Кавказла дубуртала дай уркIилизиб минабиубси Дагъистай бахъхIиагарли дебали мягIничебси байрам дурабуркIу — Дагъиста халкьла цадешла БархIи. Ил байрам чIумати гьалмагъдешла, цала цали хIурматбирнила лишан саби, сабира нигIматла ванзаличиб хIербирути декIар-декIарти миллатунала, мезанала ва динанала вакилти дахъал рангличилси кьалтиннизи цалабирхъуси гьимирли бетаурси. Гьар дус сентябрьла 15-личиб дурабуркIуси байрамли республикала тарих давлачебси, илкьяйдали Дубуртар Улкала культура урхIмешули ахIенси биъни чебиахъули саби.
Мезанала, гIядатунала ва культурала жагадешлизибад някьишбарибси суратгъуна саби нушала Дагъистан. Илизибгу республикала цIакьра тикрархIебикIуси жагадешра. Гьарил миллатла вакилли чула цIакь цадешлизиб биъни жявлил аргъибси саби. Миллатунала цадеш, дубурлантала узидеш кьиматладарести дугьби даргесра гьамадли ахIен. Хасси байрамли гьарил дагъистанланнизи гIямру-яшавла кабиз, рухIла давла, даршудеш мяхIкамли дихIни дебали мягIничебси биъни балахъули саби.
Гьаннала замана, дунъяла къакъличир кадиркути анцIбукьуни хIисаблизи касалли, даршуси аги калахънила шайчиб Дагъистан гIибратли бетарули саби. Дубуртар Улкали лебил дунъя вегIла хасдешуни мяхIкамли дихIяхънила искусстволичи бурсибирули саби.
Дагъиста тарихлизир халкьла цадешла бикьруми камли ахIен. Дагъистанланти узидешличибли, цали цала уркIи иргъниличибли, кумекличи музабухъес гьалакти биъниличибли машгьурти халкь саби. Халкьла цадешли дубурлантази дахъал къияндешуни ахъахъес, чябхъинти дурадуркIути душманти бячIахъес чуйнара кумекбарибсири. Халкьла цадешли биалли, Дагъистанра гьалабяхI башахъни гIячихъли иргъулра нушани. Дубурлантала гьалаб гIур цархIил тяхIяр агара ца гьунчибад барх башни ахIенси.
Гьайгьайрагу, халкьла цадеш Дагъистан Республика экономикалашал гьалабяхI башахънилис ва сархибдешуни дирахънилис сабаблира бетарули саби. Нуша декIарти диубли хьалли, цаличил ца дебати бархбасуначилти адамти диъни чебиахъули саби ил байрамли.
Цадешлизир сари нушала цIакь ва пахру. Ил байрам даимлис уркIби ванадируси ламили калаб.