«Замана» газетали ил къулбасбирантала, бучIантала гIямрулизиб мягIничебси мер бурцули саби. Ил акIахъубхIейчирад 100 дус дикниличил бархбасахъи, наб ишар гьаладихьес дигулра цацабехIти машгьурти даргантала «Замана»-личила пикруми.

ДурхIяхIейчивад «Замана» газета бучIуси, студентхIелира ил агарли уэс хIейруси, Дагъистан Республикала урибси юрист ГIялихIяжи МяхIяммадрасуловличил ил масъалала черкад ихтилатрикIули калунра: «Газета хъули кабухайчи, гьар жумягI бархIи хIерли вирус. Ил белчIайчи селра цархIил хIянчира хIебирис. Иличила дила дахъал гIяхIти пикруми алкIан. Буралли, газетала бяхIяназиб ахъхIебуцибси масъала хIебирар. Илар гьаладирхьу гIяхIти адамтачила очеркуни, тамашала хабурти, машгьурти спортсментачила белкIани, биштIати дурхIнас хасдарибти макьалаби… Илди лерилра нуни халаси иштяхIличил дучIулра, ва илди далкьарахъули бузути лебилра коллективлис уркIи-уркIилабад баркалла балахъулра.
Хъярбукла школализив директорли узухIели, нунира лебилра мугIяллимтази ил къулбасбарахъес маслигIятбирусири. Уркарахъив судьяли узухIели биалли, ил гьар дус дила арцлис лебилра хIянчизартас ва цацадехIти школабас къулбасбирира. Иличибра баркаллала хIянчи лебсив адамлис? Баркалла бикIутира камли ахIенри».
«Орленок» газетала бекI редактор Басират ХIусейнова: «Дила дудеш, Ильяс ХIусейнов гIяхIцад дусмазив ил газетализив узули калун. Илини хъули дихутири сагати газетаби ва нуша диштIати дурхIнас илди дучIутири. Ил багьанданра, нуша шагьарла дурхIни диахIелра, ункъли дарган мез далира. Дудешли нушаб дучIути сагати хабуртачи лехIирхъес дигахъехIери.
Нешла узи МяхIяммадсягIид Мусаев ДГУ-ла филологияла факультетла преподаватель сайри, илкьяйдали – школабала жузала авторра. Илра «Замана» бучIахъес, дарган мез дагьахъес даим махикIи. Гьанна илди кIелра гIямрулизибад арбякьи, нуша-ургаб мицIирли агара, амма ну мурталра илдас рулгусира дарган мез ункъли дагьахъни ва газеталичи диги акIахъни багьандан. Илис биэс, нуни кIел газета акIахъубтира: «Орленок» ва «Учительлис». Газета бузахъес гьамадли хIебиънира балулра. «Замана» газетала байрамличил, сагаси, жагьси коллектив, илала бекI редактор мубаракбирулра. ГIуррара лукIахъес, дузахъес хIушаб ЧевяхIсини ахъри габ!»
Наб ишаб дила гIямрулизиб кабикибси ца анцIбукьра гьанбушес дигулра. Нуни дудеш­ла гъятIбиибси юрт сагабирахъулри. Хасти гIягI­ни­ахълуми шилизи ардухира. Гьалар халати, дабзти зехнуби дирутири, бурхлизи кадирхьути. Ну чина-дигара раира, илдигъунти даргес хIериубра. «Рельсаби далгесра вируси сай», — викIар уста. МяхIячкъалализирад рельсаби ардухес хIяжатлири. Илди ардухесра чула багьаличи абиркулри. Биалра, камаз баргили, шилизи гьайбарира. Уркарахъи ретаибхIели, наб дигуси «Шила гIямру» газетала рекдакциялизи арицIули рираси. Иш яргализирра илгъуна барира.
«Халаси камаз аркулригу шилизи», — иб редакторли. «ГIе, ца ил рельса багьандан аркуси саби», — жаваб чарбатурра. «Улас, дила рузи, Хъярбачи ва Хуршни архути «Замана» ва «Шила гIямру» газетаби лер. Илди ардухес машина баргес дирули ахIенра. Кумекбарагу, хIела камазра бацIли саби, ца рельсали буцибси мерра халаси ахIен», — буриб илини. Ну разирикира. «Замана»-ла халати кIел-хIябал кьани дицIесцад бекIни лерри, илдицад – «Шила гIямру»-лара. Чумал адам алавбакIили, илди машиналичи кадихьиб.
Араира КIишала шилизи. Илав Ибрагьим варгира. Илра дила махличи тамашавиуб.
БархIи гIелабиркуси замана сабри. Ахирра-ахир шилизи раира. Гумайла машина тIашаахъира. Газетабала бекIа ахIенси чебиуси агара. «Аминат ГIябдулманапова, ишди газетаби хили камазличил ракIибсирив?» — или дукарбикIутири гумайлабти. Почтала начальник ва цархIилти илгъуна баркьудиличи уркIбухъири. «Дайхъала Хуршни даахъес хъарбариб», — рикIулра ну. Жагьилтани рельсара дила гьаргала баахъиб. Амма шилизиб гIяхIцадхIи хабар бурули калун, секьяйда «Замана» газетаби ардухес Аминатли камаз буцибал. Илгъуна хабар тIинтIбиубхIели, набра дигеслири. Нуни нушала даргала «Замана» газетала халаси хIурматбирусири ва гьаннара бирулра. ИтхIейчирад 20 дус дикили сари, амма хъярбукантас, мегьла устни биалра, газетаби-журналти дучIес дигахъу, гьаннара илди къулбасдирули сари.
Дила рузила мурул МухIумма Рабадановра мегьла уста сай. Мурталра илинира, шагьарлантас хъалчлис хIяжатти гIягIниахълуми ва турбаби дирнила дурарад, «Замана» газетара бучIуси саби, ил сабухайчи хIерли вирар. Сунела дурхIнасра дурхIнала баркьибтасра, сай-алав кабатурли, иларти белкIани дучIа. ЦацадехIти макьалабала чевкад набчира рах-рахли зянкъикIар, сунела пикруми дурули.
ГIяхIцад леб нушала культураличи гъаргъти, газетаби-журналти дучIути дарганти. Берхъаб саби гIуррара! Берхъаб нушала газетара, ил бузахъантира! Илала байрам, нуша лерилра даргантала байрам саби.