Ишди бурхIназиб, ГI.Тахо-Годила уличилси миллатла музейлизиб, илар рузуси Белла Кишевани гьаладихьибти гIярбукIла хьунул адамтани бекIличи чедуршути декIнала-кIузрала выставка бетерхур. Выставка ибхьухIели цалабикиб Беллала юлдаш-тянишуни, гъамти адамти.
Дагъиста Миллатла музейла бекIлириубси давла бихIян, хIеруди бузахъан Заира Кильдеевани, Белла Кишевала сипта гIеббуцилри, ва выставка дурабуркIнилизир сарира гьаркьянали ретаурлири. «Выставкали, устадешра пагьмурацун чедиахъули ахIен, илкьяйдали вегIла халкьла культурара гIядатунира ахIерадирули сари», — рикIулри Заира Кильдеева, цалабикибтала гьалар гъайрулхъухIели.
Жагаси выставка абхьниличил цалабикибти мубаракбариб, ва гьарбизуни дулгули гъайрухъун П.ХIямзатовала уличилси музейла директор СалихIят ХIямзатовара.
Выставкаличир 20-личирра имцIали, някъбани някьишдарибти, урхIмешуахIенти декIни-кIузри гьаладихьилри. Илди, дахъал дусмазир рузули, Беллани далкьаахъурти, някъла устадешла искусстволизир гIибратли диэсти жагати секIулти сарри. Илдазирад цацадехIти, гьаннала замана, сари дирнила тяхIяр-кьяйда устнани хъумартурси даражаличир сари.
Чула гIядатунира, някъла устадешра ахIерадирути халкь биалра, гьаннала заманала бархибдеш кубачилантачира баили саби. Лерти ахIерадирули, бегIлара чердикIибтигъунти, буребаличил, мургьила ва арцла гьимиртачил някьишдирули биалра, «бениахне» бикIуси жураличир кIузри секьяйда дирутил жагьилтани, гIергъиси замана хъумартурлири. Ил багьандан, Беллани пикрибарилри, «бениахне» журала декIни-кIузри дирнила бурсидешла дурсри выставкаличи бакIибтас гьаладихьес.
Сунезирад кIузри дируси чIянкIилис гIярбукIанти маркIазият (маркизет) бикIули бирар. Ил дебалли чеббикIибси журала, пачала рурсбас, давлачебтас уди челгьути палтар дируси, жявли умубируси, дебаси чIянкIи саби. СССР-лизиб илгъуна чIянкIи, чIянкIли Ленинградлизибси чит бушуси фабрикали дуракайусири. Лебилрара-сера дуракаибси маркIазият (маркизет) дурала улкнази бурхьусири.
Арбякьунси даршдусла 80 ибти дусмазиб, фабрикала багьаличиб, кIина-хIяйнали дурхъали, някъбазиб бирцули Кубачила базарличиб маркизет асес вирусири. Гьанна, маркизет бируси фабрикара бузули ахIен.
ХIера, баягъи ил маркизетлизирад дирути сари, «бениахни» журала кIузри. ЧIянкIилизи бершибси гьимирла дублизи, мургьила, арцла, яра архIяла гьимир лушуси саби, биубцад назикси гIянд бетаахъурли. ГIур ил гьимир битIикIули, кIел байхъала метрла кьадар бухъянси чIянкIила духIна, сагати гьимирти дитIикIути сари. Илкьяйда гIярбукIла хьунул адамтани, чус дигуси журала чIянкIи бетарахъули бирар. Китайла, Италияла фабрикабани сегъунти-дигара журала чIянкIи дуракайули лерли диалра, гIярбукIанти хьунул адамтала някъбани барибси кIаз, дебали дурхъаси бирар.
«Нушала хьунул адамти дебали бурсидеш гIерисути, сагали жагадеш акIахъес балути саби. Чидилрил гIярбукIан устали Парижлизи архIяличи вякьунхIели, итабад сунела хьунуйс кIаз барахъес цIуба чIянкIи хибсири. Ил чIянкIилизибад барибси кIаз цархIилти хьунул адамтани чебаибхIели, чула гьимиртачил, ва бурбуначил тяп Парижлизибад хибсигъуна, гьатIира жагаси кIаз бетаахъурсири, устадешчебти хьунул адамтани. Илгъуна кIазлис нушала хьунул адамти Парижла кIаз бикIули бирар. ГIярбукIла хьунул адамтас, цала лебси, чула агарли буэс хIейгахъу. Илдани някъби акьули буэсра хIебала», — рикIулри Белла Кишева, Парижлизибад хибсиличи мешуси, сунела някъбани барибси кIаз нушази чебиахъули.
