Нушала редакциялизир гьа­ман дявила хасси балбуцла бутIакьянчибачил гьуни­баъ­ниби детурхули дирар. ГIяхIладли гьаб­бикIути дарган уршбира декIар-де­кIарти районтала вакилтили уб­бул­хъан. Амма чидил районна вакил виалра, илди дарган мез­ли (чула лу­гъатли биалра) гъай­би­кIес бални ди­геси анцIбукьли уб­булхъули бирар. Чеал­­кIуси наслулис илдани дявила гьу­­нар­тачилцунра ахIи, дурхъати неш­ла мез далнила ва рухIла давла мяхI­кам­ли бихIнила шайчибра гIибратли бе­та­рули саби. Иличи пах­ру­хIе­ба­рес­ра хIейрар.
Нуни гьалабра сунечила бурибси Сер­гокъалала районна Миглакьасима­хьилизивадси СВО-ла бутIакьянчи, лейтенант ИштIалбяхIяммаев МяхIям­мад ГIябдулкьадировичра ил шайчив цаибси мисалли ветаур. Иличилси гьунибаънили нушала лебталалра уркIбачи халаси асар барни багьандан, иличила газета бучIантази гьачам-гьатIи гьанбушесра дигиаур.
Нушаб, редакцияла хIянчизартас, дебали гIяхIбизурсири МяхIяммад умули чула лугъатла мезли гъайкайкI­ни. Буралли, ихтилатлизир илини ца-хIябал сарри урус мезла дев гъудурдарибти, илхIелира – терминти, сарира дарган мезличил дарсдарес хIейрути.
Лебтасалра челукьуси масъала сабливан, нушани гьарил гьу­ни­баъ­­нибачир, дигалли СВО-ла бутIа­кьян­­чибачилти, дигалли гIялимти-му­гIял­лимтачилти гьунибаънибачир бегI гьалабси яргализиб нешла мез руркънила, далнила ва мяхIкамдирнила масъала ахъбурцули дирехIе. Ил багьандан, иш яргализибра, МяхIяммад ИштIалбяхIяммаевлизира дявила хасси балбуц бетурхути мер-мусаличир илис нешла мез селис-биалра хIяжат­дикибал-ахIенал багьес дигули ахъира. Илини уркIилизи атIести дугьби дурибхIели, разидешлис ахир аги. «Нушани СВО-ла мер-мусаличир дявила хъарбаркьуни тамандирухIели, душмайчила баянти цаладирхъухIели, декIар-декIарти кьукьназиб дарганти лебли биалри, илдачил бархбасуни кадизахъурли, гъайдикIутири. Нуша урус мезли гъайхIедикIули, нешла мезли баянти дурнилизиб халаси кумек бетарулри: илдазибад Украинала миллатчибани биалли, селра иргъули ахIенри», — иб гIяхIгъабзани.
Жагьил адам виалра, М.ИштIал­бяхIяммаевли халаветаибси адамливан гIямрула хIял-хIякьикьат далулри. Илкьяйда биъни белгибиуб иличилси ихтилатлизиб.
Дявила хасси балбуц бехIбихьиб­хIели, нушала улкализиб адамти гIяскур­тазиб къуллукъбирахъес жибирнила (мобилизация) хIяракат бехI­бихьибсири. Ил хIяракатла дазурбазив, МяхIяммадра СВО бетурхуси мер-мусаличи ваиб. Ил кIина вяхъиб, гьаланачи кункли, кьяшлизивад, гIур биалли, декIли. Ургъанни буруливан, гьужум бетерхурси мерличивад сай дурасес, Бурденкола уличилси Москвализибси госпитальлизи ваахъес бархкьябани дебали халаси кумек барилри. БусягIятла замана илини, арадешлизир нукьсандешуни лерни багьандан, Каспийсклизибси дявила частьлизиб бузери даимбирулри.
Ихтилатла дазурбазиб, нушани багьурра илис гьатIира операцияби дарес хIяжатли биъниличила. Амма ил сагадан дявила хасси балбуц бетурхуси мерличи чарухъес хьуликIулри. ХIера, илдигъунти, алкIу-алкIукад хIи­ли­зи гъабзадеш гъудурдиубти, Ва­тIай­чи дигичебти, асил уршби саби нушала.
Командир сайливан, дявила хасси балбуцлизир детурхути лерилра аги-кьяйдаличила бурухIели, МяхIям­мадли нушази аргъахъиб сунечил барх бургъути – урус виаб, цархIил миллатла виаб – лебилра уржили, узбиван вяшбикIниличила. Дявила къуллукъуни тамандирухIели, гъаб­задеш дакIударни багьандан, М.Иш­тIалбяхIяммаев чумра шабагъатличира лайикьикили сай: Жуковла ва Суворовла умачилти медальтачи, «Минаби уркасни багьандан» бикIуси медаль ва цархIилтира.
МяхIяммадла гъай хIясибли, дявила ибкьти аги-кьяйда ва къияндешуни ахъес багаладирулри, уркIила гьав ахъбурцулри улкала декIар-декIарти мераначирад дашути кумекуни (гуманитарный), илдачил дарх школала бучIантала кагъурти.
МяхIяммад ва иличил бархти лебилра бургъанти ишхIелла манзилла игитуни саби, чулира чеалкIуси наслулис шаласи челябкьла, кьисмат лукIути. Арали калабая!