала арадеш гIеб­буцес багьандан ми­цIи­рагла арадеш ахIера­барес ча­раагарси биъни жяв­хIей­чи­бад адам­тани ба­лусири. Арати ми­цIи­раг­лизирад касибти бизити берк-бержли сари адамтала гIямру гIер­дурцути.

МицIирагла арадеш гIеббуцнилизиб бузути тухтуртала хIурмат-кьимат ахъдуцес багьандан лебил дунъяла ветеринартала организацияли апрель базла бегIла гIергъиси сут бархIи халкьани-ургабси ветеринартала БархIиван кабизахъурли саби. 2000-ибил дусличибад бехIбихьили иличил дархдасунти далдуцуни дурадуркIули сари.
Россияла ветеринартала Бар­хIи 2014 ибил дусличибад бехIбихьили, августла 31-личиб дурабуркIули са­би. МицIирагла арадеш би­хIу­ти тухтуртала бузери бар­хIи­личи-бархIи чараагар­сили ва мягIничебсили бетарули са­би. Дунъяличир дакIудирути вайти излумани адамтиван ми­цIирагра дургули сари. Адамтала яшавлис илди излумани халаси зарал бирули саби.
Чейхъути, вайти излуми мицIирагла ургар тIинтI­хIе­диахъес багьандан, адамтани камли пикри бяхIчииуси, амма мекелли халаси хIянчи бирули саби ветеринарияла хIянчизартани.
Илдани бегIлара урехилати сарливан ветеринарияла хIук­муртазир чараагартили чедаахъибти вакцинацияби чула заманаличир дурадуркIу. МицIирагла арадеш ахтардибарес багьандан хIи адилтIа, ва илди лабораториябази ахтардидарахъес дурхьу. Чучи хъарти мицIирагличи че­хIе­руди биру, вайти чейхъути излуми тIинтIхIедиахъес чараагарти лерилра далдуцуни дурадуркIу. Ил гьар бархIила чилилра хIисабхIебируси бузери баралра камбиалли, халкь шакра хIебикили, мицIирагла ургар излуми тIинтIдирар, ва дахъал мицIираг цахIнар зя­гIип­диркур.
ЗягIипти мицIирагличирад излуми адамтачира чейхъути сари.
МицIирагла арадеш ахIерабирули бузути адамти, лебилрара-сера, халадеш агарти, гапхIебикIути, ми­цIи­раг­личи уркIецIичебти, чула хIян­чи дигути бирар.
Илдигъунти саби СирхIяла ахъти дубуртазиб мицIирагла арадешлис дахъал дусмазиб къарауйчиб тIашкабизурти Кьяр­­бачIимахьила багьадурти Мус­тапаев Рабазан Мя­хIям­ма­дович ва Баширов Кьади ХIя­жи­гIялиевич.
Рабазан Мустапаев 1966 ибил дуслизив акIубси сай. 1984 ибил дуслизиб шила школа таманбарили, гIярмияла къяяназиб къуллукъбарес арякьун. Улкала гьалабси чебла ахъили, 1988 ибил дуслизив МяхIячкъалала шила хозяйствола техникумлизи учIес керхур, ва илаб ветеринарла санигIят касиб. 1991 ибил дусличивад вехIихьили, ми­цIирагличибли чула яшавбирути шантала хIяйван-къа­чала арадешлис къарауйчи кайзур.
Вамсес хIебалуси, бузери дигуси Рабазанни шантала ва алавти махьурбала халкьла хIурматра баркаллара сархиб. Ил узухIели, дурарад кибти мицIирагличирад чехъили, хIяйванти зягIипдикибти анцIбукьуни диуб, заманаличир дурадуркIути, чараагарти далдуцунани излуми тIнтIдиахъес хIедатур.
2019 ибил дуслизив, Рабазан Мустапаев Кубачила шилизибси медпунктла заведующийли узес вехIихьиб. Илабра сунечи хъарси хIянчи чебетаахъили ва заманаличиб таманбирули сай, гIягIниси тяхIярли хIяйвантала арадеш гIеббурцули сай.
Илала валликьяна Баширов Кьади ХIяжигIялиевич 1970 ибил дуслизив акIубси сай. Илини 1988 ибил дуслизиб шила урга даражала школа, гIур МяхIячкъалализибси шила хозяйствола техникум белчIун. 1997 ибил дусличивад шантала хIяйвантала арадешлис къарауйчив узули сай. БусягIят иличи КьярбачIимахьила ва ГIяяцимахьила халкьла мицIи­раг­ла арадеш гIеббуцес хъарбикили саби. Сунела хIянчи дигахъу, заманаличир чараагарти далдуцуни дурадуркIу.
Шимазиб, бегIлара халкь­личи гъамти мераначиб, ми­цIи­раг­ла арадешлис къарауйчибти ветеринартала бузерили, халкьла арадеш мяхIкам­ба­рахъес имкан­бикIа­хъули саби.
Чучи хъарси хIянчила дурабад кIелра багьадурли шантала бебкIала, мекъла, гIяхIялдешла, къияндикибсилис кумекбирнила гIядатунира баркаллаличил дузахъули сари.
Сабигъунти саберхурти, хIянчилизиб бялхъяби саби илдала гIямрула гьалмагъуни Жаминатра Кьунайра. Илдани жа­гати хъали-цIа гIердуциб, дурхIни абикьур, шантала хIур­мат­личи ва баркаллаличи лайикьбикиб.
ИшбархIи, илдигъунти хIя­­­­лалси бузерила адамтала ба­­ракатличиб тIашли саби ду­нъя.
Рабазаннис ва Кьадис, илдачил барх лебилра мицIирагла арадеш мяхIкамбирули бузутас чIумаси арадеш, бузерилизир кункдешуни, хъалибарглизиб талихI дулгулра.
ХIушани алавтас буртIуси гIяхIдеш, хIушачи сагали чарбирули, гьарил шайчирад Аллагьли гIердуцаба.