Закла баракатли ванзала чебаъ гьачамличиб-гьачам жагасили бетарахъулри ва вава-кьарли ургуба варакьбарилри, вацIа-хIярилара мер-мусаличир адамтас цIедешла гIяхIси пай баилри. МицIираглис гIяйдикIес бегIлара къулайти имканти акIублири. КъантIли буралли, дусла авалра манзиллизибадли августла ахирличиб давлачебси замана бакIилри. Илгъуна замана дубурлантас шадлихъуни дурадуркIес дигахъу. Хаслира мекъ-сяхIбат ва юбилейти дирар илдани шадлихъла аги-хIяйзир детурхахъути.

Савлиличирадли тIабигIятла паргъатдеш булъахъули, Дахадаевла районнизи гьуни буцибти машинабачир музыкала разити тIамри иргъулри. СягIят 10 диркухIейс илди машинабани, бикIуливан, Кубачила ши бицIахъиб.

Чумал бархIи гIярбукIантани шадлихъличи гIяхIси хIядурдеш бирули, художественный комбинатла гьалабси чIябар кьалтинтани кабуцилри, Россияла декIар-декIарти регионтазибадли бакIибти гIяхIлас чула някъла устадешличил далкьаахъурти масани гьаладихьахъес хасдарибти 40 къуш хIядурдарилри. Чидилли сегъуна мер буцес хIяжатлил майдайчирти чятиртачир делкIунти белкIаначил белгибарилри. Калмыкияла, Башкортостанна, Чувашияла, Татарстанна ва илкьяйдали Астраханьна, Нижний Новгородла, Челябинскла, Самарала и Краснодарла областунала, Дагъиста декIар-декIарти районтала  машгьурти 60 устали чула хIянчурби гьаладирхьулри ила.

Савли-жявли ну ила гьарракIибхIели аргъира, илаб чумал бархIи халаси шадлихъ дураберкIес хIядурбикIниличила. Комбинатла чумал дерхIла юртлизи рухIнарухъунхIели, илала жаняхIла кIелра шайчирти бяхIяначи черяхIкахъили, мургьи-арцла машгьурти устнала суратуни сарри. Илди-ургар ишбархIиличи бикайчи комбинатлис бекIдеш дирули калунти 16 руководительлара. ИшхIелла манзиллизив комбинатла директорли узули сай бажардичевси, багьудичевси ва серхурси Мурад ХIяжияхIъяев.

Кубачила ши къугъати музыкали, цалабиркути гIярбукIантани, дурабадли башути гIяхIлала разити ихтилатунани мирхъила тIакьаван бучIахъулри. ХIулкIути биштIатала дукелцIили, гьайгьай, шадлихъ лебгIеб жагабарилри. Чина хIеризаллира, гIярбукIла някъла устадешличила бурути хьунул адамтала маникенти тIашлири. Хабарагарли хIеризурхIели, илди мицIирти чехьерти саби или гьанбикеслири.

Багьла-багьлали гьарил къушлизир сегъунти-дигара журала масани дакIудулхъулри. Берклуми хIядурдирес хасдарибти къушаназибадли бизиси тIем тIинтIбиуб.

Кубачила администрацияла бекI ГIябдусамад Куртаев, машгьурси журналист СягIид Ниналалов ва цархIилти хIурматла гIярбукIанти гIяхIлас дяхI шалали гьунибиулри ва илди хIурматличил алавбуцес къайгъилизибри. Ил бархIи Кубачи бакIибти туристуни бегIлара разиси хIяйчибри викIалра хатIа бетхIерар. СенахIенну илдас гьарил секIалра тамашабилзулри ва саби сихIрула дунъяличиб багьарбиубтиван билзусигъунари.

