Ца бархIи телефонничи зянкъ дакIиб. ЗянкъикIуси дила вахъ­­хIила юлдаш, шко­ла­ли­зив набчил варх ца класслизив учIу­ли калунси, гьанна бикIуливан «од­нок­лассник», Миглакьаси­ма­хьила ад­­министрациялизив узули дахъал хIянчи дарибси МяхIяммадсягIид Мя­хIям­мадов сайри. Илини набчил яхши-хуш дарили гIергъи, Сергокъалала районна прокуратурала хIянчизарти хIе­чила хьарбикIули лебри, илдас хIу сен хIяжат­сирил багьес хIейубра или бу­риб.

МяхIяммадсягIидлис зянкъдяхънилис баркаллара багьахъурли, прокуратурала хIянчизартази дила телефонна номер бедахъес ва набчи илдази зянкъдяхъяхъес хъарбарира. 10-15 минут хIедикили, республикала прокуратурализирад зянкъ дакIиб. Прокуратурала хIянчизарли дила у, фамилия ва отчество хьардаили гIергъи, рахли вирадли (сунела у бурили) прокуратурализи къалабали вакIес хIяжатли саби или буриб. БуцIарси аргъла замана МяхIячкъалализи укьес, гьайгьайрагу, дила сегъуналра иштяхI агарсири.
— Сегъуна хIяжатдеш леба ну республикала прокуратурализи вакIес? — хьарбаира нуни илизи.
— РФ-ла Президент В.Путинничи, РФ-ла Генеральная Прокуратурализи ва ФСБ-лизи хIела шайзибад халаси ду­гьабиз-гIярза леб белкIунси. Ну­шаб хIе­ч­ил къаршидикили, ил суал бекI­ба­рес хIяжатси саби.
— Цаибилгъуна, илди хIукуматла органтази нуни сегъуналра гIярза ва дугьабиз хIебелкIунра. КIиибилгъуна, дила электронный почтализи яра Избербаш шагьарла прокуратурализи бакIахъая ил гIярза. Иличил тянишиубли гIергъи, нуни хIушаб хIяжатти суалтас жавабти лугас, — ира нуни.
— МяхIяммадмухтар, илкьяйда ил суал бекIбарес бетхIерар, хIу проку­ратурализи вакIили хIечил гъайухъес хIяжатси саби. ИшхIели кьанни са­би, жа­гIял хIу вакIадли, ну хIечи 9 ся­гIят­ли­чи­рад 12 сягIят дикайчи хIерли вирус. ВакIес къайгъибара, — иб прокуратурала хIянчизарли.
ГIергъила бархIи 9 сягIят дикибхIелира зянкъдяхъиб илини наб­чи.
11 сягIят дикибхIейс республикала прокуратурализи вакIира. Набчи зян­къи­кIуси прокуратурала хIянчизар наб гьуниваиб. Илала кабинетлизи да­кIиб­хIели, илини набзи белчIахъес дахъал кIапI­­разиб печатный хIурпрачил бел­кIун­си гIярза гиб.
РФ-ла Президентличи, Генеральный Прокурорличи, ФСБ-лизи Сергокъалала районнизиб хIербирути 100 адамла шайзибад гьалавла ДР-ла прокурор Рабазан Шагьнавазовличи къаршили белкIунси гIярза сабри ил. 100 адамла шайзибад или белкIи биалра, ил кагъар белкIунсини, чIянкIли дила у ва отчество сарри чедаахъибти. Сергокъалала шилизибси Батирайла уличилси кьакьализибси ца юртра гьанбушилри ил кагъарлизиб. Сергокъалала шилизив хIерирули калунси ахIенри ну гьачамалра. Къянала гIярзала асар сегъуна бирара? Сегъуналра хIебирар. Прокурорли узухIели, илини (Рабазан Шагьнавазовли) бузерилизир дарибти дахъал хатIабачила ва «бунагьуначила» белкIири ил кагъарлизи. Ил гIяйиблавирулри, сунела хIянчи пайдалабарили, урши Артур Шагьнавазов, ДР-ла Халкьла Собраниела депутат ветаънилизив. Дила пикрили, Артур Шагьнавазов Сергокъалала районнизиб хIербирути избирательтани чула тIамри дедили депутатли викIибсири.
