(БехIбихьуд — 34 ибил номерлизиб)

Тухтур зягIиптала уркI­бази дирхалачеб­дешличил ацIили, ил­ди сагъбиран сай. Дуги-хIери, къиян-жапа, аргъла шуртIрачи хIер­хIеили, гьар замана, адамла гIям­рулис сахъли къа­рауй­чи тIаш­кайзурси, хIур­мат­чевси ва дурхъаси Адам сай.
Савли, сягIят 7-личиб, МикIхIила шилизибад гьар бархIи аргъ-бархIила шуртIрачи хIер­хIеили, Лавашала ЦБ-ла гIяйни тIашбилзан ПатIимат ГIяб­дурашидовала машина.

Мякьи цIакьти, дягIути, тIинтIти диалли, галга цIакьли би­рар, дягIлизибад урух­хIе­кIули тIашли бирар. Илдигъунти мякьи — дурхI­ни саби Хасбулатла Мур­тазагIялила. Лебтанилра че­бяхIси даражала багьуди касиб, гIяхIти жавабла къуллукъуначи абикиб. Илдала лугIилизирадси сари ПатIиматла неш УмурайхIянатра.
ГIябдурашидова ПатIимат БяхIянд­гIя­лиевна акIубси сари 1965 ибил дусла октябрьла 31-личир Лавашала районна МикIхIила шилизир.
1984 ибил дуслизиб илини МикI­хIила урга даражала школа таманбариб. ГIур Дагъистанна пачалихъла медицинский институтлизи карерхур ва 1991 ибил дуслизиб ил таманбариб. МяхIячкъалализир декIар-декIарти хIян­­­чурбачир рузиб. 1990-1991-ибти дусмазиб Ставропольла крайла Буденовск шагьарлизиб, дурхIнала тухтурла санигIят касес багьандан, интернатура таманбариб. 2000-ибил дусла сентябрьличирад 2004-ибил дусла августличи бикайчи аспирантурализир ручIи. ГIур гIилмуртала кандидат ретаур. 2016 ибил дусла декабрьличирад 2018 ибил дусла октябрьличи бикайчи, ДР-ла «Республикала дурхIнала реабилитацияла центр» ГБУ-ла бекI тухтурли рузиб. ПатIимат БяхIяндгIялиевна чебяхIси категорияла тухтур сари. 2020-ибил дуслизир ил «Рурибси тухтур» ибси хIур­матла уличи лайикьрикиб.
— ПатIимат БяхIянд­гIя­лиевна, сен хIуни тухтурла санигIят чеббикIири? ХIела бегIти, нешла узби-рузби, лебилра мугIяллимти саби. Илдала дякьличирад сен хIеря­кьунри? — хьарбаира илизи.
— 11 класс тамандариб­хIе­­ли, нуни васвасхIерикIули тухтурла санигIят чеб­бикIира, сенахIенну адамла гIямру дерцахъни бегIлара мягIничебси, дурхъаси, хIурматла баркьуди саби. Дунъяличиб адамла гIямруличиб ва арадешличиб дурхъасира гIязизсира селра агара.
ПатIимат БяхIяндгIялиевна — кагибти куц-кабизла адам сари. Жавабласи къуллукъличир ил кIелра байхъалара дус рузули сари, амма къантIси манзиллизир 15-20 дусцадхIи хIедарибти хIянчи дарес бажардирикиб. ПатIиматла ил бузерила гьунар саби!
***
2021 ибил дусла февральличив Ла­вашала азарханализи вякьунра. Вер­хIелра отделениела духIнарти, ЦБ-ла юрт-алавти хIянчи чедаиб­хIели, ПатIиматли­чила макьала белкIес пик­­рибарира.
***
ЦБ-ла бекI тухтурла къуллукъуни дузахъес каратурси бархIиличирад рехI­рихьили, ПатIимат азарханала бузери лутIи-хьулчилизибад барсбарес, нукьсандешуни агардарес, бузерила низам-кьяйда ахъси даражаличир диахъес, хIянчизартас гьар бархIилизиб кумекбирес рехIрихьиб. БекI тухтурла бекIлизи адицIути, дарсдургъути пикрумани паргъатдеш лугули ахIенри. «Селичирад рехIрир­хьу­сира? Чидил бируси?» — суалти лагдизур илала гьала.
ГIяхIси хIянчизарла кьасанала, пикрумала ахир хIе­би­рар. ПатIимат черикIла организатор сари. Илис бикьридеш дирули сари илала пергер баркьудлумани.