«Кубачила художественный комбинат» ГУП 100 дус биънилис хасбарибси лебил Россияла халкьла пагьмуртала фестивальлизир бутIакьяндеш дариб Россияла Федерацияла Пачалихъла Думала депутат НурбяхIянд НурбяхIяндовли, ДР-ла Халкьла Собраниела депутат, ДГУ-ла ректор МуртазагIяли Рабадановли, Дахадаевла районна бекI МяхIяммад ГIябдулкьадировли, Дагъистан Республикала хъалибарг, нешдеш ва дурхIнала ихтиюрти далтахънила шайчирси уполномоченная Марина Ежовани, поэтунани, писательтани, журналистунани, художникунани, суратчибани, этнографунани, краеведунани, искусствоведунани, музейтала хIянчизартани, искусствобала школабала преподавательтани, ахъти къуллукъуни дузахъути хIякимтани ва бахъал цархIилти хIурматла гIяхIлани.

Шадлихъ бехIбихьни иргъахъули «МяхIячкъала» бикIуси ансамбльли кьалтинти дяхIяхъибси гьарзаси майдайчи дурабухъи, гьалакти ва уркIи хIулбуркIахъести делхъ дариб. ИлхIели цалабикибтала гьав гьатIира ахъбиуб.

Ахирра аязси заклиубси гьарзаси сценаличи шадлихъ бузахъанти дурабухъун. Илдани балбуц бехIбихьниличила багьахъур ва сценаличи Дагъистан Республикала туризмала ва халкьла художествола ваяхI дирнила шайчивси министрла заместитель Анна Безрукова жирариб.

— Салам, хIурматла кубачиланти, гIяхIли ва лерилра шадлихъличи цаладикибти, — рикIи ил, — ишбархIи нушани комбинат 100 дус биънила шадлихъ ибхьни мягIничебси ва хIурматла баркьуди саби. Кубачила мургьи-арцла устнани Дагъистанцунра ахIи, лебилра Россияра дунъяличиб машгьурбарибси саби. ГIярбукIла устнани дарибти ваяхI дунъяла бегIлара гIяхIтигъунти ва давлачертигъунти музейтазир дихIули сари. Нуша дирхулра машгьурти устнала устадешла бетуц ишхIелла манзиллизибра жагьилтани гьалабяхI башахъниличи. Илкьяйдали наслуличибад-наслуличи башули ил мягIничебси баркьуди даимлис кавлан.

ГIур гъайбухъунти НурбяхIянд НурбяхIяндовли, МуртазагIяли Рабадановли, МяхIяммад ГIябдулкьадировли ва цархIилтани фестивальла бутIакьянчиби илгъуна мягIничебси балбуцличил мубаракбариб, някъла устадешла бегIтас мурталра чедибдешуни диубли дигниличила багьахъур.

ГIярбукIла мургьи-арцла ва мургьила гьимиртачил някьиш лукIути пагьмучебти бахъалгъунти устнас шабагъатуни дедлугнила баркьуди ахирличи бикили гIергъи, Дагъиста филармонияла далайчибани ва декIар-декIарти ансамбльтала гIяртистунани чула пагьмурти чедаахъиб.

Балбуцличи цалабикибти лебтанилра гIярбукIла хьунул адамтала кIузрачи хасси пикри бяхIчииулри. Илдани цIуба гIинтIла вавнабяхъибси ургубаличи мешубикахъилри байрамла майдан. Жагьилти ва гьести гIямрула гIярбукIан чехьертала цаличи ца мешуси цалра кIаз хIясиббарес хIериубра. Ил секIай тамай тамашариахъубси нуни, дила мякьла кариибси ургарти гIямрула гIярбукIайзи хьарбаира. Илди някъ-някъли дирулраяв хIушани, илгъуна лебгIеб жагаси, букIуси чIянкIи чинад биркахъулрая или. «Илди нушала базарличи дицес дихути сари», — рикIи ил. Илини гIурра баянбариб шери букьяйчи рурсбани сегъунти кIузри дихутил, хъабиубли гIергъи илдала сегъунти кIузри дирутил ва гьести гIямрула хьунул адамтала сегъунти диэс хIяжатлил. Гъамси адам вебкIаллира илдани хасти журала кIузри дихули дуили сари. Илдани чула хала нешанани дузахъули калунти гIядатуни, ишхIелла манзиллизирра чекабизурли дузахъни гапличи лайикьси баркьуди саби. Илцадра чедетаахъили ва цализирадли итил бекIлил декIархIедулхъули, мургьила гьимиртачил дирбубли кIузрачир акIахъубти някьишли ва вавнани ну тамай гIяшикьриахъубра. КIазла дубличи бирбубси чIянкIила бутIаличир варакьдарибти някьиш някъ-някъли акIахъубти художественный произведениеби диъниличи вирхес тяхIяр аги. Илди зарбабличи хасти техникала кумекличил дарибтачи мешулири. Бархьаначи буралли, илдачирра жагатири.

