Арбякьун нушала гIям­рулизибад ца­гьа­тIи дус — 2020-ибил. Ахъушала районнис ил се­гъуна уббухъунал, 2021 ибил дуслизир дарес дал­ду­циб­ти сегъунти хIянчи лерал багьес кьасличил чумал суал дедира «Ахъушала район» МО-ла администрацияла бекI ГIяб­дул­каримов МяхIяч Кьа­дие­вич­лизи.
— МяхIяч Кьадиевич, 2020-ибил дуслизир районнис, гьар-чинаралра кьяйдали, къияндешунира камли хIедурги? Диалра, сегъунти сархибдешуни диахъес имканбакIиба?

— Ашкарли кьяйдали, хапли чебакIибси коронавирусла изай нушала районнисра ма­съулти им­­цIадиахъуб, далду­цибти хIян­­чи заманаличир дехIдихьес хIе­д­иубти анцI­­букьунира диуб. Иличи хIер­хIеили, районна мер-мусаличир дахъал сагадешуни диахъесра имканбакIиб. Илди хIянчи детерхахъес хьулчили бетаур район чула халаси кьадри лебти проектунази каберхахъес бажардидикни: «Шагьарла къулайти шуртIри», «100 школа», «Дила Дагъистан – дила гьундури», «Дила Дагъис­тан – дила шин», «Мерличирти сиптаби» ибти умачилти. Ца­цадехI объектуначир Дагъис­тан Республикала арадеш бихI­­нила, шила хозяйствола, ба­гьудила, спортла министерст­во­бачил дархти проектуни хIя­сибли хIянчи детерхур.
«Шагьарла къулайти шуртI­ри» бикIуси проект хIя­сиб­ли хIянчи дурадеркIибти сари районна площадьличир, Устаз ГIя­ли-ХIяжила уличилси кьакьализир, ХIямшимала ва Му­хIела шимазир. Ахъушала шилизирти чумал кьакьа къулайси агиличи душибти сари: ГIялимяхIовла уличилси, МФЦ-ла филиалла юртла гьалабад бехIбирхьуси; гьалаб — Ленинна уличилси колхозла, гьанна «Ахъуша» СПК-ла контораби лерси мерличи бикайчи ва Хъарша аркьуси. Илди хIянчи детерхур «Дила Дагъистан – дила гьундури» бикIуси программала дазурбазир. Ишаб наб бурес дигахъаси Хъаршаб хIербирути адамтала къайгъначилара — мер-муса гIяхIдиахъес: чула бухIнаб вягIдалабиубли, дуракабухъи бузули, хъаршукли гIяхIцад хIянчи дариб, «Ахъуша» СПК-ла руководитель Мя­хIям­мад ГIяйсамирзаевли ил­ди хIянчилис бекIдешдариб. Чу­ла шиличи, шантачи уркIи изути адамти лебни дебали­ гIяхI­си саби. Илдигъунти адам­ти гьа­рил шилизибра леб, хаслира МухIела, Усишала, ТIе­бек­махьила, АметеркI­ма­хьила, Кур­кила, ХIинтIала ши­мазиб ва махьурбазиб.
«Мерличирти сиптаби» бикIуси программа хIясибли районна центрлизирти гьундури, кьакьурби къулайси агиличи душибти сари. Илдигъунти хIянчи районна шимазирра дурадеркIили сари, мисаллис буралли, ХIямшимала, ТIе­бек­махьила, Шукьтила, Бур­хIи­мя­кь­махьила шимазир мини-фут­болла майдунти далкьаахъурти сари. Гьебала шилизирра мер-муса къулайси агиличи дуршнила шайчирти хIянчи детерхур.
2020-ибил дуслизир районна лерилра шимала гене­ральный планти дирнила хIянчи бекIдиуб. Ахирличи ди­киб шимала гьундури хIи­саблизи кайснила шайчирти хIянчира. ДР-ла арадеш бихI­нила Министерствола ку­мекличил Урхьучимахьила ва ТIантIала шимазир сагати фельд­шерско-акушерский пунктани абхьиб. Спортла Ми­нистерствола кумекличил Уси­­шала шилизиб футболла хIя­занас гIяхIти мер-муса далкьаахъурли сари. Кьассагумахьила ва Уси­шала шимазир спортлизи ахъес дигутас лерилра шуртI­ра­чилти майдунтира хIя­дур­да­рибтири.
