Хайдакьла районна бекI Запир ХIясановли ва ДР-ла Халкьла Собраниела де­путат Кьурбан ГIялиевли рай­он­на администрациялизиб дявила хасси балбуцла бутIакьянчиби ва илдала хъалибаргуни кьабулбариб.
Илкьяйдали балбуцлизир бу­тIа­кьян­деш дариб: мас-мулкла ва ван­зурбала шайчивси бекI­ли­виуб­си­гъу­на специалист М.Рабадановли ва юридический отделла бекI Б.Кьа­дир­бековли.
Мажалисла шилизирадси СВО-ла бутIакьянчила дурхIнала хала неш хъули газ букахъес ибси тиладиличил дугьаризур. Хасти кагъурти лерли хьалли, газ матъал аркнила шайчибси пачалихъла программа илини пайдалабарес гьанналаур риубли ахIенри. З.ХIясановли ил суал арзахъес специалистуначи хъарбариб. Кь.ГIялиевли биалли, ил масъала сунела хIерудилиу касиб. «Нуша иличил гIурра гъайдулхъехIе. Лерилра баянти хIердарили, хасти къуллукъунала хIянчизарти тIалаб­бирехIе. Пачалихъла программа пай­далабарахъес кумекбирехIе», — буриб депутатли.
Дявила хасси балбуцлизив алхунси бутI­а­кьянчила неш, Жавгъатла шилизирадси Марзият МяхIям­ма­до­вара хъули газ лебкнила ва урши алхи гIергъи, кайсути арцла шайчирти суалтачил дугьаризур. Хьунул адамла кIиэсил суал арзес багьандан, Хайдакьла ва Дахадаевла районтала шайчивси дявила комиссар ГI.СягIидов тIалабвариб.
Родниковый шилизирадси Халисат ГIябдуллаевани СВО-лизив вет­кахъибси урши варгахъес тила­ди­бариб. Урши веткахъили сай ибси хабар бакIили гIергъи, ца баз ди­кибхIели, алхи сай или багьа­хъур­сири, амма гьаннара илала къел-хIерзи нушачи даахъили ахIен рикIулри ил. Ил дугьабиз хIер­бирули, хасти ихтиюртала ор­гантачил бархбас бузахъес ва масъала арзес къайгъибарес З.ХIя­сановли ва Кь.ГIялиевли чесиб.
Лерилра масъулти арзайчи, илдани дугьабизуни чула хIерудилиу касили дирар.