БяхIяндов МяхIяммад ГIисаевич акIубси сай Ахъушала районна КургIимахьилизив, гIядатла хъалибарглизив.
Ил 1963 ибил дуслизив, КургIимахьилизибси гехIел дусла школа хъараахъурли, Сергокъалализибси педучилищелизи керхур. ГIяхIти кьиматуначил педучилище таманбарили гIергъи, Дагъиста пачалихъла университетлизиб математикала факультетлизиб белчIуди даимбариб.
Илини КургIимахьила школализиб сунела бузерила гьуни бехIбихьиб. 1986 ибил дуслизив ил школала директор вариб. МяхIяммад ГIисаевич ил школализив узес вехIихьили гIергъи, школализир авал класс имцIадиуб.
1988-1989-ибти белчIудила дусмазиб школа гехIел класслайчибад урга даражалайчи шурбатур. 2000-ибил дуслизиб арадешлизиб нукьсандеш лебни багьандан, директорла къуллукъ бархьбатес кьадарбиуб. 2005-ибил дуслизив МяхIяммад БяхIяндов школализи завучла къуллукъличи чарухъун. 2023 ибил дусличи бикайчи завучла къуллукъличив калун.
МяхIяммад ГIисаевичли сунела гIямрула рархкьячил барх шел урши-рурси абикьур. ЧебяхIси даражала багьудиличил бегIбариб ва жавабкардешличил, халатала хIурматбирули хIербиахъес бурсибариб. Илала ца рурси ГIяйшат — МяхIячкъалализибси мединститут таманбарили, тухтурли рузули сари, кIиэсил рурси Паризатли Дагъиста пачалихъла пединститутла дурала улкнала мезанала факультет таманбарили, Англияла учительла санигIят касиб. Урши ГIялиасхIяблира ДГПУ-ла физкультурала факультет таманбарили, КургIимахьила школализив физкультурала учительли узули сай.
МяхIяммад ГIисаевичли сай узуси коллективла ва шила бухIнаб халаси хIурмат сархиб.
ДурхIначи дигичевси учитель, сунени касибси санигIятлис марси, жавабкарси, чеветаили школала бучIантази багьуди касахъес, белчIудиличи иштяхI имцIабиахъес къайгъичевси, халаси бузерила пай кабихьибси, цархIилтас гIибратли уреси адам сай.
Сунечил барх бузути учительтани илис назмуртира хасдирули сари.
Чархлизиб арадеш имцIабикIаб, сунела дурхIнани ва илдачибад акIубтани разивирули хIериэс кьадарбиаб МяхIяммад ГIисаевичлис!
Гьанна КургIимахьила школала директорли рузули сари Марьям ХIяжиева. Илра дебали гаприкIули сари МяхIяммад БяхIяндовличила, халаси хIурматла, малхIямси, пасихIси адам сай или. Иш белкI хIядурбарахъес набзи Марьям ХIяжиевани гьанбушибсири.
С.ГIябдуллаева