ЦIуба декIни Дагъиста дахъал шимала хьунул адамтани дихути сари, амма гIярбукIанталайчи мешути, дунъяличир гIур чинаралра агара. Илизиб саби илдала дурхъадешра жагадешра.
Кубачила шиличи гъамли сари ГIяммузгила ва Ширила шими. Амма, сецад нушаб кубачилантала кIузри жагадилзули диалра, гIяммузган яра ширан хьунул адамли, сеналра гIярбукIла журала кIаз сунела бекIличи чехIебуршу. Гьачам хIеръибхIели, бекIличибси кIаз хIясибли, хьунул адам гIярбукIан ахIи, унра шилизирадси риъни багьес вируси сай. Ширанти ва гIяммузганти хьунул адамтани саби-бегIти, чучи хасти кIузри дихули бири мурталра. Илкьяйда гьарил шила адамтани чула мезра, культурара, гIядатунира ахIерадирутири.
Гьарил миллатлис, гьарил шилис чула мезра, гIядатунира, культурара дурхъали диънилизиб, илди ахIерадирнилизиб саби гIямрула мягIна. ЧевяхIси Аллагьли ишдицад адамти акIахъубли, цаличи ца мешути цалра акIахъубли ахIен кьалли.
Чула миллатла, мезла, гIядатунала, культурала хасдеш (идентичность) ахIерабирули сари Белла Кишеванира. Илизиб саби, халкьлис выставкала гIягIнидешра. Беллани дирути кIузри музейла матяхI ахIен, халкьли чула гIямрулизир дузахъути, палтар сари. Илкьяйда сагати кIузри дирули, илди бекIличи чедуршули, хьунул адамтани илди дихули калахъни саби выставка дураберкIнила мурадра.
Выставкаличи гьалабихьилри, кIазла удиб, бекIла гъез дигIяндирули, кубачила хьунул адамтани бихуси чутхъара (чухта). Чутхъа цIуба читлизибад барибси саби, андала шайчи цIудара, гIеладяхI дурхъати ранг-рангла чIянкIила кесекуни, цIуба читличи, дирбубли сари, гIяхIцадла бутIаличи, селра чеди хIебирбубли, цIуба читра кавлули саби. Илгъуна чутхъа хьунул адамтас чараагарли гIягIнисири, сенахIенну букIуси кIазли, бугIярси янилизиб хьунул адамла бекI ванахIебири, бусурман динна тIалабуни хIясиблира, хьунул адамтала гъез чедаахъесра асубируси ахIен. Чутхъала чеди чебушибхIели, кахIебиркули бекIличиб кIазра буули бирар. Дила зилантани, школализиб бучIухIели, кIазла уди чараагарли чутхъара биршусири.
Беллагъунти някъла устни лебхIели, дунъяличиб някъла хIянчила жагадеш калниличи бирхаудира леб. Дунъяла гьаладяхI ардякьунти улкназиб, селрайчибра гьалаб, адамтала някъбала устадеш ахъли кьиматлабирули саби.
Даргала халкьла хабуртазиб бурули лебси саби, вайнукьабала ясирлизивад верцес багьандан, талхъа уршилис някъла устадешли кумекбарниличила. Гьар-урла замунтазир Китайла ва Италияла заводунала, фабрикабала масани нушачи дихути ахIенри. Дагъиста гьарил шилизиб устадешчебти адамти лебтири: палтарла, хIякнала, дабрумала, чIянкIила, кьапIнала. Лертири къаркъала-гарала тIалхIяна, урца ваяхI, мургьи-арцлизирад жагати матяхI дирути устнала шими.
Илдигъунти устадеш калахъес биалли, халкьлис чула миллатра калахъес имканбикIуси саби.
ДураберкIибси выставка цаибил биалра, ил бегIла гIергъисили бетхIерар, сенахIенну, выставкаличи башути камли ахIенри. Гьарахълабад бакIибти, суалбикIути, бурсидеш кайсути туристунани Белла алавруцилри.
Белла Кишевас гIурра сархибдешуни, хъалибарглизиб талихI, чархла арадеш дулгулра, жагадеш алкIахъули, жагадешли дунъя жагабирахъули, хIерамсурли рузули дигулра.
Муъминат Хаттаева
