Физика тамашала, сагаси секIал халбируси гIилму саби. Илала кумекличибли саби нушани алавси дунъя гьаргбирусира. Гьарил дурхIя хIякьикьатлизив хIялумцIан ветарули сай, илис лерилра дагьес дигахъу, сагал секIал гьаргбарес хIяракатлизив вирар. Физикала мугIяллимли ил баркьудилизиб дурхIялис икьалабиру, физикала законти ва формулаби дяркъяхъницунра ахIи, чула хIулбани тIабигIятла жагадеш, илала балгундеш чедаахъес къайгъи дакIубиру. Илгъуна баркьудилизи ахъили сари Аминат ГIяликьадиева.
Аминат Иминовна акIубси сари ХIурхъила шилизир, мугIяллимтала хъалибарглизир. Илала бегIти гIяхIцад дусмазиб мугIяллимла санигIят бузахъули калунтири. Шила школа таманбарили, А.ГIяликьадиева 1980 ибил дуслизир Дагъиста педагогический институтла физикала факультетлизи карерхурсири. Математикала ва физикала санигIятличи регIриубли, 1985 ибил дуслизир УбяхI МулебкIила администрациялизи кабурхуси БурхIимахьила школализир бузерила цаибти гунзри дехIдихьиб. Чумал дус илаб хIянчи барили, 1990 ибил дуслизир ХIурхъила школализи белчIудила ва дурхIни бяркъличи биркахънила шайчирси директорла заместительли шуррухъунсири. ИшбархIира ил къуллукъ бузахъули сари илини.
Аминатла дудеш Имин ГIяликьадиев 30 дусличивра имцIали БурхIимахьила школала директорла къуллукъличив калунсири, неш – Зубайдат Мажидова ил школализир 34 дус бехIбихьудла классунала мугIяллимли рузиб. Илдани гIяхIцад наслубас багьудлумала дунъялизи унза гьаргдариб, илди бяркъличи бикахъиб ва гIямрула бягIуси гьунчи дураиб. МулебкIантала халати дигира хIурматра сархибти, гапличи лайикьбикибти ва хIялалси бузерилизи ахъибти бегIти бириб Аминатла, чула бунагь-хатIа урдуц. БугIярли хIеили, буцIарли хIеили, 30 дусличибра имцIали гьар бархIи унра шилизи хIянчиличи хьурали вашнира халаси гьунар саби. Пикриухъалли, илгъуна баркьуди дураберкIес гьариллис-декIар имканхIебикIур. Илдани районна багьуди гьалабяхI башахънилизи белгиси пай кабихьибси саби.
БегIтазир дурхIначи диги, чеббикIибси санигIятлис мардеш чедиули, Аминатлира илдала дякьличирад рашес пикрибариб ва чебяхIси даражала багьуди касиб. ХIера, гьанна 39 дус школализир физикала мугIяллимли рузули сари ил. Илдазирадли 38 дус белчIудила ва бяркъличи биркахънила шайчирси директорла заместитель сари.
ДурхIни физикала багьудлумачи бегIбирули, илди нуша-алавси тIабигIятлизир кадиркути тамашала секIултачил тянишбирули, вайсира гIяхIсира декIардирахъес бурсибирули сари Аминат Иминовнани. Илини бучIахъути дурхIнани физикала олимпиадабачир призла мерани сархули, грамотабачи лайикьбиркутири. ДурхIнази сархибдешуни дирахъни багьандан, школала директорли сарира грамоталичил шабагъатларарибсири. Илкьяйдали А.ГIяликьадиева, сунечи хъарси хIянчи ункъли таманбирни багьандан, районна багьудила управлениели ХIурматла Грамоталичилра шабагъатларарибсири.
Ириъ, мугIяллимла БархIиличил бархбасахъи, дурхIназир багьудлумачи диги адилкьни ва бузерилизир сархибдешуни дирахъни багьандан, А.ГIяликьадиевас районна администрацияла шайзибад РФ-ла Пачалихъла Думала депутат, Россияла Игит МяхIяммад НурбяхIяндовла дудеш НурбяхIянд НурбяхIяндовли Грамота бедибсири. Илкьяйдали ил «РФ-ла багьудлуми тIинтIдируси ва дурхIни бяркъличи биркахъуси хIурматла хIянчизар» бикIуси михъирличи биршуси лишанничира лайикьрикибси сари.
Аминат Иминовнас гьаннала гIергъира бузерилизир сархибдешуни ва гIямрулизиб талихI дулгулра.
П.Мирзаева
