А

дамлис сунела гIямрулизиб бахъал халкь къаршибиркути саби, цаибси гьигьличил ва ил бегIла гIергъи бикайчи. ЦабехIли ну­шала гIямрулизир хъумхIертести, де­бали асарчерти ва мягIничерти къел далта. Илди нушала гIямрула нурли бетарар.

Илди саби гьаланачи нушала бегIти, узи-рузи (илди лебли биали), кIинайс хьунул ва дурхIни. Амма илдачибли таманбирути ахIен нушала гIямруличи асарбирути адамти. Гьарил адамла левси сай, иличи дебали мешуикес дигуси, илала устадеш ва гIякьлу гIерасеси адам. Буралли, вегIла учитель ва насихIятчи. Бахъалгъунти дурхIнала ил дудеш вирар. Бирар илдигъунти адамти тяништала, учительтала, гьаламагъунала ургабра, цацахIели – телевизорлизив яра Интернетлизив вархли варгес вирар илгъуна адам. Учительти ва насихIятчиби бахъал бирути саби, амма гьуни даимбарес дигуси имцIаливан ца вирар. Левсири дила гIямрулизивра илгъуна адам.

Вайси мугIяллимли бархьдеш буруси саби, гIяхIси мугIяллимли ил баргахъес бурсивируси сай. Адольф Дистервег (1790-1866) — немецунала учитель.

1995 ибил дуслизиб школализибси дила белчIуди ахирличи биркулри. Наб за­мана баилри челябкьлализиб хас­си гьуни баргес, санигIят чеббикIес. ХIя­бил­ра дахъал санигIятуни пикридарира ну­ни: дигалли — юристла, дигалли — эконо­мистла.

Ит манзиллизир кIелра факультет дебали машгьуртири ва бахъал дурхIни ила бучIес кабурхулри. Бара пашбехъубси улкала мерличиб акIубси сагаси республикализир базригантала экономика тIинтIбирулри. СанигIят ункъли бяркъурти хIянчизарти дебали камлири. Илди дусмазив чебяхIси даражала белчIудила заведениелизи кархесра гьамадси ахIен­ри. Базарла экономикала манзил рушбат гьарли-марси хIекьдешли бетаур ва ил агарли белчIудила заведениелизи унза гьаргдарес къиянни ахIенри.

Наб дигулри дявила гIяскуртала офицерла курсаначи укьес. Амма сепайда, ила гIярза ва гьаларти далилти  апрель базличирал гьаладихьес хIяжатли дуилри. Кьаниубра. Дила дудешли журналистли узуси сунела узикьар левси сай или бурибсири. Илала гьуни даимбируси адам виалри, дебали гIяхIсири или гьанбушиб. Илини кархахъесра кумекбиру илира пикриухъун. Журналист ибси дев наб тамашабилзусири. Наб гьанбиркусири журналист дебали мягIничевси ва халаси асар лебси адам сай или. Ну дудешли бурибсиличи кьабуликира. Бурасли, илис гьалав ил дудешла узикьар нуни чеваибси ахIенри. Ит манзил дурабад адамти шилизи камли башутири, илхIелира — сегъуна-биалра анцIбукьличи. Илала халаси узи Ризван нуни ункъли валусири. Ил дахъал дусмазив ГIяялахъябла школализив учительли узули калунсири. Халаси устадешличил кьисла устала санигIятра бузахъули вири. ХIера, илра, дудешра, нура тах шагьарлизидяхI датдихьира.

Нушаб унза гьаргдариб ахъси ва чархлизив тазаси адамли. Ил, марлира, сунела узичи мешулири. Ил сайри илхIейчивад нуни дила кIиибил дудешлизи, учительлизи ва насихIятчилизи халвируси ГIялиев ГIяли ГIялиевич. Узулри ил «Дагъистан» ГТРК-лизив даргала радиола бекI редакторли. Яхши-хуш дарили гIергъи, дудеш викIар: «Иш урши хIечи кархахъа». «Чина набчи?» —  тамашавиуб ГIяли ГIялиевич. Дудешлис гьанбиркули бурги илини сунес дигути каберхахъес вируси сай или.