Илкьяйдали, Му­хIела шилизи аркьуси гьуни къирли кабуцибси саби. Лайикьси агиличи душибти сари Ахъушабад Дубримахьилизи аркьуси, Узни — ХIинтIа гьундурира.
— МяхIяч Кьадиевич, гIер­гъи­ти дусмазир гIяхIти дарс­дешуни детаур районна багьудила учреждениебазир. Се ба­рес имканбакIиба ил шайчиб ар­бякьунси дуслизиб?
— «100 школа» бикIуси программализи кадерхахъуртири МухIела С.Кьурбановла уличилси гимназия, БурхIимякьмахьила, ТIебекмахьила урга даражала школаби. ХIябалра багьудила учреждениелизирти хIянчи заманаличир хъараахъур. 20 школализир дурадеркIибти сари учительтас ва бучIантас шуртIри ункъдиахънила, хаслира ванадеш гIеббуцнила шайчир: Гумрамахьила, Кавкамахьила, Кертукмахьила, КургIила, Бутрила, Уллучарала, Дубримахьила, Цугнила ва цархIилтира. Чумал школализир хIянчи детерхур «ГьаладяхI даш­нила дамкъни» ибси уличил­си проект хIясиблира. ХIя­бал школализир классуни ва­на­дирахъути гIягIниахълуми са­га­дирнила шайчир хIянчи дура­дер­кIибти сари.
— «Шимала мер-муса гьа­ла­дяхI дашахъни» бикIуси прог­­­рамма хIясибли дарибти хIян­­чила чебкадра бурили дига­хъира.
— «Шимала мер-муса гьа­ладяхI дашахъни» бикIуси ДР-ла шила хозяйствола Министерст­во­ла программа хIясибли, районна 8 шилизир сагати объекту­ни дирнила шайчир хIянчи детер­хур: АметеркIмахьила, ХIерх­махьила, Дубримахьила, Ур­гу­бамахьила, Урхьучимахьила, БурхIимякьмахьила, Усиша­ла, ГIинзимахьила халкьлис, хас­лира жагьилтас, разидешли бе­таур мер-муса къулайси агиличи душни, мини-футболла хIяз­ли биркьахъес майдунти дал­кьаахъни.
— ДекIар-декIарти проектуни заманаличир де­терха­хъ­е­с­ къайгъибарибтира гьанбушал­ли лайикьли хIебирив?
— Чедир гьандушибти объектуначиб бузули калун предпринимательти З.ГIисякьовла, М.Бя­хIяндовла бекIдешлиуб бузути ва «Монолит», «Альянс», «Прогресс», «Гермес», «Акушастройсервис», «Академия спорта» ООО-бала хIянчизарти. Чу­чи хъарси хIянчи заманаличиб, че­­бетаахъили таманбирутас бар­­калла хIейкIес хIейрар! Чи виалра баркаллаличи лайикьси сай, сунечи хъарси бирули гIер­гъи.
— Сегъунти программабази каберхурли Ахъушала район 2021 ибил дуслизиб?
— 2021 ибил дуслизир районна мер-мусаличир чумал программа хIясибли хIянчи детурхар. Илдазибад имцIали мягIничебси саби «Дила Дагъистан — дила шин» бикIуси. Ил программа хIясибли хIябал шилизи шин дукес пикри саби — Усишала шилизи — 12 километрла, Кьассагумахьилизи — 14,2 километрла, ТIантIала шилизи — 4 километрла бухъяндешличи. Ил программа хIясибли, 2020-ибил дуслизир МухIела шилизи шин кибтири.
Илкьяйдали, мер-муса къулайси агиличи дуршнила, адамтази бамсри ихъахъес багьандан хIянчи дурадеркIили дирар Усишала, Урхьучимахьила, ХIинтIала, ТIебекмахьила, ЧебяхI МулебкIила шимазир. Илди хIянчи детурхути сари «Шагьарла къулайти шуртIри» бикIуси программа хIясибли.
ХIядурдарили документуни лерти сари, районна центрлизиб сагаси поликлиникала юрт ва БурхIимякьмахьилизиб дурхIнала анхъ тIашдатахъес багьандан. Иншааллагь, адамти разибарес саби нушала кьас.
— Аллагь икьалавиаб!
— Баркалла!