***
— ПатIимат БяхIяндгIя­лиев­­на, сен хо­зяйственный хIянчиличирад рехI­ри­хьи­ри?
— СенахIенну умудеш, зярхIси гьава, жа­­­гадеш, зягIиптала уркIи разибиэсти аги­-кьяйда, шуртIри агарли арадешра хIе­­би­рар.
Умудеш – арадешлис хьулчи саби.Азархана-алавси майдан къирли буцахъиб, заб-маркала шин тIашдизурли, шараби-кIув­ри детарути мераначирад илди шин дашахъес 138 метр­ла бухъян­деш­ла гIягI­ни­ахълуми кадизахъур. Дугила манзил азархана-алавси мер шалабарахъес чиргъмира лер дарахъили. Азарханала хъалч мегьла шифертани буцили саби. ЗягIиптачи гьаббакIес ба­кIиб­­ти кабирахъес, хасти ме­­ра­начилси биштIаси анхъ бариб. Илар жагали някьиш­­д­а­рибти, 13 скамейка кадихьили са­ри. ЦБ-ла гьалабси майдайчир вавначилти гIяхI­цад хъабни, гьар мерличир жярга-зекъ кадирхьахъес хасдарибти тIакьнира лер.
ПатIимат рузи ракIайчи лерилра дармунти халалгъуна сестрала кабинетлизир дири. Илди лерилра дарх дирутири ва гIягIнити дармунти декIардарес къиянни бири.
ПатIиматли ил масъала пикрилизи касили, дармунти кадихьахъес, илди мяхI­кам­дарахъес, гьамадли дургахъес хасти хъулри дарахъиб. Дармунти гьанна ЦБ-лис, шимала больницабас дедлугес гьа­мадли саби. График хIя­сиб­ли, черетаибси халалгъуна сест­ра Унайзат Чупановани больница, шимала боль­ницабира фельд­шерский пунктанира дармунтачил гIер­дурцули сари, ду­русли буралли, илди дуртIули сари.
***
БекI тухтурла лямцIгъуна хIер «Къалабаси кумекла» машинабала парклизиб тIаш­бизур: машинаби, илдала кьадар ахтардибариб, хIянчизарти белгибариб. «Къалабаси кумекла» 7 сагати машина тIалабдариб. Гьанна илди 4 участокличи, 4 бригадаличи дутIили сари. Илди, хIяжатбикибхIели, адамлис кумекличи дурадухъес мурталра хIядурли сари.
Машинабачир шилизибад больницализи баайчи декIси зягIипси гIевуцести медицинала лерилра гIягI­ни­ахълуми, дармунти лер: ЭКГ-аппарат — 13, Дефибрилятор — 5, Глюкометр — 5,пульсоксиметр —10, мешок Амбу – 10, кислородный баллон — 16, ИВЛ — 7.
Ил чараагарси къалабаси-хъярхъси, адамла гIямру уцахъуси хIянчи бирули, бузули саби. «Къалабаси кумекла» отделлизиб 4 тухтур, 8 фельдшер, 1 заве­дую­щий — МяхIяммад Мусаев бузули саби.
Больницализир 15-20 дусли хIе­да­­рибти хIянчи ПатIимат БяхIянд­гIя­лиевнани 2 дуслара 6 базлара манзиллизир дариб.
Марлира, хIянчи чебетаахъили би­ралли, ил хIед гIергъи башар, че­ди­хIяртли бирадли, хIезибад гьаббулхъан.
Игитуни бузерили саби абилкьути.
***
ГIяхIси хIянчила хьулчи — низам саби. Ил багьандан ПатIиматли низам-кьяйда ка­дизахъур. Гьарил хIянчизарлизибад су­нечи хъарси хIянчи заманаличиб ва че­бетаахъили бирахъес тIалаббирули са­ри. Азарханала хIянчизартази бузерили­зирти нукьсандешуначила ПатIи­мат­ли бу­сягIятал буру, заманаличиб бурибси духуси гъай-гIякьлу мургьилизи булхъан би­кIуливан, илди агардарахъес заманара бед­лугули сари. Ил руководительла духудеш саби.
МалхIямси девли адамла сегъуна-дигара уркIи кIантIибирахъу,умхьули мегь­ван, гьаргбиру. Бузери ункъби­кIу­хIели ва гьалабяхI башухIели, бекI тухтурла хIулбазиб умут лямцIбикIулри, ур­кIи­ли­зиб ванадешла лами пархбикIулри.