Ишаб ишгъуна анцIбукьличила гьанбушес дигулра. БархIехъ, документуни дедес гьалабси бархIи, ГIяли-изини дила багьуди ахтардибарес кьасбариб. Бурасли, гьаланачи ил адамлизивад ну дебали урузкIулри ва урухкIулри. «Дарган мезла сегъунти ва чила произведениеби делчIунраяв хIушани 11 ибил класслизир», — хьарбаиб илини. Нуни итмаданал лерилра далути секIал хъумкартурра. Цалра произведение я автор гьанхIейкиб. Урехили дила лезми шикьбулхъахъули ахIенри. Шилизивад бегI гьалав сайри ну дураухъунси, хаслира — шагьарлизи. Лерилра секIал тамашадилзутири, тIашагарли бекI ласбикIахъули, гьар секIайчи хIерикIусири. ДекIарси тяхIярли бегIбиубти ва хъярхъли вяшбикIути адамти чебаибхIели, илдачи хIулби хIердарес хIейрулри, гъайэс чина вирусири. «Чебиулрив, секIал агара балуси хIела уршили, хIу викIулри «отличник» сай», — кьабулагардеш багьахъур илини дудешлизи. Дудеш дила даражали уркIухъахъири. «Гьаннала гIергъи баз лебалгу, мажахIят, хIядурвиэс», — бизахъур ГIяли-изини. Кайхьунси замана дила бекIлизи ахъти дубурла варачанван беткахъибси «багьуди» чарбухъун. Айзахъурли дуришара или гьанбикиб. БегI гьалаб наб дебали цIахбилзулри.

ГIергъила бархIи нуша радиола Юртлизи дякьунра. ХIябилра тамашабизур наб ил мер, ва костюмтачил бегIбиубти мурул адамти, жагати палтарличилти хьунул адамти. Редакцияла лебилра хIянчизарти нушаб разили гьунибаиб. ИлхIели тамай ну журналист ветарус или пикрибарира.

Журналистикала отделениелизи кархес халаси конкурс лебсири. Набчил вакIибси ГIяли ГIялиевич филологияла факультетла деканни бусягIятал комиссиялизи кархахъес тиладибариб. ХIейгу-хIейгули ил кьабуликиб. Нуни белкIунси хIянчи комиссиялис тамашабизур. Гьанбиркур дудешлизи ГIяли-изи викIули: «Дебали жагаси ва чебетаибси хIянчи белкIун Руслай, комиссиялис гIяхIбизур. Дила пикрили, ишизивад мухбир ветарар».

ГIяли ГIялиевич ГIялиев журналистикализи вакIибсири 1957 ибил дуслизив. Радиолис диктор хIяжатли сай ибси багьахъни аргъили, илини гIярза гьалабихьибсири. Ит манзил ил урусла ва Дагъис­та мезанала филологияла факультетла студентли вирусири. 15 адамличивад ил че­дивикили, авал дус дикторла хIянчи барибсири, илала гIергъи  — корреспондентли, декIар-декIарти отделтала редакторли, бекI редакторли. Радиолизиб илини 50 дус хIянчи бариб. Илдачила чумра жуз делкIес вирар. Ил цаибси адам сайри ГТРК-лизив партиялизив хIейалра, редакцияла бекI редактор варибси.