Аязси бархIи берхIилиуб фестиваль дурабуркIути адамтачи заклира баракатла заб чекьур. Амма забла малхIямти кIунтIрани чилра уркIхIевхъахъун, къушаназирти масани чедаэс или илди къунзбикIули лебалри. Чумал адамцунри бурх лебси мерличи дуцIбухъунти.

ТIабигIят сунела цIуба арцла мачниван забла кIунтIри ванзаличи чахьдарили паргъатхIебиуб. Илини шадлихъ гIеббурцули, Кубачила шила чеди азир рангли рурхIуси зурхIяб кабизур. Ил секIай тамай хIулбукIахъибти адамтала разити тIамри иргъулри:

— Агь, хIябилра жагаси сурат хIебиалли, илгъуна къугъаси зурхIяб гьачамалра чебаибси ахIен, — викIулри ургарти гIямрула мурул адам.

— Марлира, ил зурхIяб лебгIеб тамашала саби, — илала пикри гIеббуциб жагьси исбагьини.

Адамти илала жагадеш сипатбарести гъай даргес хIебирули, лехIкахъили, закличибси зурхIябличи хIулкIули хIербикIулри.

Марлира, тIабигIятла ил савгъатличи тамашахIейэс тяхIяр аги. Илцадра умутличил Кубачила шила кIелра дубличи хамли сунела кьялуби ибкьаили, гIярбукIантачи ва гIяхIлачи нурли чахьбикIусигъунари ил ва илди нурлизив гьарил адам шалаваресван рурхIулри.

Кьанси дугила заманара шила дайларадли музыкала тIамри чедихули лералри. Жагьилти бамсриагарли булхъули, хIулкIули шадлихъ даимбарилри.

КIиэсил бархIира гIярбукIанти кьукьнадли комбинатла гьала цалабиркескабииб. Илдачил барх гIяхIлира туристунира бархбиркулри ва иштяхIличил ихтилатбикIулри. Чина хIеризаллира, гьар журала масани сарри ва илди хIясибдирути, исути адамтира камли ахIенри. Жура-журала деркести хIядурдаресра гIярбукIанти бажардибикилри. БиштIа-халати иштяхIличил илдала тIем багьес къайгъилизибри.

Россияла декIар-декIарти регионтазибадли бакIибти гIяхIлачил ихтилатбарибхIели, аргъеслири лебтасалра фестиваль гIяхIбизни. Илдазибадли бахъалгъунти хIяйнайс, авнайс, шуйнайс,… бакIибти бахъал сабри. Амма бегI гьалаб бакIибталара разидешлис ахир аги. Балбуцличила, гIярбукIла ва цархIилти санигIятуни дузахъути устначила, дубурлантачила пикри цагъунари. Гьарилли умутличил бурулри фестиваль гIяхIбизниличила, дагъистанланти гIяхIялдешлис хъярхъти биъниличила, волонтертани ва цархIилтани гьар секIайзиб чус кумекбирниличила, балбуц ахъси даражаличиб дурабуркIниличила,…

Бамсриихъути адамтала уркIби разидирули, далай-делхъла устнани ил бархIира чула пагьмурти чедиахъулри. Искусство дигантас ил бархIира байрамличи шурбухъири. Гьар мерличир чедиахъути устадешла дурсрачи хIербикIутира бахъалри.