Лавашала ЦБ-лизир лер терапевтическое, хирургическое, педиатрическое, гинекологическое, родильное, реанимационное, инфекционное отделениеби.
Сагати хIянчизартани (бекI тухтур ва завхоз) верхIелра отделение­ли­зир дахъал хIянчи дариб. Лерилра гIягI­ни­ахъ­лу­ми­ра сагадарили, отделениеби ванати шин­ничил гIердуциб. Тамаша ахIену… ПатIимат бекI тухтур ретаайчи илар ванати шин лерти ахIенри! Палатабазирти кроватуни, убуш-чебуш, мебель ва цархIилтира ваяхI дарсдариб.ЗягIипти ара-сагъбирахънила устадешла даража ахъбуцес чекаризурли сари. Азарханала отделениебала жа­няхI­ла бяхIянази излумачила баян­та­чилти жура-журала стендуни черяхI­ка­хъи­ли сари.
Реанимационное отделение ара­гIеб­ли сагабариб, медицинала гIягI­ни­ти­гъунти, аппаратуни ИВЛ ва цар­хIил­тир­а, лерилра журала дармунта­чил гIе­ббуциб.
Ишдусличи бикайчи (2021 д.) Лавашала ЦБ-лизиб компьютерла томографияла кабинет лебси ахIенри. Кьаркьа излуми ахтардидарахъес, Лавашабад халкь рес­публикала больницабази ба­шутири.Ил секIал пикрилизи касили, Па­тIиматла сипта хIясибли, ЦБ-ла кIи­дерхI­ла юрт барахъиб: цаибил дерхI компьютерла томографияла кабинетунас, кIиибил – конференц-заллис хасда­рили сари.
Илини хIялалли, рархьли рузули 28 дусла медицинала бузерила гьуни ахъили сари ва халкьла баркаллаличи лайикьли сари.
Ну Лавашала ЦБ-лизи 60-70 дус вашулра. Ил заманала бухIнаб чумра бекI тухтур барсбиуб.
ГIядатла адамти, тухтурти, зягIипти кьабулбарили, илдала уркIила мурад барибхIели, ПатIиматла хIулбазиб мал­хIям­дешла лямцI гьанарулри, умути хIя­ла­нала ругер дяхIлизиб пархбулхъулри.
— БекI тухтурли рузес рехI­ри­хьиб­хIе­ли сегъунти пикруми акIуба хIе­ла бекI­лизир?
—ЛутIи-хьулчилизирад лерил секIал дарсдарес, халкьлара, тухтурталара, районна хIякимталара набчи бихьибси игьдибар марбарес, Лавашала больница республикала ва районна больницабала гьаркьятала къяянази дураэс…
Марлира, илини сунела пикруми-кьа­са­ни детерхахъур: районна азархана ша­гьарла куц-кабизличи мешуби­ка­­хъиб, ко­ронавирусла чейхъуси изала­ тIинтI­би­кIу­си ман­зил районна бахъал халкьла гIя­м­ру дер­цахъиб, сагати аппа­ра­тура тIа­лаб­­дариб.
Чихъли кьиматлабариб ПатIимат Бя­хIяндгIялиевнала хIялалси бузери Да­гъис­танна Правительстволи, арадеш мяхI­камбирнила Министерстволи илис ХIур­матла Грамотаби ва «ДР-ла рурибси тух­тур» ибси у дедиб. Илала бамсриагарси бузери ахъли кьиматлабирули, Да­гъистанна Правительстволи ва арадеш бихIнила Министерстволи ХIурматла Гра­мотаби дедиб.
ДурхIни бегIтала пахру ва давла саби, ПатIиматла ва МяхIяммадла 2 рурси леб: Муъминат ва Разият. Муъминат ДГМУ-ла педиатрический факультет таманбарили, ДРКБ-ла неф­ро­логический отделениелизир рузули сари. Илини аспирантура таманбарили, доктор ретаэс кандидатла хIянчи лу­кIу­ли сари. Разиятли ДГМУ таманбарили, рес­публикала стоматологияла поликлиникализир рузули сари.
