Ишцадра замана дебали барсбиубхIели, лебилра телефонтази ва компьютертази бухIнакабикибхIели, жу­зи ва газетаби-журналти дигути адамти къар­шибикалли, уркIи разибирар. БегI гьалабси яр­га­ли­зиб сенахIенну илдигъунти адамтани нушани би­ру­си хIянчи чихъли кьиматлабирниличила иргъу­хIе­ли.
Сецад хIейгеси биалра, газетаби-журналти дучIути ва къулбасдирути дусличи-дус камбикIули са­би. Калунтира, имцIаливан дубурла шимазиб хIер­бирути гьести гIямрула адамти саби. Амма ну­шала газета бучIути-ургаб шагьарлантира леб­ни­личи пахру хIебаресра хIейрар.
ГIяхIцад дусмас гьалар шилизирад МяхIячкъалала шагьарлизи гечриубли хьалли, хала бегIтала дурхъати гIядатуни чекаризурли дузахъуси дубурлан пергер хьунул адам сари ГIязизова Разигет Кьадиевна, машгьурси поэт-сатирик ГIязиз Иминагаевла урши Мя­хIям­мадла гIямрула рархкья. ШягIирла пагь баибси урши МяхIяммадлира халаси устадешличил назмурти цаладирхъутири (гьанна ил мицIирли агара, сунела бунагь-хатIа уркадуц). Хьунул Разигетли илди лерилра уркIиличир далутири ва гьаннара далули сари. Тяп илкьяйда биъни белгибиуб, «Азила назмурти» би­кIу­си жузлизиб васвасъала алкIахъути дугьби някъ­ли делкIунти белкIаначил цугдиркахъули лерли, се­рил хьарбаибхIели, илини итмаданал балкIси дев бархь­ба­риб­хIели. Ил тамашахIейэси анцIбукь ахIен: кьис­мат ца­барибти кIелра бархкья ца гьунчибад цаван ганз­бикI­ни.
«ЖагьхIелил акIубти сари набзир жузачи, газе­та­бачи диги. ИтхIейчирад илди дила гIямрула шал­да­ли­ра детаур. Гьаннара дебали дигахъис дарган мезла поэ­зия ва проза. Гьар жумягI газетаби хъули ка­ду­хай­чи хIерли рирус, илдазиб се сагаси лебал бел­чIес дигули», — хIера, илкьяйда рикIар Разигет ГIя­зи­зо­ва, су­нела гьалабси «Замана» газета са­бир­хъули ва бу­чIу­ли.
Илала дурхIназибад нуни багьурра газета илини гьачамцунра ахIенну, кIина-кIина, хIяйна-хIяйна бучIули риъни. КIинайс биалли, гIяхIбизурси макьалаличила чузира хабар бурули риъни. ЦацахIели биалли, нуша хIянчизартани дамсурли убкалахъунси ца хIярпла хатIа биалра, илини гьарбирули сари. Илдигъунти газетаби хIярп-хIярпли дучIути адамтачи пахрухIебаресра хIейрар: рухIла давлаличи чула дигили илдани чеалкIуси наслулисра гьуни шалабирули саби.
Баркалла, Разигет Кьадиевна, нушала газета къулбасбирнилис ва бучIнилис. Бахъбааб хIугъунти дарганти – миллатла мезла ва культурала хазна мяхIкамбирути ва кьиматлабирути!