Илкьяйдали Кубачила устнани чула устадеш чедиахъулицунра ахIи, гIяхIлани мургьила гьимиртачил някьишдирнила баркьудилизир чула цIакьани ахтардидаресра имканти акIахъублири.

Ярагъ дирнила устадешла дарс чебиахъулри Хъярбукла устнани. ХIясан Ражабовли ва Жавгьар МяхIяммадкьадиевани иштяхIличил чула дунъяличи хабардерхурси санигIятличил адамти тянишбирулри. Илаб хьунул адамти, мурул адамти, дурхIни камбирули ахIенри ва шандан дебшлабирнилара илизирадли някъ-някъли ярагъ дирнилара баркьудилизир бутIакьяндеш дирес къайгъилизибри. Илкьяйдали Хъярбукла шилизирти ярагъла устнала бузерила мераначирван кьутIла тIамри къайдиркули ахIенри. Гьайгьай, илгъуна гьамадли ахIенси баркьудили бахъла пикри битIикIулри ва мегь мутIигIбирантачи хIербикIутира камли ахIенри.

Фестивальличир балхъарлантанира чула устадешла баркьудлуми умутличил гьаладирхьулри. Илдала мякьлаб имцIаливан урусланти чебаэс вирулри. ГIянжилизирадли тIалхIяна дирутачил илдала ихтилатуни демжурлири ва сабира кабиили, бузерилизи ихъулри. ТIалхIяна дирулицунра ахIи, илдачи някьишдирнила хIянчира тамашабилзулри цалабикибтас ва устначи суалтала варачан бяхIчииулри.

Хайдакьла някьиш дирути устнанира адамтала уркIби разидирахъулри чула някъла устадешличил. Илдани ранг-рангла архIяла гьимиртазирадли чIянкIилизи някьиш лукIнила устадешла дарс дурабуркIулри. Хайдакьлантала къушлизирадли замана-заманаличир чугурла ва далуйтала макьамти зайдикIулри.

Ца шайчиб кавлули ахIенри Унцукульла устнала чебетаибдешличил бузахъуси санигIятра. ЛебгIеб къиянси хIянчи Шамил НурмяхIяммадовли гьамадли бирухIели, иличи хIербикIути тамашабирулри. Ил баркьудилизир бутIакьяндеш дарес иштяхIдулхъутира камли ахIенри. Дахъ жагали дарибти гажинти ва цархIил журала гIягIниахълуми някъбази дурцули, Россиялизибадли бакIибти гIяхIли пишбирхъулри ва тикрарбирулри вирхаэс тяхIяр агарагу илцад къиян кабихьили урцуйзирадли дарибти ваяхI шишализирадли хIядурдарибтигъунтигу или. Марлира, адамла пикри битIикIулри мегьла гьимирти урцуйзи катIахъи, кIинайс илди кьицIдирули, жявхIейчибадли чула хала бегIтани бузахъуси баркьуди тикрарбирули, някьиш алкIахънила баркьудили.

Илдигъунти устадешла баркьудлумани жагьилтала ва дурхIнала пикри битIикIни дигесира саби. ХIебиалли нушала хала бегIтала санигIятуни гьаладяхI дашар, гьатIира давлачердирар ва чеалкIути наслубани иштяхIличил дузахъниличи вирхес вирар.

Фестивальличи цалабикибтани чула устадеш барсур гIебиснила баркьудира дигесири. Дахъал дусмазир чули дяркъурти санигIятунала дигIяндешуни гьаргдарес ва илди цархIилтази гIерасахъес къайгъилизибти устнала баркьуди, гьайгьайрагу, гапличи лайикьлира саби.

Фестиваль дурабуркIутани хIябъибил бархIира цалабикибтас къугъаси программа гьалабихьилри. Гьаларла ва гьаннала палтар ва культуралара гIядатуналара цархIилти бетуцуни чедиахъулри декIар-декIарти миллатунала вакилтани.

