ИшбархIила къиянси замана, сабухъ башахънилизи халаси пай кабирхьули бамсриагарли узули сай пергер гъабза МяхIяммад ГIямаров.
Ил акIубси сай Лавашала районна Кьакьамахьила шилизив, гIядатла дубурланна хъалибарглизив. ВиштIали левай, узби-рузбазивад халалгъуна сайливан, илини бегIлара къиянти хIянчи дирутири.
ХIушанира балуливан, Кьакьамахьила ши капустала сабухъ башахъниличибли машгьурси саби. Ванзаличи диги илала виштIахIейчирад акIубтири. Авлахъла хIянчи дирнила дурабад, ил бажардииркулри ункъли учIесра ва школала гIямрулизир жигарла бутIакьяндеш диресра. Мур­талра илала сурат хIурматла урукьуйзиб би­ри. ГIяхIти кьиматуначил школара белчIи, В­атIа гьалабси чеблара ахъили, ил декIар-де­кIар­ти са­нигIятуни дузахъули, районнизив узес ве­хIи­хьиб.
ГIяхIцад дусмазив районна телевидениялизив узули калун. ИшбархIи ил районна культурала управлениелизив операторли, школала хозяйство къелгIеббикуси хIянчизарли ва мукъри, илкьяйдали декIар-декIарти далдуцуни камераличи кайсули, жигарчевли узули сай. Дахъал дусмазир гьандиркахъули калахъесли ва гьар замана хIерикIес иштяхIдухъесли жагали мукъри, школала вечерти ва цархIилти далдуцуни кайсу илини.
Буралли, ил машгьурси капуста дашахъанра сай. Азгъиндеш агарси пергер дубурлан акьули кайили хIевъар. МяхIяммад дарган мез гьаладяхI ардукес акIахъубси «Даргала Анкъи» бикIуси жамигIятла хIяракатла жигарла бутIакьянчира сай. Халаси къайгъибиру мез умули калахъес, кьукьялизибти дарган мезлицун гъайбикIахъес. МяхIяммадли гьар дус лерилрара-сера дарган мезли дурадулхъути газетаби, журналти къулбасдиру, ва цархIилтазира ил баркьуди гIеббуцахъес махикIар. Илала дурабад, Лавашала районна лерилра къулбасдарибти «Гьалмагъдеш» журналти илини хъали-хъайгIи диахъули вирар. Халаси баркалла багьахъес дигулра МяхIяммадлис илгъуна дурхъаси, багаласи ва къиянси хIянчи барес кумекбирнилис. ГIямрулизир лерилра хIела далдуцибти хIянчи гьамадли детерхаб, пикруми-кьасани гьардизаб! Арати гIямру хIедра хIела кулпетлисра!