Украинала мер-мусаличиб Россияла дявила хасси бал­буц бехIбихьибхIейчирад па­чалихъла хъархIерагардеш балтахъ­ни­лизир дагъистанлантани жигарла бутIа­кьяндеш дирули сари, ВатIан дигахънила шайчиб чучибад гIибрат кайсахъули.

Гьарил манзилла сунела игитуни бирути саби. ВатIан балтахъантани улкала тарихлизи мекелли халаси пай кабихьибси саби. Бахъалгъунтани игитлати гьунарти дурадеркIили, ВатIан багьандан чула гIязизти жан кьурбандариб. Илдигъунти гIяхIгъубзни халкьлФира хъумуртути ахIен. ХIера, игитунала къяйлизивадси сай ВатIа марси урши, гIяхIгъабза дубурлан Хизри СягIидович ГIябдуллаевра.

Хизри ГIябдуллаев акIубсири 1994 ибил дусла августла 15-личив Сергокъалала шилизив. 2011 ибил дуслизиб ГI.Батирайла уличилси лицей таманбарили, ДГУ-ла экологияла-географияла факультетлизи керхурсири ва, 2016 ибил дуслизиб ил ункъли хъараахъурсири. ГIярмиялизиб някъ-някъли бирхIутала журализи (армейский рукопашный бой) ахъибсири ва республикала кьадрила абзаначир кIиибти мерани сархутири. Илкьяйдали ил «Сабля Шамиля» бикIуси спортла фестивальличив чемпион ветаурсири, РФ-ла оборонала Министерстволи дурадуркIути декIар-декIарти абзаначир бутIакьяндеш дирули, кубокуначи, медальтачи ва грамотабачи лайикьикибсири.

2017 ибил дуслизив ВатIа гьалабси чебла ахъес гIярмияла къяянази арякьунсири. Хизрини Тыва Республикала Кызыл шагьарлизиб къуллукъбарибсири. ГIярмиялизиб къуллукъбируси замана сай жавабкарси ва сунечи хъарси ункъли таманбируси адам сайливан чебаахъибсири. Дявила частьла командирли чуйнара Хизрила бегIтачи Баркаллала кагъурти дархьибтири.

2020-ибил дусличиб РФ-ла оборонала Министерстволичил вягIда бигьи, дявила къуллукъ даимбирес вехIихьибсири. Х.ГIябдуллаевли Тихоокеанский флотла урхьула пехотала гвардияла декIарси 40 ибил батальонна десантно-штурмовое отделениела командирла къуллукъ бузахъулри. Илини гIярмиялизиб халаси хIурмат сархибсири, чуйнара грамотабачил, михъирличи диршути лишантачил, медальтачил шабагъатлаварибсири, командирли даим гапирусири. Хизрила бахъал гьалмагъунира бири. Ил чеветаибси, бухъя-зегъачевси, адамтала хIурмат-хатир дируси адам вири.

СВО бехIбихьибти цаибти бурхIназирал Хизри ГIябдуллаевли Украинала мер-мусаличир бутIакьяндеш дирулри. Луганскла областьлизибси Папасная шагьар азадбалтахъули, миллатчибачи къаршили ургъулри. Ил «Шторм» отрядла гьавала гIяскуртала отделениела командир сайри. Сунела гьалар тIашдатурти масъулти ункъли тамандирули, гвардияла сержант Х.ГIябдуллаевли шагьар азадбатахъес имканбикIахъути шуртIри акIахъубтири.

2022 ибил дусла апрельла 19-личив дявила чебла ихъуси Хизри декIли вяхъибсири ва Стаханов, Ростов,  Владивосток шагьуртазирти госпитальтазив сагъирулри.

СВО-лизир дакIударибти гъабзадеш багьандан, гвардияла сержант Хизри ГIябдуллаев контр-адмирал В.В.Коз­ловский­ли «Спецназ Тоф-Холуай» ибси ме­даль­личил шабагъатлаварибсири.

Сепайда, тухтуртала дарман сабабхIедиубли, 2022 ибил дусла майла 28-личиб Хизрила гIямрула ги къяббердиб.

2022 ибил дусла декабрьла 14-личибадси РФ-ла Президент В.Путинна ХIукмуличи хъарахъили, Хизри ГIябдуллаев Гъабзадешла орденничил шабагъатлаварибсири, вебкIили гIергъи. Хизри валутани илала шаласи сипат сеналра хъумхIерту!