Наб халаси баркаллаличил ва пахруличил бурес дигулра чейхъуси изала тIинтIбиубси манзил чула жан, хъалибарг мяштIхIедарили, чехIейуси, кавшес агарси душма бебкIала кьялшубазирад зягIи­птала гIямру дерцахъес дуги-хIери ца­дарили, гъабзадешличил бузути тухтуртачила, иш урехила бархибси манзил ЦБ-ла коллективлис бекIдеш дируси ПатIиматличила.
Изай халкьличи чябхъинти дируси ман­­зил, илдани устадеш чедаахъиб, яхI­-­сабур, уркIецIи-ряхIму, малхIямдеш, ка­­­­­бизалачебдеш дакIудариб. Коронави­рус­ла урехили лам­бикIуси манзилли Па­­тIи­мат Бя­хIянд­гIя­лиевна я уркIхIеиб, я му­кIур­хIе­ра­кIа­хъиб, или­чи ур­гIебли, микI­­хIен яхIли ил ур­кIи­чер­рариб, шандан аа­хъур.
Больницала реанимацияла отделениела заведующая Умукусум Ибрагьимовачилра ихтилатбарира:
— ПатIимат ГIябдурашидова — паргъатси, духуси руководитель ва пагьмучерси организатор сари. Нушаб дебали къи­янси манзил дуги-хIери больницали­зир сарри, медколлективлис бекIдеш ди­рули, илди уркIичеббирули.ДекIли зя­гIипбикибти, бебкIала бурушлабти Сагид Адуевла, БяхIянд БяхIян­довла, Ибрагьим ИбрагьимбяхIян­довла ва цархIилтала бебкIа­ли­зирад гIямру дерцахъира ва сагъбарили чула хъулрази бархьира.
— ЗягIиптас гIягIнити гьар се секIал сунела заманаличир тIалабдирули сари. Дила отделениелис дурхъати аппаратура тIалабдариб, дармунтачил тамай гIердурцулра, — викIи хирургическое отделениела заведующий Дауд Даудов.
…Сунела жан ахIерахIедарили, бамс­риагарли, кьяшмачи тIашсири ил, — буриб сунела ихтилатлизиб терапевтическое от­де­лениела заведующий МяхIяммадхIяжи Асадуллаевич­ли.
— Дила отделение илини дахъал гIягI­ни­ахълумачил гIеббуциб: сагати убуш-чебуш, шкафуни, тумбочкаби, кроватуни ва гIурра цархIилти секIайчил. Ла­­вашала азарханала тарихлизиб хIе­­биуси дурхIнас хасбарибси берк-бержла склад балли барахъиб, — буриб дурхI­нала отделениела заведующий Рус­­лан СултIанбековли.
— Коронавирусла чябхъинна манзил ЦБ-лизиб бекI­ли­биубсигъуна, мягI­ни­чеб­сигъуна хIела отделение сабри. Халасигъуна мах, инфекционный отделениеличиб сабри. ХIуша севан бажардидиркутири? – дугьаизурра инфекционное отделениела заведующий, тухтур инфекционистличи.
— Азарханала бекI тухтурли къалабаси ва хъярхъси тяхIярли коронавирусличи къаршити тяхIурти акIахъуб: инфекционное, дурхIнала, терапевтическое отделениеби — ковидный госпитальличи шурдатур. Ила чIянкIли коронавирусла изайзибтицун сабри ка­биркьути. Баркалла биаб ПатIимат ГIяб­ду­рашидовас дила бузерилис халаси кункдеш барнилис, — рикIи больницала халалгъуна сестра Унайзат Чупанова.
— Наб чуйнара Лавашала азарханализи кайхьес чебуркъуб. ПатIиматван зягIиптачи уркIецIичерси тухтур чехIе­раира. Обходла замана малхIямли гъай­рикIи, се челукьулил, нуша разилирал хьаррикIи. ЗягIипти сагъбарили чула хъалибаргличи бархьес къайгъилизир сари. ХIялалдиаб сунес, — викIи УллугIяялизивадси МяхIяммад ГIялиев.
— Устазлагъуна хIялалдеш чIумали минадиубси адам сари ПатIимат Бя­хIянд­­гIялиевна. Илизир бекIлил хам­деш-халадеш, уктемдеш-хIя­рамдеш агар­си Аллагьла вали сари, — викIи МикI­хIивадси пенсионер ХIяжихан ХIя­жи­ханов.
ПатIиматлис берхIила нурван, верхI-рангла зурхIябван рурхIуси талихI, къаркъаван чIумаси арадеш, разити ва духъянти гIямру, сунела бузерилизир сархибдешуницун диубли дигулра.