Россияла декIар-декIарти регионтала вакилтани иштяхIличил чула палтар чедиахъулри ва илдачила баянти гьаладирхьулри. Чебаэслири багьудичебти ва ункъли хIядурбиубти гIяхIлани чула халкьанала культура ахъли кьиматлабирни. Хаслира някъла устадешла баркьудлуми ахъли кьиматладирулри цалабикибтани.

Машгьурти гIяртистунани зайдикIахъути далуйтани ва гьалакли дирути делхъанани гIярбукIантала ва гIяхIлала уркIби гьарли-марли ясирдурцулри. Балбуц ахирличи биркухIели, Кубачила комбинатла шайзирадли культурала хIянчизартас савгъатуни ва Баркаллала кагъурти дедиб.

Фестиваль бехIбихьили, ахирличи бикайчи декIар-декIарти миллатунала вакилти дахадаевлантачил барх иштяхIличил булхъулри. Илдас декIардеш аги миллатла, урусла яра дурала улкнала музыка зайдикIнила. Къугъаси байрамли ахъси гьав бакIахъибти илдани дахадаевлантачил барх булхъухIели бамсни балули ахIенри. Иш гьамадли ахIенси манзиллизиб дявила анцIбукьунани ва излумани кьакьабакIахъибти халкьлис ил балбуц гьарли-марси шадлихъ сабри, суненира лерилра зугIлумачила хъумартахъурли, уркIби разидешла хIяланани дирцIахъуси.

Фестиваль дурабуркIнилизиб халаси кумек гIеббаахъибти волонтертира шайчиб кахIелун. Илдасра балбуц дураберкIибтани баркалла багьахъур ва шабагъатуни дедиб.

Фестивальличиб бегIлара шадти дурхIни сабри викIалра хатIа бетхIерар. Музыка зайдухъалри илди булхъулри, чинар сегъунти гIягIниахълуми лерал чула бугаси хIерличил хIясибдирулри. Илди разибиахъуб чус хасбарили дураберкIибси тамашала квестлира. БутIнадли цалабирхъуси (пазл) журализиб гьалабихьибси гажинна суратуни дигIяндарилри комбинатла декIар-декIарти кабинетуназир. ДурхIнани илди даргес хIяжатлири. Илкьяйдали дурхIнала пагьму гьалабяхI арбукьяхъес хасбарибси балбуцла кумекличил илдани гажин цалабяхъиб ва чула устадеш умутличил чедаахъиб. ДурхIнала къайгъни дугIли архIедякьун, илдас комбинатла шайзирадли хъумхIертести савгъатуни дедиб.

Дигесири разити хIяланачил ва баркаллала дугьбачил гIяхIлани Кубачила ши бархьбатни. Бархьли буралли, илдас цабехIлизибадли цабехI декIарбикес ва илгъуна байрамла балбуц бархьбатес гьамадли ахIенри. Ил гьайбатси балбуцла кумекличил гьалмагъдешла ва узидешла хIялани даимлис илдази минадиубли диънира багьеслири.

Комбинатла директор Мурад ХIяжияхIъяевли буриб даршал дус гьалаб нушала хала бегIти цабиубли, акIахъубси комбинат ишхIелла манзиллизибра ункъли бузахъес кьасбирехIе или. Илгъуна бажардичевси руководительла кумекличил илдигъунти шадлихъуни гIурра имцIали дурадуркIниличи вирхес вирар.

Кубачила шила бекI ГIябдусалам Куртаевлис, Мурад ХIяжияхIъяевлис, журналист СягIид Ниналаловлис ва цархIилти балбуц дурабуркIнилизи халаси пай кабихьибти адамтас цалабикибти уркIи-уркIилабадли баркалла бикIулри ва илдас арадешра талихIра дулгули арбашулри. Лебтанилра тикрарбирулри Кубачила шилизи гьаннала гIергъира гьуни хъумхIертехIе или.