ХIера, севан гьаниркахъулил Хизри сунечил барх  бучIутани ва классла руководительницани:

— Хизри ГIябдуллаев бехIбихьудла клас­сунази вакIибхIелил къайгъичевси дурхIя вири. Сунела сархибдешуначил бегIтира хала бегIтира разибарес даим хIяракатлизив вири ил. Хизри шуибил класслизи дураухъунхIели сарри ну иличил гъамли тянишриубси. Ил учIуси класс балгунси бири, Хизри — секIал жявли гIебисуси ва ункъли учIуси урши вири. Мурталра жагали вегIварили вири, халатала хIурматбири, биштIати гьимхIебуркIахъи. Школала гIямрулизир, илар детурхути спортла далдуцуначир жигарла бутIакьяндешра дири. Иличила гапла дугьби ахIенси гIур цархIил секIал бурес хIерирус, дебали гIяхIси урши вири ил.

ВатIан дигахъниличила гъайикIалли, школализив учIули левай, Хизрини ВатIай­чи халати диги дакIудирутири. ЧебяхI­си ВатIа дергъла бутIакьянчичи гIяхI­лад­ли аркьехIе или ба­кьиб­хIели, ил дебали разивиубсири ва, дякьунси замана, илини ветераннизи гIяхIцад суалтира хьардаибтири.

Ил нуша-ургав агни аргъес бахъ къияннигу, уркIи цIумбикIули саби, амма шалати гьанбикунани ванара рирулра. Хизри нушала пахру сай. Нушани ил сеналра хъумхIертехIе, — буриб классла руководительница Луиза ГIябдулкьасумовнани.

— Хизришка … цархIилван бурес хIерирус. Ил наб узигъуна вири. Сегъуна-дигара хабар дукелцIили нушала кунби изесдяхIесли буриригу суненира. Илала у иргъасли, «Гьалмагъуни, ну хIушачил варх сайра» викIуси адамла сипат гьалабилзули саби.

Кьисматли гIямрула гьунчив Хизри къаршивикахъниличи разисири ну. Илала цалра вайси къиликъ хIебири кьалли, гьалмагъ-хъилантала авид жагабируси адам вири. Сегъуна-дигара ихтилат гIеб­буцес бали, насихIятуни гIердури. Хизрис дисби дурчес, урцуйзирад хIязла гIягI­ни­ахълуми дирес дигахъи. Ил селизивадалра уруххIекIи.

Хизрини СВО-лизир бутIакьяндеш дирни балули, нуша лерилра иличи дебали кьакьадикIира, сунени биалли, ну ункъли сайра или нуша паргъатдирули вири. Вяхъили, хъули чариубхIели, мицIирли чарухъи сай или хIилнадиркьутири. Амма…

Нушаб илала халаси агри леб. Нушани ил лерилра гIямрулизив хъумартес хIе­дирехIе, — рикIи цакласслан Камила Мур­тузагIялиева.

— Илис спорт дебали дигахъусири. Мурталра сунела виштIаси узи тренироватьвирули вири, иличил абзаначи ваши. Хизрис сунела узи гIяхIси спортсмен ветаурли дигусири. Гьалмагъуначил замана беркIес дигули хьалли, узичилти тренировкаби цаибил мерличир дири, гIур сунес замана декIарбирусири, — викIи цакласслан Сайгид.

Дявила юлдашунанира Хизри марси гьалмагъ, адабдешла чихъти къиликъуначилси адам сайливан гьаниркахъулри, илини къуллукъбирули калунси ротала командир Хантимир СултIановлира иличила ишкьяйда буриб:

— Хизрини мурталра сунечи хъардарибти дявила хъарбаркьуни халаси жа­вабкардешличил тамандирутири. Суне­чиб халатани дурути насихIятуни итмаданал гIериси, гIур илди далдуцуназир пай­даладири. Сунела адаб-хIяяла чихъти къи­ликъуначибли илини дявила юл­да­шу­нала ургаб халаси хIурмат сар­хиб. Къул­­лукъубирухIели дузахъес хIя­жат­ти тя­хIяр-кьяйда ункъли къел­гIер­ди­ки. Хизрини дакIударибти гъабзадешла ку­мекличил чумра адамла гIямру дерца­хъес имканбакIибсири. Къиянни саби ил­гъу­на ургъанничила убла заманализив гъай­и­кIес­ра…

ХIера, сегъунарил пергер дарган урши, сайра дубурла бегIлара гIяхIти гIядатуначив халаваибси. АлкIухIели уршби алкIаб Хизригъунти – гьар секIайзиб чебетаибти, алавчарти адамтала гIямру шаладирути. Хизрила гьунарти ва баркьудлуми нушала уркIбазир даимлис кавлан!

Нушала корр.