1997 ибил дуслизиб нунира радиолизир, диктор сайливан, бузерила гунзри кацIира.  Бахълис ГIяли ГIялиевичли кумекбариб бургар или гьанбикесра асубирар. ГIе, илини ну конкурсличи хIядурвикIахъес ибкьли учIахъира. Ил викIусири: «ХIу дила тяниш сайри, ил багьандан нуни хIезибад хIянчи кIинали имцIали тIалаббирис». Радиолизив нура декIар-декIарти къуллукъуначив узули калунра. Сагали акIахъубси «Дагъистан» РГВК бикIуси телекомпаниялизи дарган мезла передача бирес вякьунсири. Нуни сарри илар миллатла редакциялис унза гьаргдарибси. ХIебалуси секIал хьарбаэс, насихIят бурахъес ну мурталра радиолизи гьаввикIусири. Ил мякьлабси Юртлизиб сабри мерлабиубсира. Наб ишбархIиван гьандиркур Кьурбанов Гьарун МяхIяммадовичла дугьби: «Руслан, хIела передача видеоличилси радио-передача саби». ГIяхIцад замана арбякьун ит манзилличибад. Агара ишбархIи нушала ургав Гьарун Кьурбановра, ил вайнукьабала някъбазивад вебкIиб. Агара дила кIиибил дудеш (илкьяйда викIусири ну ГIяли-изис) ГIялиев ГIяли ГIялиевичра.

Ишдус августла 15-личив ил акIубхIейчирад 90 дус диркули сари. Дебали къиянни саби иличила убла заманализив гъайикIес… Наб бусягIятра диули ахIен илала мурхьти мягIналичилти, пасихIти дугьби, насихIятуни…

Нуни иличил барх бузули калунти чумал адамлизи ГIяли ГIялиевичличила пикруми дурахъес тиладибарибсири. Илди газета бучIантас макьалализир гьаладихьесра къайгъибирис. Макьала белкIес дила жявлил пикри лебсири. Гьаларван набчи илгъуна пикриличил дугьаризур Расул ХIямзатовла уличилси республикала Миллатла библиотекала краеведческий отделла хIянчизар  Салимат ХIяжиева. Илра дахъал дусмазир радиолизир рузули калунсири. Гьаланачи илала пикри гьалабирхьис: «30 дусличирра имцIали ну Дагъиста радиокомитетлизир рузули калунра. ИлхIейчивад, гьарли-марси, кайзурси, сунезирра дубурлан гъабзала  гIяхIтигъунти лерилра къиликъуни лерси адам, 50 дусличибра имцIали даргала радиолизиб хIянчи барибси пагьмучевси журналист, даргала авид жагали бузахъес балуси масхарачи, тямада вири нушала ГIяли ГIялиевич, гьалжанала агьлула виаб сайну!»

 

Хизри Юсупов, мезлизив узуси гIялим, филологияла гIилмуртала кандидат: «Даргала радиола бекI редактор ГIяли ГIялиевли лерилра сунела гIямру радиолис багъишладарибси адам сай викIаллира, хатIахIеркур. Радиола бузери гьалабяхI башахънилизи, передачаби жага-ункъдикIахънилизи, редакциялизир лайикьти шуртIри кадилзахънилизи илини кабихьибси пай мекелли халаси саби. Нура вецIал дус радиолизив илала бекIдешлиув узули калунра, амма гьачамалра ГIяли ГIялиевичли тIама ахъбарили, сай бекI редактор виъни чехIебаахъиб. ХIекьли кагибти ва малхIямти хIял-тIабигIятла адам сайри ил, лебтачилра валикибси, адамти дигахъуси».

 

Саният Шапиева, журналист: «ГIяли ГIялиевич гьануршухIели, иличила чIянкIли ванати ва шалати дугьби пайдаладарес вирар. Ил лебтачилра дигичевси, нуша, жагьил журналистунази, насихIят гIеббурес хIядурси адам вири. Илала бекIлибиубси къиликъ – адамдеш. Наб гьанхIебиркур, хIянчила масъулти сабабли илини цалра хIянчизарла уркIи-хIял дамкьахъурли яра чичи-биалра тIама ахъбуцили. Илала шалати дяхI ва гьаргси уркIи наб мурталра гьандиркур».

Руслан Ражабов