Ну бара школализи рашес рехIрихьибхIели, нушала шилизи радиора хутIла шалара кадукибтири (дила пикрили, 1965 ибил дус сабри). Ил нушаб, хаслира – дурхIнас, гьарли-марси байрам сабри. БелчIудиличил дарх нушани дунъяличир кадиркути анцIбукьуначила балнила дазурби дугIядирескадиира.
Радиолизирад нуша дурхIнанира, дарган мезла дурсри кадирхьути мугIяллимтанира дахъал мягI­ни­черти секIал далулри. Ил гIяхIсири даргала литерату­рала мез далнила шайчибра. СенахIенну шимазир им­цIали лугъатуни дирар дузахъути. Лерилра гIяхIти се­кIайчила, гьарил шилизирти фольклорла ансамбльта­чибад бехIбихьили, культурала декIар-декIарти гIядатуначи бикайчи передачаби даргала радиола архивлизир мяхIкамли дихIули сари.
90 ибти дусмазир, улкализир лутIи-хьулчилизирад дарсдешуни детаурхIели, передачабала шайчирра илдани хIейгести асурти кадикиб, хаслира – дарган мезла передачабала. ГIергъити чумал дусра илдачи хIеррикIули, лехIирхъули калунра. 2024 ибил дуслизиб нуни республикала культурала Министерстволизи кагъар белкIунсири илдачи пикри бяхIчиаахъес. Амма сегъуналра гIяхIдеш хIебиуб. Даргала радиолизир ва телевидениелизир жявлил нуша-ургаб мицIирли агарти журналистунани далкьаахъурти передачаби сари ласдикIахъути. Чумал дус гьалар РГВК-лизиб дурабулхъуси «Адамти ва замана» передача хIядурбирули рузули лерри пагьмучерси журналистка, илини даргала шимала гIядатуни чедиахъи. Гьанна илра илар рузули ахIен.
Нушала дарганти-ургаб бахъал пагьмучебти адамти леб. Сен илдани ил хIяракат гIеббуцили, лебтасалра дигести передачаби далкьхIерахъути? ЦархIилти миллатунала мезаначил дурадулхъути передачабачил даргала цугдурцухIели, се-биалра сагаси алкIахъуси, иштяхIдухъести, районтала шимазирти хабуртачила лебтазилра балахъути передачаби диубли дигахъаси. Ил масъала гьунчибикахъалри, даргала мезла передачабачи лехIирхъули ва хIерикIули, ахIерси нешла мезра мяхIкамдарести имканти имцIадири. Ил шайчир жавабкардеш дихути адамтани ил аргъбаибси масъалаличи хаслира пикри бяхIчиаили дигахъаси.