ДР-ла Халкьла Собраниела депутат Артур Шагьнавазовли сай викIибти избирательтас сегъуналра кумек хIебариб или белкIири гIярзализиб. Дила Артур Шагьнавазовличи сегъуналра хIяжат­деш хIебиуб, я иличи гьачамалра дугьа­хIей­зурра. Амма чуйнара ил Серго­къа­лала районна администрациялизи ва­кIили, избирательтачил къаршивикибсири, илдала челукьути масъулти арзес ибси кьасличил. Илала дурабад, рес­публикализибси Д.Медведевли бекI­­дешдируси «Цаси Россия»-ла адамти кьабулбируси кабинетлизив Халкьла Соб­раниела депутат, гIядлу-зегъа далта­хъуси председательла заместитель Артур Шагьнавазовли чуйнара ила ба­кIиб­ти гIядатла адамти кьабулбарибтири.
ГIярзализир, «Черновик» газетализирад, Интернетлизирад касибти ва чили-биалра дурули дакьибти баянти, Рабазан Шагьнавазовла бузери бал­тIу­ли, делкIири.
Рабазан ГIябдусамадович Шагьна­ва­зов­ли сай акIубси Сергокъалала район­на Мургукла шила шантас дебали да­хъал гIяхIдешуни дариб (шилизи газ ар­букахъиб, Кьялцнау бикIуси мерличибад Мургукла шилизи кабаайчи гьуни къир­ли буцахъиб). Баркалла биаб сунес сунела шантачи пикривикIнилис. Амма… Илгъуна имкан бурги илала Сергокъалала районнизирти цархIилти шимасра гIяхI­дешуни дарес. Мисаллис гьанбушалли, «Ванашимахьи-УбяхI МулебкIи» гьуни (реконструкция) сагабирути хIянчи 9 дус гьалар дехIдихьибтири. Гьаннара бай­хъала гьуни къирли бурцути хIянчи та­мандиубли ахIен. УбяхI МулебкIила администрацияла шимази газ арбукес турбаби кадирхьули бузути хIянчизарти Мургукла шилизи газ арбукес арбякьун ва гIур ила чархIебиуб. Гьаннара агара мулебкIантала хъулразиб газ.
Рабазан ГIябдусамадович Шагьнавазовличил ну гьачамалра — я ил республикала прокурор ветаайчи, я прокурор ветаурли гIергъи — чинавалра къаршивикибси ахIенри. Илала бузери балтIули иличила гIярза белкIес наб сегъуналра сабаб агара.
Иличила белкIунси гIярзализиб, гьанна мицIирли агарси, Избербашлизив хIерирули калунси, ихтиюрти далтахъути органтазив, шагьарла администрациялизив ва гIергъити дусмазив регистрационная палатализив узули калунси дила бажа ГIялиасхIяб БяхIяммаев Рабазан Шагьнавазовла юлдаш вирусири или белкIири. Илаб тамашабизеси сел­ра агара. Хала хIякимтала юлдашуни ба­хъал бирар.
Рабазан ГIябдусамадович гьанна рес­пуб­ликала прокуратурализив узули ахIен. Гьанна иличи гIярзикIнира бархьси саби или гьан­хIебиркур. Сен ил рес­пуб­ли­кала прокурорли узухIели, сунела у дигIянхIебарили, гьанна бархьдеш дигу­си гIярзачини, гIярза хIе­бел­кIунсири? Ра­­базан ГIябдусамадович дебали ункъли ва­луси, иличил шадибгьундурачив къар­ши­виркуси, илала бузерила гьунира гIям­ру­ра далуси адамли белкIунси саби гIярза ибси пикрира бакIиб бекIлизи.
Сен ил гIярза дила у гьанбушили белкIунси?
50 дусцадхIи нуни журналистла хIянчи бузахъусири. Гьачамалра урхIла уличил я макьала, я дугьабиз, я гIярза хIебелкIунра. Бири набчи урхIла у кабикахъили гIярза белкIахъес башутира «хIед магарич бирехIе» или. Илгъуна «кьяшмиагар» гIярзала сегъуналра цIакь-гьунар лебси ахIен.
Дила уличил, чичилалра къалпла гIяр­заби лукIес хIяжатли ахIен!!!